Ohipa

TIMOTEO I PERITOMEHIA E PAULO, E O LUDIA I FAAFARIUHIA E ANA I PHILIPI.

16 Tae atura hoi oia i Derebe e Lusetera; e inaha, tei reira te hoê pǐpǐ o Timoteo te iˈoa, e tamaiti na te hoê vahine ati Iuda faaroo, area tana metua tane, e Heleni ïa. 2 E taata roo maitai hoi oia i te mau taeae i Lusetera e Ikonio. 3 Hinaaro atura Paulo ia ˈna e haere atoa raua, e ua rave atura ia ˈna peritome ihora, no te ati Iuda i parahi i reira ihora; ua ite atoa hoi ratou i tana metua tane e Heleni ïa. 4 Te haere atura ratou na roto i te mau oire ra, ua tuu atura ratou i tei faaauhia e te mau aposetolo e te mau peresibutero i Ierusalema ra, ei haapaoraa na ratou. 5 Itoito atura te mau ekalesia i te faaroo, tupu atura i te rahiraa, aita e mahana tuua.

6 E ia ati aˈera ia ratou Pherugia e te fenua ra o Galatia, e tapeahia ihora ratou e te Varua Maitai, eiaha e parau haere i te parau i Asia. 7 E tae atura ratou i Misia, tamata ˈtura ratou i te haere i Bitunia; aita râ ratou i tuua e te Varua o Iesu. 8 Na Misia ˈtura ratou i te haere e tae atura i raro i Teroa. 9 Itea maira te hoê orama ia Paulo i te rui; ua tia maira te hoê taata no Makedonia, ua parau maira ia ˈna, na ô maira, E fano mai i Makedonia nei e tauturu mai ia matou. 10 Ite aˈera oia i taua orama ra, ua faaineine ihora matou e fano i Makedonia, i parau hoi matou e, te parau maira te Fatu ia matou e haere e parau atu i te evanelia ia ratou.

11 Tuu atura matou mai Teroa ˈtu, fano tia ˈtura i Samoteraia, e ao aˈera, tae atura i Neapoli. 12 Mai reira hoi reva ˈtura i Philipi, o te oire rahi ïa i te reira paeau i Makedonia, e e huaraau hoi: parahi atura matou i e fanu pue mahana i taua oire ra. 13 E tae aˈera i te mahana sabati, haere atura matou i rapae au i taua oire ra i te pae pape, tei reira te hoê vahi haapaohia ei pureraa; parahi ihora matou i raro, ua parau atura i te mau vahine i putuputu mai i reira ra. 14 E te faaroo maira te hoê vahine haamori Atua, o Ludia te iˈoa, e hoo ahu ute, no te oire ra o Tuatira, e haamahorahorahia ihora to ˈna aau e te Fatu, ia haapao oia i te parau i parauhia e Paulo ra. 15 E oti aˈera oia i te bapetizohia, e tana fetii atoa, ua tauvahivahi maira ia matou, na ô maira, Te parau na outou e, e parau mau ta ˈu i te Fatu, e haere mai i roto i tau fare nei parahi ai: riro atura matou ia ˈna.

16 E te haere atura matou i te pureraa, ua farerei maira ia matou te hoê potii varua tairoiro, e taoˈa rahi ta to ˈna ra mau fatu i noaa ia ˈna i te tairoiro. 17 O tei pee haere mai ïa ia Paulo e ia matou atoa, tiaoro noa ˈi e, E tavini anaˈe teie nei mau taata no te Atua teitei, o tei faaite mai ïa ia tatou i te eˈa ora. 18 I na reira oia e rave rahi te mahana, e ooo roa aˈera Paulo, ua fariu atura, na ô atura i taua varua ra, Te faaue atu nei au ia oe e haere oe i rapae i tena na vahine i te iˈoa o Iesu Mesia ra. Haere atura oia i rapae i taua hora ra. 19 Ite aˈera râ to ˈna mau fatu e, aita ˈtura o ratou manaˈoraa e noaa ˈi te taoˈa, haru atura ratou ia Paulo e ia Sila, arato atura ia raua i te feia haava i te hooraa ra. 20 E ia hopoihia raua i te feia toroa ra, ua parau atura ratou, Na taata teie i tiarepu i to tatou oire nei, e ati Iuda hoi raua. 21 E te haapii nei i te parau eita e au i te ture ia farii tatou e ia haapao, no Roma hoi tatou. 22 Ua tia aˈera taua feia rahi atoa ra e rave ia raua, ua haehae atura te feia toroa i to raua ahu, ua faaue atura e papai ia raua i te raau. 23 E e rave rahi aˈera to raua tairiraahia e ratou, ua huri atura ratou ia raua i roto i te tapearaa ra, poroi atura i te tiai i te fare tapearaa ra e mau maitai ia raua. 24 No te mea i na reirahia mai oia i te poroi, ua huri atura ia raua i te tapearaa i roto roa ra, e haamau atura i to raua avae i roto i te raau.

25 E tui aˈera te rui, ua pure ihora Paulo raua o Sila, himene atura ma te haamaitai i te Atua; te faaroo maira te mau taata tapeahia ra ia raua. 26 E aore aˈera i mahia, e aueue rahi ihora to te fenua, e hauti atoa ˈtura te niu o taua fare tapearaa ra, hamǎmǎ noa ihora te mau opani atoa i reira ra, matara aˈera te auri fifi o te taata atoa ra. 27 Hitimaue aˈera te taoto o te tiai i te fare tapaeraa ra, e hiˈo aˈera i te mau opani o te fare tapearaa ua pau i te iritihia, unuhi aˈera oia i tana ˈoˈe e patia ia ˈna iho, parau aˈera ua ora te mau taata i tapeahia ra. 28 Ua tiaoro maira râ Paulo faateitei maira i te reo, Eiaha e totova ia oe iho; teie anaˈe hoi matou. 29 Ua parau atura oia i te hoê rǎmǎ, horo uˈana noa ˈtura i roto, haamairi ihora i raro i mua ia Paulo raua o Sila ma te rurutaina. 30 Ua aratai maira ia raua i rapae au, ua parau atura, E homa e, eaha vau e ora ˈi au? 31 Ua parau maira raua, E faaroo i te Fatu ia Iesu Mesia, e e ora ïa oe e to fetii atoa. 32 Ua parau maira raua ia ˈna e te feia atoa i roto i to ˈna ra utuafare i te parau a te Fatu. 33 Ua rave aˈera oia ia raua i taua hora i te rui ra, ua horoi atura i to raua iravarava papaihia ra, e bapetizohia ihora oia e to ˈna atoa ra i reira ra. 34 E arataihia ˈtura raua e ana i roto i to ˈna ra fare, faanahonaho ihora oia i te amuraa maa i mua i to raua aro, oaoa roa ˈtura oia e tana utuafare atoa ma te faaroo i te Atua.

35 E ao aˈera, ua tono maira te feia haava i te mau papai, na ô maira, Tuu atu i na taata ra. 36 Ua parau maira te tiai i taua fare tapearaa ra ia Paulo i taua parau ra, E ua tono mai te feia haava i te vea e tuu ia orua, e teie nei, a haere, ia ora na orua i te haerea. 37 Ua parau atura râ Paulo ia ratou, Ua papai faaite noa ratou ia mâua i te taata no Roma nei, aore hoi i faahapahia, e ua huri ia mâua i roto i te tapearaa, e tena na, te hopara huna noa nei ratou ia mâua i rapae au? eiaha roa ïa; o ratou ihora te tii hua mai e aratai ia mâua i rapae au. 38 Ua parau atura te mau papai i taua parau ra i te feia haava ra: e ite aˈera ratou e, no Roma raua, mǎtaˈu ihora ratou. 39 Ua haere maira ratou, ua parau maitai maira ia raua, aratai atura ia raua i rapae, parau atura ia raua e haere i rapae au i taua oire ra. 40 Ua faarue maira raua i taua fare tapearaa ra, tomo atura i roto i te fare o Ludia; e ite aˈera raua i te mau taeae, haamahanahana ˈtura raua ia ratou, e reva ˈtura.