Ohipa

TO PETERO PARIRAAHIA, E TE FAATIARAA IA ˈNA IHO.

11 E ite atura te mau aposetolo e te mau taeae i Iudea ra e, ua mau atoa te Etene i te parau a te Atua. 2 E tae atura Petero i Ierusalema, ua mârô maira to te peritome ra ia ˈna, 3 na ô maira, I tomo na oe i ǒ te peritome-ore-hia ra, e i amu na oe i te maa e ratou atoa ra hoi. 4 Ua tuatapapa maite atura Petero i taua parau ra, i te faaiteraa ˈtu ia ratou mai te matamua mai â, na ô atura, 5 Te pure ra vau i te oire ra i Iopa, tarehua ihora vau, e ite atura vau i te tahi orama, i te hoê farii mai te hoê ahu rahi pu ra i te tuuraahia mai no nia i te raˈi, i na na hitihia e maha ra te tuu i raro, e tae roa maira i pihai iho ia ˈu. 6 E tiatonu maite atura tau mata i taua mea ra, ite atura vau i te mau mea avae maha o te fenua nei, e te puaa taehae, e te mea rii e nee haere nei, e te manu o te reva. 7 E faaroo atura vau i te hoê reo i te parauraa mai ia ˈu, A tia, e Petero, e taparahi a amu. 8 Ua parau atura râ vau, Eiaha roa ïa, e tau Fatu, aita roa aˈenei e mea viivii e te mea mâ ore i ô i roto i tau vaha. 9 Ua parau faahou maira taua reo no nia i te raˈi ra, o te piti ïa o te parauraa mai ia ˈu, Ta te Atua i tamâ ra, eiaha oe e parau e, e mea mâ ore ïa. 10 E toru aˈera hoi na reiraraa mai, huti-faahou-hia ˈtura taua mau mea atoa ra i nia i te raˈi. 11 E inaha, e tootoru pue taata mai Kaisarea mai, i tonohia mai ia ˈu ra, tei te fare maira ta ˈu parahi i reira ra. 12 Ua faaue maira te Varua ia ˈu e haere e ratou atoa, eiaha roa e feaa; e o teie atoa nei hoi mau taeae toofene nei i te haere-atoa-raa matou, e tomo atura matou i roto i te fare o taua taata ra. 13 E ua parau maira oia ia matou, ua ite oia i te hoê melahi i te tiaraa i roto i to ˈna fare, e te parauraa mai ia ˈna e, A tono i te taata i Iopa e tii ia Simona, o Petero te hoê iˈoa o ˈna; 14 na ˈna e parau mai ia oe i te parau e ora ˈi oe e to fetii atoa hoi. 15 E tei te parauraa ˈtu vau ra, ua pou maira te Varua Maitai i nia iho ia ratou, mai te pouraa mai i nia ia tatou i mutaa ihora. 16 Ua manaˈo ihora vau i te parau a te Fatu, ta ˈna i parau maira e, I bapetizo â hoi Ioane i te pape, e bapetizohia râ outou i te Varua Maitai. 17 E faito aˈera hoi ta te Atua i horoa mai ia tatou nei, i tei faaroo i te Fatu ra ia Iesu Mesia, i ta ˈna horoa mai ia ratou ra, o vai hoi au a tia ia ˈu ia mârô atu i te Atua? 18 E ite aˈera ratou i taua mau parau ra, ua tuu maite maira ratou, e haamaitai atura i te Atua, na ô aˈera, Ua horoa atoa maori te Atua i te tatarahapa ora i te Etene.

19 Te feia hoi i purara ê i te hamani ino i tupu ia Setephano ra, haere roa ˈtura ïa i Phoinikia e i Kupero, e Anetiohia, i te parauraa i te parau i te ati Iuda anaˈe ra. 20 E te hoê pae taata o ratou ra no Kupero ïa, no Kurene, o tei parau atu ïa i te Heleni i to ratou taeraa ˈtu i Anetiohia, i te parauraa i te Fatu ra ia Iesu. 21 E tei ia ratou hoi te rima o te Fatu; e feia rahi hoi tei faaroo, e ua fariu i te Fatu ra. 22 E ua tae roa to ratou roo i te tariˈa o te ekalesia i Ierusalema ra, e ua tono hoi ratou ia Baranaba e haere oia i Anetiohia. 23 E tae atura oia i reira, e ite atura i te hamani maitai o te Atua, oaoa ˈtura, e aˈo atura ia ratou atoa ia ati atu i te Fatu ma te aau atoa. 24 E taata maitai hoi oia, e ua î i te Varua Maitai e te faaroo; e te feia rahi hoi tei amuihia i te Fatu ra.

25 E haere atura Baranaba i Tareso e imi ia Saulo. 26 Ite atura oia ia ˈna, e ua aratai maira ia ˈna i Anetiohia; e hoê atoa o raua matahiti i reira i te amuiraa i taua ekalesia ra, e haapii atura i te taata e rave rahi, e i Anetiohia na te mairiraahia to te mau pǐpǐ iˈoa e Kerisetiano.

27 E tau peropheta te haere mai i Anetiohia i taua mau mahana ra, mai Ierusalema. 28 Ua tia aˈera te hoê o ratou i nia, o Agabo te iˈoa, ua faaite maira i ta te Varua e, te fatata maira te oˈe rahi i te fenua atoa nei; o tei tupu ïa i te hau ia Kalaudio Kaisara ra. 29 Ua opua ihora te mau pǐpǐ e hapono te taata atoa i te taoˈa e au ia ˈna ihora, ei tauturu atu i te mau taeae i parahi i Iudea ra. 30 I na reira ˈtura hoi ratou, hapono atura i te mau peresibutero i te rima o Baranaba raua o Saulo ra.