Ohipa

TO SAULO FAARIRORAAHIA EI APOSETOLO I TE HAERERAA I DAMASEKO RA.

9 Area Saulo, te rahi noa ra ïa ta ˈna parau haamǎtaˈu e te taparahi i te mau pǐpǐ a te Fatu ra, e haere atura oia i te tahuˈa rahi ra, 2 ua ani atura ia ˈna i te leta e hopoi i te mau sunago i Damaseko ra, e ia itea ˈtu ia ˈna te feia i mau i taua parau ra, ia aratai mai oia ia ratou ma te tapea auri atoa i Ierusalema, te tane e te vahine atoa hoi. 3 E haere atura oia i to ˈna tere, e fatata maira Damaseko ia ˈna ra, ua ati ihora oia i reira ra i te maramarama no te raˈi i te anaanaraa mai. 4 Mairi ihora oia i raro i te repo, e faaroo aˈera oia i te hoê reo i te parauraa mai ia ˈna, E Saulo, e Saulo, eaha oe i hamani ino mai ai ia ˈu? 5 Ua parau atura oia, E te Fatu, o vai oe? Ua na ô maira te Fatu, O vau o Iesu, ta oe i hamani ino mai nei: e ore e tia ia oe ia tue i te tara. 6 Ua parau atura oia ma te maere e te rurutaina, E te Fatu, eaha vau, eaha to oe hinaaro? Ua parau maira te Fatu ia ˈna, A tia i nia, e haere oe i roto i te oire, ei reira oe e faaitehia mai ai i ta oe e rave. 7 E te mau taata i haere atoa e oia ra, tia noa ihora ïa ma te maere, ua ite atoa hoi i taua reo ra, aore râ e taata i itea. 8 Ua tia aˈera Saulo i nia mai raro mai i te repo ra, te araara noa ra tana mata, aore roa râ oia i ite i te taata; i aratai-rima-hia ˈtura oia e ratou e tae atura oia i Damaseko. 9 E rui toru aˈera oia ma te ite ore, e aore â hoi i amu e te inu hoi.

10 Tei Damaseko te hoê pǐpǐ o Anania te iˈoa, ua parau maira te Fatu i te orama ia ˈna, E Anania, Ua parau atura oia, E te Fatu, teie au. 11 Ua parau maira te Fatu ia ˈna, A tia, a haere i te aroâ i parauhia ra, o Titiaifaro, e te utuafare roa o Iuda ra, a ui atu ai i te hoê taata no Tareso, o Saulo te iˈoa, inaha hoi te pure ra oia; 12 e ua ite aˈenei hoi oia i te orama i te hoê taata o Anania te iˈoa i te tomoraa i roto, e te tuuraa i te rima i nia iho ia ˈna, ia ite faahou oia ra. 13 Ua parau atura Anania, E te Fatu, e rave rahi aˈenei to ˈu ite i te reira taata, i to ˈna hamani ino rahi i te mau taata no oe i Ierusalema ra. 14 E mana hoi to ˈna i ǒ nei no te mau tahuˈa rarahi ra, ia tapea oia i te mau taata atoa e faahiti i to iˈoa na. 15 Ua parau maira te Fatu ia ˈna, E haere oe, e farii maitihia hoi oia na ˈu, ei hopoi i tau iˈoa i mua i te aro o te mau Etene ra, e i te hui arii ra, e i te tamarii hoi a Iseraela ra. 16 E faaite hoi au ia ˈna i te rahiraa o to ˈna pohe no to ˈu nei iˈoa. 17 Haere atura Anania, e tomo atura i roto i te fare, ua tuu atura i tana rima i nia iho ia ˈna, na ô atura, E tau taeae, e Saulo, na te Fatu na Iesu ta oe i ite i te aratai ia oe i haere mai nei, i tono mai ia ˈu ia ora to mata, e ia faaîhia oe i te Varua Maitai. 18 Ua mairi ihora i reira ra te hoê mea no nia i tana mata, mai te poa iˈa ra te huru, e ite faahou atura oia i reira ra, tia aˈera i nia, e bapetizohia ihora hoi.

19 E ia amu i te maa ra, etaeta aˈera oia: parahi ihora Saulo i e fanu pue mahana i ǒ te mau pǐpǐ i Damaseko ra. 20 Ua parau atura oia ia Iesu Mesia i reira ra, i roto i te mau sunago ra e, o te Tamaiti ïa na te Atua. 21 Maere anaˈe ihora te mau taata atoa i faaroo ia ˈna ra, na ô aˈera, E ere anei teie i te taata i taparahi i te feia i faahiti i teie nei iˈoa i Ierusalema ra? e o tei haere mai hoi i ǒ nei e aratai tapea ia ratou i te hui tahuˈa rarahi ra? 22 Itoito roa ˈtura Saulo, e pohe atura ia ˈna te ati Iuda e parahi i Damaseko ra, tupu maite atura ta ˈna e o te Mesia mau teie.

23 E e rave rahi aˈera te mahana i mairi, ua faaau ihora te ati Iuda i te parau e taparahi ia ˈna. 24 I faaitehia maira Saulo i to ratou taotootoraa ia ˈna: ua tiai atura ratou i te mau uputa ra i te rui e te ao e taparahi ia ˈna. 25 Ua rave ihora te mau pǐpǐ ia ˈna, tuu atura i raro na te pae aua i te rui i roto i te hinai. 26 E tae atura Saulo i Ierusalema, ua tamata ˈtura oia i te taati atu i te mau pǐpǐ ra, mǎtaˈu anaˈe ihora ratou ia ˈna, aore i faaroo e, e pǐpǐ oia. 27 Ua rave aˈera Baranaba i tana rima, aratai atura ia ˈna i te mau aposetolo ra, ua faaite atura ia ratou i to ˈna iteraa i te Fatu i te aratia ra, e tana parauraa mai ia ˈna ra, e tana aˈoraa i Damaseko ma te iˈoa o Iesu aore roa i mǎtaˈu ra. 28 Amui atura oia ia ratou i te haereraa ˈtu i rapae, e te hoˈiraa mai i roto, i Ierusalema ra. 29 E aˈo atura oia i te iˈoa o te Fatu ra o Iesu ma te mǎtaˈu ore, e mârô atura oia i te mau Heleni ra, te titau maira hoi ratou ia ˈna e taparahi. 30 E ite aˈera te mau taeae ra, aratai atura ia ˈna i Kaisarea, e ua tono atura hoi ia ˈna i Tareso. 31 E hau atura to te mau ekalesia ra i reira e ati noa ˈˈe Iudea atoa e Galilea, e Samaria hoi; itoito atura, e te mǎtaˈu hoi i te Fatu i to ratou haerea, e ma te aˈo hoi a te Varua Maitai, rahi atura ratou.

32 Te haaati haere ra hoi Petero na taua mau vahi atoa ra, e haere atura oia i te feia moˈa e parahi i Luda ra. 33 E itea ˈtura ia ˈna te hoê taata i reira, o Ainea te iˈoa, ua pohe i te hapepa, a varu aˈera matahiti i te taoto-noa-raa i nia i te roi. 34 Ua parau atura Petero ia ˈna, E Ainea, te faaorahia maira oe e Iesu Mesia; a tia, a horahora i to roi: tia aˈera oia i reira ra. 35 Ua hiˈo maira to Luda e to Sarona ia ˈna, e ua fariu atura i te Fatu.

36 E te parahi ra te hoê pǐpǐ vahine i Iopa, o Tabita te iˈoa, (oia hoi Doreka ia faaauhia ra,) e rahi ta taua vahine ra ohipa maitai i rave, e te horoa hoi i te taoˈa. 37 E maˈihia ihora oia i taua pue mahana ra, e pohe atura; e oti aˈera oia i te horoihia, vaiiho atura ratou ia ˈna i roto i te piha i nia ra. 38 No te mea râ te fatata noa ra Luda i Iopa, e ite aˈera te mau pǐpǐ e, tei reira Petero, ua tono maira ratou i e toopiti pue taata e parau ia ˈna e haere i reira, eiaha e faaroaroa. 39 Ua tia aˈera Petero haere atura ratou atoa. E tae atura oia, ua aratai ratou ia ˈna i roto i taua piha i nia ra; ua tia noa maira te mau vahine ivi i pihai iho ia ˈna ma te oto, e te faaiteraa mai i te mau ahu fafao e te ahu pu i hamanihia e Doreka, ia ˈna i parahi e ratou atoa ra. 40 Ua tuu atura Petero ia ratou i rapae, ua tuu ihora i tana turi i raro, pure atura; ua fariu atura i taua tino ra, na ô atura, E Tabita, a tia. Araara aˈera tana mata, e ite aˈera ia Petero, tia aˈera i nia, parahi noa maira. 41 Ua rave atura Petero i tana rima, faatia roa aˈera i nia; ua parau atura i te mau vahine ivi ra, e te feia moˈa ra, ua pûpû atura ia ˈna ia ratou ra ua ora roa. 42 Itea papuhia ihora i Iopa atoa ra; e rave rahi tei faaroo i te Fatu. 43 Parahi noa ihora oia i Iopa e e rave rahi te mahana i ǒ te hoê taata rapaau iri ra o Simona te iˈoa.