Mataio

TE FAAHEMARAAHIA A TE MESIA RA.

4 E i arataihia Iesu e te Varua i te medebara ra ia faahemahia oia e te diabolo ra. 2 Ua haapae ihora oia i te maa e maha ahuru o te rui e maha hoi ahuru o te ao, e oti aˈera poia ihora oia. 3 Ua haere maira taua faahema ra, na ô maira ia ˈna, E Tamaiti oe na te Atua ra, a parau i teie nei mau ofai ia riro ei maa. 4 Ua parau atura râ oia, na ô atura, Ua papaihia, E ore te taata e ora i te maa anaˈe ra, i te mau mea atoa râ i haapaohia e te Atua. 5 Ua aratai atura te diabolo ia ˈna i te oire moˈa ra, e faatia ihora ia ˈna i nia iho i te poretiko o te hiero ra, 6 ua parau atura ia ˈna, E tamaiti oe na te Atua ra, e haamairi oe ia oe iho i raro; ua papaihia hoi e, E poroi oia i tana mau melahi ia oe, na ratou hoi e mau ia oe i to ratou rima, o te tiaia noa ˈtu to avae i te ofai. 7 Ua parau maira Iesu ia ˈna, Ua papai-atoa-hia e, Eiaha oe e aa i to Atua ra ia Iehova. 8 Ua aratai faahou atura te diabolo ia ˈna i nia i te hoê mouˈa teitei roa, e ua faaite maira ia ˈna i te mau basileia atoa i te ao nei e to ratou hinuhinu. 9 Ua parau maira ia ˈna, E horoa ˈtu vau i teie nei mau mea atoa ia oe na ia tipapa mai oe i raro e haamori mai ia ˈu. 10 Ua parau atura Iesu, E haere ê atu oe, e Satani; ua oti hoi i te papaihia, O to Atua o Iehova ta oe e haamori, e oia anaˈe ra ta oe e faaroo. 11 Faarue ihora te diabolo ia ˈna, e inaha, e mau melahi tei haere mai e ua tauturu maira ia ˈna.

12 E ite aˈera Iesu e ua tapeahia Ioane, haapai atura i Galilea; 13 faarue ihora i Nazareta, haere atura e parahi atura i Kaperenaumi i te oire i te pae roto ra, i te otia i te fenua o Zebuluna e Naphatali: 14 tia mau atura tei parauhia mai e te peropheta ra e Isaia i reira, i te na ôraa mai, 15 Te fenua o Zebuluna, e te fenua o Naphatali, i te pae Ioridana i te hiti roto, i Galilea i ǒ te Etene ra; 16 te feia i parahi i te pouri ra, ua hiˈo ïa i te maramarama rahi; e te feia i parahi i te vahi mǎrǔ pohe ra ua hitihia ratou e te maramarama.

17 I reira to Iesu haamataraa i te aˈo, i te na ôraa e, A tatarahapa, te fatata mai nei te basileia o te ao.

18 E te haere ra Iesu na te hiti i te roto i Galilea ra, hiˈo atura oia i e toopiti pue taata, i te tuaana ia Simona, o tei parauhia ia Petero ra, e i te taeae ia Anederea, te tuu ra i te upeˈa i taua roto ra, e pue ravaai hoi raua. 19 Ua parau atura oia ia raua, A pee mai ia ˈu, e faariro vau ia orua ei ravaai taata. 20 Faarue ihora raua i ta raua tau upeˈa i reira ra e ua pee atura ia ˈna. 21 E te haere noa ˈtura oia, ite atura i e toopiti â pue taata, o Iakobo a Zebedaio ra e tana taeae o Ioane, tei nia i te bǒti e to raua metua o Zebedaio, te ene ra i ta ratou mau upeˈa, ua parau atura oia ia raua. 22 Faarue ihora raua i te bǒti i reira ra e to raua metua, pee atura ia ˈna.

23 Haere atura Iesu na Galilea atoa e ati aˈe, i te haapiiraa i roto i to ratou mau sunago ra, e te aˈoraa i te parau maitai o te basileia, e te faaoraraa i te mau maˈi e te mau pohe atoa o te taata ra.

24 Parare atura to ˈna roo e ati roa aˈera Suria, e ua hopoi maira ratou i te feia maˈi atoa ia ˈna ra, o tei pohe i tera maˈi, i tera maˈi, e te mauiui, e tei uruhia e te demoni ra, e te lunati, e te hapepa, ua faaora ˈtura oia ia ratou atoa. 25 E tiaa rahi tei pee mai ia ˈna no Galilea mai, e no Dekapoli, e no Ierusalema, e no Iudea, e no te pae Ioridana ra.