Ohipa
TA PAULO RAVERAA I TE OHIPA, E TE AˈORAA I KORINETIA RA.
18 E muri aˈe i te reira, faarue ihora Paulo i Ateno e tae atura i Korinetia. 2 Ite atura oia i te hoê ati Iuda no Ponoto, o Akuila te iˈoa, e tana vahine Perisila, no haere maira mai Itali mai, (no te mea ua faaue Kalaudio i te ati Iuda atoa e faarue mai i Roma:) haere atura oia ia raua ra. 3 No te mea hoi hoê â toroa, parahi atura oia i ǒ raua ra, rave ihora i te ohipa: e hamani fare ahu to ratou toroa. 4 Ua parau atura oia i te mau sabati atoa i roto i te sunago, e aˈo atura i te ati Iuda e te Heleni. 5 E ia tae mai Sila raua o Timoteo mai Makedonia mai, riro roa ˈtura te varua o Paulo, ua parau hua ˈtura i te ati Iuda e, o Iesu te Mesia. 6 Ia mârô maite maira râ ratou e ia faaino mai, ua ueue atura oia i tana ahu, ua parau atura ia ratou, To outou na toto ei nia iho ïa i to outou iho upoo; ua mâ vau, teie au a haere ai i te Etene ra. 7 Haere atura oia, e tomo atura i roto i te fare o te hoê taata haamori Atua, o Iuseto te iˈoa, tei pihai iho to ˈna utuafare i te sunago. 8 Ua faaroo ra te tavana i te sunago ra o Kerusipo e tana utuafare atoa i te Fatu: e rave rahi atoa to Korinetia i ite e ua faaroo, e bapetizohia ihora. 9 Ua parau maira te Fatu ia Paulo i te orama i te rui, Eiaha e mǎtaˈu, e parau â, eiaha oe e mamû noa; 10 tei pihai atoa iho hoi au ia oe, aore roa e taata e rave ino mai ia oe: e rave rahi hoi to ˈu taata i teie nei oire. 11 Parahi ihora oia i reira hoê matahiti e ono marama, i te haapiiraa i te parau a te Atua i ǒ ratou ra.
12 Ia Galio ra i tiaau i Ahaia ra, ua tia paatoa aˈera te ati Iuda e haru ia Paulo, e ua aratai atura ia ˈna i te haavaraa, 13 na ô atura, Te aˈo nei teie nei taata i te mau taata nei e haamori i te Atua ma te haapao ore i te ture. 14 E te faaineine ra Paulo e parau, ua parau maira Galio i te ati Iuda na, Ahiri teie nei e parau hamani ino, e te haapao taiata, e tia ïa ia faaroo maite atu vau ia outou. 15 E mârôraa parau tena, e te iˈoa e ta outou iho ture, na outou ïa e hiˈo i te reira: e ore au e haava i te reira parau. 16 Tiahi ê atura oia ia ratou i taua haavaraa ra. 17 Ua rave aˈera te mau Heleni atoa i te tavana o te sunago ra ia Sositene, ua papai atura ia ˈna i mua i te haavaraa ra: e aore roa Galio i haapao i te reira.
18 Parahi ihora Paulo i reira e maoro aˈera, poroi maira i te mau taeae, fano atura i Suria, e o Perisila atoa raua o Akuila; i paoti na oia i tana upoo i Keneherea; i euhe na hoi oia. 19 E tae atura oia i Ephesia, vaiiho ihora ia raua i reira, area oia iho, tomo atura ïa i roto i te sunago, ua parau atura i te ati Iuda. 20 E ia tapea mai ratou ia ˈna e parahi oia i ǒ ratou ra e ia maoro, aita aˈera i tia ia ˈna; 21 ua poroi atura râ oia ia ratou, na ô atura, E haapao â vau i te oroa i fatata i Ierusalema ra e tia ˈi; e hoˈi mai râ vau i ǒ nei ia outou nei ia tia i te Atua. Fano atura oia mai Ephesia ˈtu. 22 E tipae atura oia i Kaisarea, haere atura i nia, aroha ˈtura i te ekalesia, e oti aˈera, reva ˈtura i te Anetiohia. 23 E maoro aˈera oia i reira, reva ˈtura, haere atura e na Galatia e Pherugia, e ati maite aˈera tei reira fenua i te faaitoito i te mau pǐpǐ atoa.
24 Ua haere maira i Ephesia te hoê ati Iuda o Apolo te iˈoa, i Alesanederia te fanauraa, e taata parau maitai, e te paari hoi i te parau i papaihia ra. 25 I haapiihia oia i te parau a te Fatu: e no te anaanatae o to ˈna aau, ua parau atura, e haapii maite atura i te parau a te Fatu, o te bapetizo a Ioane anaˈe ra ta ˈna i ite. 26 Ua parau atura oia i roto i te sunago ma te mǎtaˈu ore, e ia faaroo atura Akuila raua o Perisila ia ˈna, ua aratai maira raua ia ˈna i to raua iho utuafare, e ua faaite maite atura ia ˈna i te parau a te Atua. 27 E hinaaro aˈera oia i te fano i Ahaia, ua papai ihora te mau taeae i te parau, i te aˈoraa ˈtu i te mau pǐpǐ ia ite maitai mai ratou ia ˈna: e tae atura oia i reira e tauturu rahi to ˈna i te feia no te aroha mau a te Atua i faaroo ai ra. 28 Mârô maite atura oia i te ati Iuda i te vahi taata, faaite papu maite atura e, o Iesu te Mesia i te parau i papaihia ra.