Mataio

TE BAPETIZORAA A IOANE RA.

3 E i te reira ra anotau ua haere maira Ioane Bapetizo, i te poro haerea i te medebara i Iudea ra, 2 i te na ôraa e, E tatarahapa outou; te fatata mai nei hoi te basileia o te ao. 3 Oia hoi teie o tei parauhia mai e te peropheta ra e Isaia, a na ô mai ai ra e, E reo no te hoê i te tiaororaa i te medebara, E haamaitai outou i te eˈa o te Fatu, e faatitiaifaro i to ˈna haerea, 4 huruhuru kamela to Ioane ahu, i tatuahia to ˈna tauupu i te iri puaa, akaride e te meli o te fenua aihere ta ˈna maa.

5 Haere atura to Ierusalema ia ˈna ra, e to Iudea atoa, e te fenua atoa i te pae Ioridana ra. 6 E bapetizohia ihora e ana i Ioridana ma te faˈi i ta ratou hara. 7 Ia hiˈo atura râ oia i te mau Pharisea e rave rahi, e te mau Sadukea i te haereraa mai ia ˈna ra ia bapetizohia, ua parau atura oia ia ratou, E te mau fanauˈa ehidena e! na vai i faaara ia outou e e maue ê atu i te pohe e fatata mai nei? 8 A tuu mai na i te parau e au i te tatarahapa; 9 eiaha e manaˈo i roto ia outou iho e, E metua to matou o Aberahama; e parau atu vau ia outou, e tia i te Atua ia faatupu i te tamarii na Aberahama no roto i teie nei mau ofai. 10 Te vai nei hoi te opahi i te tumu raau i teie nei â, e te mau raau atoa aore i hotu mai i te huero maitai ra, e tâpûhia ïa e e hurihia i roto i te auahi. 11 O vau nei, te bapetizo nei ïa ia outou i te pape ia tatarahapa outou, oia râ o te haere mai i muri iho ia ˈu nei, e mana rahi to ˈna i to ˈu, e ore au e au ia hopoi i to ˈna tamaa; e bapetizo ïa oia ia outou i te Varua Maitai e te auahi. 12 Tei to ˈna rima ta ˈna tahiri, e tamâ maite oia i ta ˈna papairaa, e haaputu oia i tana sitona i roto i te vairaa sitona, area te ota e tutui oia i te reira i te auahi pohe ore.

13 Ua haere maira Iesu i Ioridana mai Galilea mai ia bapetizohia oia e Ioane. 14 Faaore atura râ Ioane, na ô atura, O vau hoi ta oe e bapetizo e tia ˈi, e te haere mai na oe ia ˈu nei! 15 Ua parau maira Iesu ia ˈna, na ô maira, A tuu noa mai na; e na reira hoi tatou i te faatia i te mau parau-tia atoa e au ai. Ua tuu atura oia. 16 E oti aˈera Iesu i te bapetizohia, haere maira oia i nia mai raro mai i te pape, e inaha, vetea aˈera te raˈi ia ˈna, hiˈo aˈera oia i te Varua o te Atua i te pouraa mai mai te uupa ra, e te tauraa mai i nia iho ia ˈna: 17 e inaha, o te reo maira no te raˈi mai, i te na ôraa mai e, Tau Tamaiti here teie, ua mauruuru roa vau ia ˈna.