Ohipa

TE MÂRÔRAA I TE PEU RA I TE PERITOME, E TE MAU APOSETOLO I TE FERURIRAA I TAUA PARAU RA.

15 Ua haere maira e toofanu mau taata mai Iudea mai, ua haapii maira i te mau taeae, na ô maira, Ia ore outou ia peritomehia mai te peu a Mose ra, e ore outou e ora. 2 E mârô maite atura Paulo raua o Baranaba ia ratou, ua haapao atura ratou ia Paulo raua o Baranaba, e i e toofanu mau taata no ratou iho, e haere i Ierusalema i te mau aposetolo ra e te mau peresibutero ra i taua parau ra. 3 E arataihia ˈtura ratou e te ekalesia i taua haerea ra, haere atura ratou na Phoinikia e Samaria, i te faaite-maite-raa ˈtu i to te Etene fariuraa, rahi roa ˈtura to te mau taeae oaoa ia ratou. 4 E tae atura ratou i Ierusalema, itehia maira ratou e te ekalesia, e te mau aposetolo, e te mau peresibutero, ua faaite atura ia ratou i ta te Atua i rave ia raua ra. 5 Ua tia maira e toofanu no te pǔpǔ Pharisea tei faaroo ra, na ô maira, E peritome ia ratou e tia ˈi, e e aˈo atu e haapao i te ture a Mose ra.

6 E ua haaputuputu ihora te mau aposetolo e te mau peresibutero ra e feruri i taua parau ra. 7 E rahi roa aˈera te mârôrô, ua tia aˈera Petero, ua parau maira ia ratou, E te mau taeae nei, ua ite outou e ua haapao te Atua i roto ia tatou nei ia ˈu i mutaa iho, ia ite te Etene i te evanelia i to ˈu nei vaha ia faaroo. 8 E o te Atua hoi tei ite i te aau ra tei faatia mai ïa ia ratou, i te horoaraa mai i te Varua Maitai ia ratou, mai ta ˈna i horoa mai ia tatou nei. 9 Aore hoi i faahuru ê atu ia ratou e ia tatou nei, i te haamaitairaa i to ratou aau i te faaroo. 10 E teie nei, eaha outou i haapeapea ˈtu ai i te Atua, i te tuuraa i te zugo i nia i te aˈî o te mau pǐpǐ, aore i manaa i to tatou hui tupuna ra e ia tatou atoa nei hoi? 11 Ua ite râ tatou e, e ora tatou i te aroha o to tatou Fatu o Iesu Mesia, mai ia ratou atoa ra.

12 Ua mamû ihora taua feia rahi atoa ra, ua faaroo maira ia Baranaba raua o Paulo, i te faaiteraa ˈtu i te mau tapao e te mau semeio ta te Atua i rave ia raua i ǒ te Etene ra. 13 E ia faaoti aˈera ta raua parauraa, ua parau atura Iakobo, na ô atura, E te mau taeae, a faaroo mai na ia ˈu: 14 te parau mai nei Simeona e, ua hiˈo aroha mai te Atua i te Etene i mutaa ihora, e rave i te hoê pae taata i roto ia ratou ra no to ˈna ra iˈoa. 15 Te au nei hoi te parau a te mau peropheta ra i te reira, oia hoi tei papaihia ra e, 16 Muri aˈera e hoi atu vau, e patu faahou i te sekene o Davida i mairi i raro ra; e te huˈahuˈa o taua sekene ra e patu-faahou-hia ïa e au, e tia ˈtu i nia: 17 ia imi te toea o te taata i te Fatu, e te mau Etene atoa i mairihia i to ˈu ra iˈoa, te na reira maira te Fatu, o tei faatupu i teie atoa nei mau parau. 18 Ua ite te Atua i ta ˈna atoa ra mau ohipa mai te matamua mai â. 19 E teie nei, teie ta ˈu parau, eiaha tatou e haapeapea ˈtu i te feia i fariu i te Atua no roto i te Etene ra. 20 E papai atu râ tatou i te parau ia ratou ra, eiaha ratou e rave i te mea viivii hopoihia na te mau idolo, eiaha e faaturi, eiaha e amu i te mea uumi-noa-hia, e te toto. 21 Te vai nei hoi te feia i parau ia Mose i te mau oire atoa mai tahito mai â, te taiohia mai nei hoi oia i roto i te mau sunago i te mau mahana sabati atoa nei. 22 Ua manaˈo ihora te mau aposetolo, e te mau peresibutero, e te ekalesia atoa, e tono i e toopiti pue taata maitihia i roto ia ratou ihora i Anetiohia, ia Iuda, o Barasaba te hoê iˈoa ra, e ia Sila, e pue taata hau ïa i roto e te mau taeae ra, o Paulo hoi e Baranaba. 23 E ua papai atura hoi i te leta na to ratou rima i hopoi, na ô atura; Te mau aposetolo e te mau peresibutero e te mau taeae atoa nei, te hapono atu nei matou i to matou aroha ia outou, i te mau taeae i roto i te Etene i Anetiohia, e i Suria, e i Kilikia ra. 24 Ite aˈenei matou e, ua tiarepuhia to outou aau i te parau a ve toofanu pue taata no ǒ nei atu i ô matou nei, i te na ôraa ˈtu e, e peritome ia outou, e e haapao i te ture e tia ˈi; aore hoi matou i faaue noa ˈtu ia ratou. 25 Haaputuputu aˈenei hoi matou atoa, manaˈo aˈenei e mea maitai ia faatono atoa ˈtu i e toopiti pue taata maitihia ia outou na, e to matou pue taeae here nei ia Baranaba e Paulo. 26 E pue taata faarǔrǔ ïa i to raua pohe, no te iˈoa o to tatou Fatu o Iesu Mesia ra. 27 E teie nei, tono atu na hoi matou ia Iuda raua o Sila, e na raua e parau vaha noa ˈtu ia outou i taua parau ra. 28 E mea maitai i te Varua Maitai e ia matou atoa nei hoi, eiaha roa ei teimaha ê i tuuhia ˈtu i nia iho ia outou maori râ o teie nei mau mea tia. 29 Eiaha outou e amu i te maa i afaihia i te idolo ra, e te toto, e te mea uumi-noa-hia ra, e eiaha hoi e faaturi: i faarue outou i te reira, e maitai ïa outou. Ia ora na.

30 E tuuhia ˈtura ratou, tae atura ratou i Anetiohia, ua haaputuputu maira i te taata atoa ua tuu atura ratou i te leta. 31 E oti aˈera i te taiohia e ratou, oaoa ˈtura ma te mauruuru. 32 E aˈo hua ˈtura Iuda raua o Sila i te mau taeae, e faaitoito atura ia ratou, e peropheta atoa hoi raua. 33 E ia parahi raua i reira e maoro iti aˈera, tuu maitaihia ˈtura raua e te mau taeae i te mau aposetolo ra. 34 O Sila râ, manaˈo aˈera oia e, e parahi â i reira. 35 O Paulo hoi e Baranaba parahi atura raua i Anetiohia, e rave rahi â hoi te taata, i te aˈoraa e te haapiiraa i te parau a te Fatu.

36 E mahemo aˈera e fanu pue mahana, ua parau atura Paulo ia Baranaba, E hoˈi tâua i te mau taeae ra, i te mau oire atoa i parauhia e tâua te parau a te Fatu ra, ia ite tâua i to ratou mauraa. 37 Ua parau aˈera Baranaba e aratai atoa ia Ioane, o Mareko te tahi iˈoa ra. 38 Aita râ Paulo i manaˈo e, e mea au ia aratai atoa ia ˈna i to ratou tere, o tei faarue mai ia ratou i Pamephulia ra, aore i haere atoa i taua ohipa ra. 39 Tupu atura hoi te mârô rahi ia raua iho, e taa ê atura raua, rave atura Baranaba ia Mareko, fano atura i Kupero. 40 O Paulo ra, apiti atura ïa ia Sila, e reva ˈtura, ua oti aˈera i te pûpûhia e te mau taeae i te ite a te Atua. 41 Haere atura oia na Suria e na Kilikia, i te faaitoitoraa i te mau ekalesia.