Mataio

TE AˈORAA I NIA I TE MOUˈA RA.

5 E ite atura Iesu i te rahi o te taata, haere atura oia i nia i te mouˈa: parahi ihora i raro, e ua haere maira ta ˈna mau pǐpǐ i pihai iho ia ˈna. 2 Ua parau atura tana vaha, haapii atura ia ratou, na ô atura, 3 E ao to tei haehaa te aau, no ratou hoi te basileia ra o te ao. 4 E ao to tei oto; e faaoaoahia hoi ratou. 5 E ao to tei mǎrû; e riro hoi ia ratou te fenua. 6 E ao to tei hiaai i te maitai; e faaîhia hoi ratou. 7 E ao to tei aroha ia vetahi ê ra; e aroha-atoa-hia mai ratou. 8 E ao to tei mâ te aau; e ite hoi ratou i te Atua. 9 E ao to tei faatupu i te parau hau ra; e parauhia ratou i te tamarii na te Atua. 10 E ao to tei hamani-ino-hia i te parau-tia ra; no ratou hoi te basileia ra o te ao. 11 E ao to outou ia faaino mai, e ia hamani ino mai, e ia pari haavare noa mai te taata ia outou i te mau ino atoa nei, no ˈu. 12 A oaoa, e ia ouˈauˈa noa i te oaoa; e utua rahi hoi ta outou i te ao ra: i na reira hoi ratou i te hamani ino i te mau peropheta ra, o mua ïa ia outou.

13 O outou te miti no te fenua: area ia maˈaro te miti ra, eaha te mea e taitai faahou ai? ua riro ïa ei mea faufaa ore, e faaruehia ïa, e e taataahihia e te avae taata. 14 O outou te maramarama o teie nei ao. E oire faatiahia i nia i te mouˈa ra, eita ïa e moe. 15 E ore hoi te taata nei e tutui i te lamepa a tuu ai i raro aˈe i te farii, ei nia râ i te vairaa ra; ia maramarama to te fare atoa ra. 16 Oia atoa to outou maramarama, ia anaana ïa i mua i te aro o te taata nei, ia hiˈo ratou i ta outou parau maitai, e ia haamaitai i to outou Metua i te ao ra.

17 Eiaha e manaˈo e i haere mai au e faaore i te ture e te mau peropheta; aore au i haere mai e faaore, e faatia râ. 18 Oia mau ta ˈu e parau atu ia outou nei, e mou aˈe te raˈi e te fenua atoa, i te hoê iota e te hoê vahi iti o te ture nei, eita ïa e mou e ia hope roa i te tupu. 19 E teie nei, o te faahapa e o te haapii ia vetahi ê ia faahapa i te parau iti haihai roa i teie nei mau ture, e parauhia oia i te iti roa i te basileia o te ao; area te haapao e ua haapii i taua mau parau nei, e parauhia oia i te rahi i te basileia o te ao. 20 E faaite atu râ vau ia outou, Ia ore ta outou parau-tia ia hau i te parau-tia a te mau papai parau e te mau Pharisea ra, e ore roa outou e ô i te basileia ra o te ao.

21 Ua faaroo hoi outou e i parau-hia mai te feia tahito ra e, Eiaha oe e taparahi i te taata: e O te taparahi i te taata ra, e au ia ˈna te haavaraa; 22 te parau atu nei râ vau ia outou, O te taata i riri noa i to ˈna taeae, e au atoa ia ˈna te haavaraa; e o te parau atu i to ˈna taeae, e Raka, e au ïa ia ˈna te sunederi; area o te parau atu e, e More, e au ia ˈna te auahi i gehena. 23 E teie nei ia hopoi oe i ta oe taoˈa horoa noa i te fata ra, e ua manaˈo ihora oe i reira, e e hara ta to taeae ia oe na; 24 e vaiiho atu i to taoˈa i mua i te fata ra, e mata na i te haere e faite i to taeae, a haere a hopoi ai i ta oe taoˈa. 25 Ia peepee oe i te faaau i te parau i to taata tarahu, i to orua haerea na te aratia; o te tuu atu te taata tarahu ia oe i te haava ra, e o te tuu hoi te haava ia oe i te taata toroa ra, e hurihia ˈtura oe i roto i te tapearaa ra. 26 E parau mau ta ˈu e parau atu ia oe na, E ore roa oe e tuua mai e ia hoo na roa ia oe te koderane iti hopea ra.

27 Ua faaroo hoi outou, e i parauhia mai te feia tahito ra e, Eiaha oe e faaturi. 28 Te parau atu nei râ vau ia outou, O te hiˈo noa ˈtu i ta vetahi ê ra vahine ei faatupu i te hinaaro, ua faaturi ïa ia ˈna i to ˈna ihora aau. 29 E te hapa na oe i to mata atau, e ohiti e faarue ê atu, e maitai hoi oe ia pohe te hoê melo o oe ra, i to tino atoa ia hurihia i gehena. 30 E te hapa ra oe i to rima atau, e tâpû e faarue ê atu, e maitai hoi oe ia pohe te hoê melo o oe ra, i to tino atoa ia hurihia i gehena. 31 I parauhia hoi, O te hinaaro i te haapae i tana vahine, e tuu atu oia i te parau haapae ia ˈna ra. 32 Te parau atu nei râ vau ia outou. O te haapae noa i tana vahine e ere i to te faaturi, ua faariro ïa oia ia ˈna ei faaturi; e o te faaipoipo i tei haapaehia ra, ua faaturi atoa ïa.

33 E ua faaroo hoi outou e i parauhia mai te feia tahito ra, Eiaha oe e faahapa i ta oe tǎpǔ, e faatupu râ i ta oe i tǎpǔ ia Iehova ra. 34 Te parau atu nei râ vau ia outou, Eiaha roa e tǎpǔ; eiaha i te raˈi ra, o to te Atua ïa terono; 35 eiaha atoa i te fenua, o to ˈna ïa taahiraa avae; eiaha i Ierusalema, o te oire ïa o te Arii rahi; 36 eiaha atoa e tǎpǔ i to oe iho upoo, eita hoi e tia ia oe ia faaereere e ia faateatea i te hoê io rouru. 37 Ia riro râ ta outou oia ei oia, e ta outou aita ei aita, ia parau ra; te vai atura te parau, no roto ïa i te ino.

38 Ua faaroo hoi outou e i parauhia mai i tahito ra, E mata ra, ei mata ïa hoo, ei niho ra, ei niho ïa. 39 Te parau atu nei râ vau ia outou, Eiaha e patoi atu i te taata hamani ino: o te moto mai i to papariˈa atau na, e fariu atoa ˈtu i te tahi. 40 E ia haava mai te hoê taata ia oe i te ture e rave i to ahu oomo ra, e tuu atoa ˈtu i to pereue. 41 E o te faaue mai ia oe e haere i te hoê maile, e haere atoa orua e ia piti noa ˈtu. 42 E horoa ˈtu i tei ani mai ia oe ra; e o te tipee mai ia oe ra, eiaha e faahoˈi-noa-hia ˈtu.

43 Ua faaroo hoi outou e i parauhia mai i tahito ra, E aroha ˈtu oe i to taata-tupu, e e riri atu i to enemi. 44 Te parau atu nei râ vau ia outou, E aroha ˈtu i to outou mau enemi; e faaora ˈtu i tei tuhi mai ia outou; e hamani maitai atu i te feia i riri mai ia outou; e pure hoi no te feia i parau ino mai e tei hamani ino mai ia outou; 45 ia riro outou ei tamarii na to outou Metua i te ao ra; te faahiti nei hoi oia i to ˈna mahana i nia i te ino e te maitai, e te haamairi mai nei oia i te ûa i nia i te parau-tia e te parau-tia ore. 46 O tei aroha mai ia outou, o ta outou ïa e aroha ˈtu, eaha ta outou utua i reira? e ere anei te na reira atoa nei te mau telona? 47 E o to outou mau taeae anaˈe ra ta outou e ite atu, eaha ta outou vahi hau i reira? e ere anei te na reira atoa nei te mau telona? 48 Ia maitai roa hoi outou mai to outou Metua i te ao e maitai roa ra.