Ohipa

TE HAMANI INO O HERODA, E TE TAPARAHIRAA IA IAKOBO, E TE TAPEARAA IA PETERO RA.

12 I taua anotau ra, ua faatoro maira te arii o Heroda i tana rima, e hamani ino mai i te tahi pae o te ekalesia ra. 2 E taparahi ihora i te tuaana o Ioane ia Iakobo i te ˈoˈe. 3 E ite aˈera oia, e te maitai ra te ati Iuda i te reira, ua titau atura oia e rave atoa ia Petero. O te mau mahana maa faahopue-ore-hia ra te reira. 4 E noaa ihora oia ia ˈna, ua tuu atura oia ia ˈna i roto i te tapearaa ra, e pûpû atura ia ˈna i na pǔpǔ faehau e maha ra ei tiai ia ˈna; i manaˈo oia e, ia oti te pasa, aratai mai ai ia ˈna i rapae i te vahi taata ra a taparahi ai. 5 Tiai-maite-hia ihora Petero i roto i te tapearaa ra; ua pure atura râ te ekalesia i te Atua no ˈna aita e faaea. 6 E fatata aˈera Heroda i te aratai mai ia ˈna i rapae au, te taoto noa ra Petero i taua rui ra i ropu i na faehau toopiti ra, i tapeahia i te auri fifi e piti, e tei te uputa na faehau i te tiairaa i taua tapearaa ra. 7 E inaha, ua fa maira te hoê melahi a te Fatu ra, e ua anaana maira te maramarama i roto i taua fare ra, ua papai maira oia i te aoao o Petero, faaara maira ia ˈna, na ô maira, A tia oioi; mairi atura na auri fifi i tana rima ra. 8 Ua parau maira te melahi ia ˈna, A tatua na ia oe, taamu na i to tamaa i to avae; e ua na reira ˈtura oia. Ua parau mairâ hoi oia ia ˈna, A ahu na oe i to ahu, a pee mai ai ia ˈu. 9 Ua pee atura oia ia ˈna i te haereraa ˈtu i rapae au, aore oia i ite e, e mea mau ta taua melahi ra; parau aˈera e, e orama ta ˈna i ite ra. 10 E mairi maira ia raua tei mutaa iho tiai ra e te piti hoi, tae atura raua i te opani auri e tae atu ai i roto i te oire ra, ua hamǎmǎ noa maira taua opani ra ia raua; tomo atura raua i rapae au, haere atura raua e mairi maira te hoê aroâ, faarue maira te melahi ia ˈna i reira ra. 11 E iho maira to Petero huru mau, na ô aˈera oia, Ua ite mau atura vau e, ua tono mai te Fatu i tana melahi e ua faaora ia ˈu i te rima o Heroda, e te manaˈo o te ati Iuda. 12 Haamanaˈo ihora oia i taua mea ra, e oti aˈera, haere atura oia i te fare o Maria te metua vahine o Ioane, o Mareko te hoê iˈoa ra; e feia rahi hoi tei putuputu i reira, te pure ra. 13 E te patoto atura Petero i te opani i te tomoraa ra, ua haere maira te hoê potii e faaroo, o Roda te iˈoa. 14 E ite aˈera i te reo o Petero, aita aˈera oia i iriti i te opani i te oaoa; horo atura râ i roto, parau atura e, te tia noa maira Petero i te uputa aˈera. 15 Ua parau maira ratou ia ˈna, Ua maamaahia oe. Ua mârô maite atura oia e, oia mau. Ua parau maira ratou, O tana melahi maori. 16 Ua tamau maite atura Petero i te patotoraa ˈtu, e iriti aˈera ratou i te opani, e ite maira ia ˈna, e hitimaue atura. 17 Ua poipoi atura oia i te rima ia mamu atu ratou, ua faaite atura oia ia ratou i ta te Fatu aratairaa mai ia ˈna i rapae au i taua tapearaa ra. Ua parau atura hoi oia, E faaite atu ia Iakobo e te mau taeae i teie nei mau parau. Reva ˈtura oia, haere atura i te hoê vahi ê atu. 18 E ao aˈera, e ere i te atutu iti haihai to taua mau faehau ra ia Petero. 19 Ua imi atura Heroda ia ˈna, e aita aˈera oia i itea, ua ui maere atura oia i te mau tiai, e faaue atura i te taata e aratai atu ia ratou e taparahi. Haere atura oia i Kaisarea mai Iudea ˈtu, parahi atura i reira.

20 Te riri ra Heroda i to Turia e to Sidona; ua haere atoa maira râ ratou i mua i tana aro, ua oti aˈera hoi Belaseto te tiai i te piha roi o te arii ra i te faatauahia e ratou, ua ani atura ratou i te hau, no te mea no te fenua o te arii ra te maa i to ratou ra fenua. 21 E tae aˈera i te mahana i haapaohia ra, ua parahi maira Heroda i nia i te terono ma te ahu arii i te ahuraa, e ua orero maira ia ratou. 22 Ua pii atura te taata, E reo ïa no te Atua, e ere ïa i to te taata. 23 Ua tairi maira te melahi a te Fatu ia ˈna i reira ra, no te mea aore oia i horoa ˈtu i te haamaitai i te Atua ra; pau atura oia i te amuhia e te iro, e pohe atura.

24 Tupu atura hoi te parau a te Atua, e aano roa ˈtura. 25 Ua hoˈi maira Baranaba e Saulo mai Ierusalema mai ia oti to raua tere ra, aratai atoa maira raua ia Ioane, o Mareko te hoê iˈoa ra.