Ohipa

TO KORENELIO FAAUERAAHIA E TE MELAHI E TIPAPA IA PETERO RA.

10 E tei Kaisarea te hoê taata, o Korenelio te iˈoa, e raatira hanere no te pǔpu e parauhia ra e, o te pǔpǔ Itali, 2 e taata paieti, e te mǎtaˈu hoi i te Atua, e to ˈna atoa ra fetii, e te horoa hoi i te taoˈa e rave rahi na te taata, e e ore hoi e faaea i te pure i te Atua. 3 E ite papu atura oia i te melahi a te Atua i te orama i te haereraa mai ia ˈna ra, i te ao i te hora iva ra, e te parauraa mai ia ˈna e, E Korenelio. 4 Ua hiˈo papu maite atura oia ia ˈna, mǎtaˈu roa aˈera oia, e ua na ô aˈera E te Fatu, eaha teie? Ua parau maira oia ia ˈna, o ta oe pure, e ta oe horoaraa taoˈa, ua tae roa i nia i mua i te aro o te Atua ra ei haamanaˈoraa ia oe. 5 E teie nei, e tono oe i te taata i Iopa e tii ia Simona, o te parauhia ia Petero ra; 6 e tia oia i ǒ Simona rapaau iri ra i te taotoraa, tei tahatai to ˈna utuafare, na ˈna e faaite mai ia oe i ta oe haapaoraa. 7 E reva ˈtura te melahi i parau mai ia Korenelio ra, ua parau atura oia i e toopiti pue tavini no ˈna iho, e te hoê faehau paieti no te feia e tia i pihai iho ia ˈna ra; 8 e hope aˈera taua mau parau ra i te faaitehia ˈtu ia ratou ra, ua tono atura ia ratou i Iopa.

9 E poipoi aˈera, te haere noa ra ratou i to ratou tere, te fatata maira ia ratou taua oire ra, reva ˈtura Petero i nia iho i te fare ra e pure, i te ono o te hora ra. 10 Poia roa ihora oia, e hiaai atura i te maa e amu; te rave ra hoi to ratou i te maa, tarehua ihora oia. 11 E ite atura oia i te raˈi i te vetearaahia, e te hoê farii mai te ahu rahi pu ra i te mairiraa mai, i taamuhia na hiti e maha atoa, i te tuuraahia mai i raro i te repo. 12 E te mau mea atoa e maha avae o te fenua nei ra, e te mea taehae, e te mea rii e nee haere, e te manu hoi o te reva ra i roto. 13 E te hoê reo maira hoi ia ˈna ra, A tia a taparahi, e Petero, a amu. 14 Ua parau atura Petero, Eiaha roa ïa, e tau Fatu, aore â hoi i amu i te maa viivii e te mea mâ ore hoi. 15 Ua parau faahou maira taua reo ra, o te piti ïa o te parauraa mai, O ta te Atua i tamâ ra, eiaha oe e parau e, e mea viivii ïa. 16 E e toru aˈera na reiraraa mai, rave-faahou-hia ˈtura taua farii ra i nia i te raˈi.

17 E te maere noa ra Petero i roto ia ˈna iho i te faaauraa i taua orama i itea ia ˈna ra, e inaha, i ui na te mau taata i tonohia ˈtu e Korenelio i te fare o Simona, e tia anaˈe atura hoi i te uputa. 18 Ua parau atura e ui atura, E tia anei Simona i ǒ nei i te taotoraa, o tei parauhia o Petero ra. 19 E te manaˈo noa ra Petero i taua orama ra, ua parau maira te Varua ia ˈna, Inaha te uihia maira oe e ve tootoru pue taata. 20 E teie nei, e tia oe e haere i raro, a haere atoa ˈtu ai, eiaha roa e feaa, na ˈu hoi ratou i tono mai. 21 Ua pou maira Petero i raro i te mau taata i tonohia ˈtu ia ˈna e Korenelio ra, ua parau maira, Inaha, o vau ta outou i imi nei, eaha to outou tere i haere mai ai i ô nei? 22 Ua parau atura ratou, O Korenelio raatira hanere, e taata parau-tia, e te mǎtaˈu hoi i te Atua, e te roo maitai i te ati Iuda atoa ra, i aˈohia mai oia e te hoê melahi moˈa, e tipapa ia oe e haere i to ˈna ra utuafare, ia ite oia i ta oe na parau. 23 Ua faatomo maira oia ia ratou i roto, faaamu atura ia ratou, e poipoi aˈera, haere atura Petero e ratou atoa, e o ve toofanu i te mau taeae i Iopa ra i te pee-atoa-raa ˈtu ia ˈna.

24 E ao aˈera hoi, tomo atura ratou i roto i Kaisarea; te tiai maira Korenelio ia ratou, ua oti hoi i te haaputuputuhia mai to ˈna ra fetii, e te mau hoa mau ra. 25 E tei te tomoraa ˈtu Petero i roto ra, ua farerei maira Korenelio ia ˈna, haamairi ihora i raro i tana pae avae, tahopu maira ia ˈna. 26 Ua faatia ˈtura râ Petero ia ˈna, na ô atura, A tia, e taata atoa hoi au nei. 27 Ua paraparau ihora raua, e haere atura i roto, roohia ˈtura ua putuputu te taata e rave rahi. 28 Ua parau atura oia ia ratou, Ua ite hoi outou e, e ore te taata ati Iuda e amui atu, e e ore hoi e tomo i te fare o te taata o te hoê fenua ê ra; ua faaite mai râ te Atua ia ˈu e, eiaha vau e parau i te taata e, e viivii e te mâ ore hoi. 29 I haere mai ai au i te tipaparaahia aˈenei, aore au i mârô; e teie nei, e ui atu vau, no te aha i tipapa ˈˈe ai outou ia ˈu nei? 30 Ua parau maira Korenelio, A rui maha aˈenei te haapae ra vau i te maa e tae aˈera i teie nei hora; e i te iva o te hora i pure ai au i roto i tau fare, e inaha, ua tia noa maira te hoê taata i mua ia ˈu ma te ahu anaana, 31 e ua na ô maira, E Korenelio, ua faaroohia ta oe pure, e ua manaˈohia to oe hamani maitai i mua i te aro o te Atua ra. 32 E teie nei, e faatono oe i te taata i Iopa, e parau atu ia Simona e haere mai i ǒ nei o te parauhia ia Petero ra, e tia oia i tahatai i te fare o Simona rapaau iri ra i te taotoraa, e ia tae mai oia ra, na ˈna ïa e paraparau mai ia oe. 33 I reira ra to ˈu tonoraa ˈtu i te vea ia oe, e maitai atura o oe i haere mai nei; e teie nei, teie anaˈe matou tei mua i te aro o te Atua, ia ite matou i te mau parau atoa a te Atua i poroi iho ia oe ra.

34 Ua parau atura te vaha o Petero, Ua ite mau atura vau e ore te Atua e haapao i te huru o te taata. 35 O tei mǎtaˈu râ ia ˈna, e o tei rave i te parau-tia i te mau fenua atoa ra, o te itehia mai ïa e ana. 36 Ua ite hoi outou i te parau ta ˈna i hapono mai i te tamarii a Iseraela ra, i te parau-haere-raa i te parau maitai i te hau ra ia Iesu Mesia (o te Fatu no te mau mea atoa ra.) 37 O te parau i parauhia na Galilea maira e ati noa ˈˈe Iudea atoa ra, i muri aˈe i te bapetizo i parau-haere-hia e Ioane ra: 38 ia Iesu o Nazareta, o tei faatahinuhia mai e te Atua i te Varua Maitai e te mana ra; o tei hamani maitai haere ra, e te faaoraraa i te feia atoa i neineihia e te diabolo ra, tei ia ˈna ra hoi te Atua. 39 O matou nei hoi te ite i te mau peu atoa ta ˈna i rave i Ierusalema ra, e te fenua atoa hoi o te ati Iuda ra; e ua taparahi hoi ratou e faauta ˈtura ia ˈna i nia i te raau. 40 Oia hoi ta te Atua i faatia aˈenei i nia i te rui toru ra, e ua faaite ia ˈna i te vahi atea ra; 41 eiaha râ i te taata atoa ra, i te feia râ i haapaohia e te Atua ei ite ra, oia hoi matou nei, o tei amu atoa e tei inu hoi e oia atoa, i muri aˈe i tana tiaraa mai mai te pohe maira. 42 E ua poroi iho oia ia matou e, e parau haere matou i te taata, e faaite hua ˈtu hoi e oia tei haapaohia e te Atua ei haava i tei ora e tei pohe ra hoi. 43 Oia hoi ta te mau peropheta atoa i parau maira e, o te faaroo ia ˈna ra, e matara ïa ta ratou hara i to ˈna ra iˈoa.

44 E te parau atura Petero i taua mau parau nei, ua mairi maira te Varua Maitai i nia iho i taua feia atoa i faaroo mai i taua parau ra. 45 E te feia atoa o te peritome i faaroo ra, o tei haere atoa mai ratou o Petero ra, maere atura ratou, i te mea i niniihia mai te Varua Maitai horoa-noa-hia ra i nia atoa i te Etene. 46 I faaroo atura hoi ratou ia ratou i te parauraa i te parau ěê, e te haamaitairaa i te Atua: ua parau atura Petero ia ratou, 47 E tia anei i te taata ia faaore i te pape ia ore ia bapetizohia teie nei feia, o tei noaa hoi ia ratou te Varua Maitai mai ia tatou atoa nei? 48 Ua parau atura Petero ia ratou e bapetizo ma te iˈoa o te Fatu ra. Ua tapea maira ratou ia ˈna ia parahi oia i ǒ ratou ra i e fanu pue mahana.