Mataio

TE MAU TAATA PAARI I TE IMIRAA I TE MESIA.

2 E ia fanau Iesu i Bete-lehema i Iudea ra, i te hau o te arii ra o Heroda, inaha, e taata paari tei haere mai i Ierusalema mai te hitia o te râ mai, e ua ui maira, 2 Teihea te Arii fanau apî o te ati Iuda nei? ite aˈenei hoi matou i to ˈna fetia i te hitia o te râ, i haere mai hoi matou e tahopu ia ˈna. 3 E ite aˈera te arii ra o Heroda i taua parau ra, aehuehu roa aˈera oia e to Ierusalema atoa. 4 E haaputuputuhia maira e ana te autahuˈa rarahi atoa, e te mau papai parau a te taata atoa ra, ua ui atura oia ia ratou i te vahi e fanau ai te Mesia. 5 Ua parau maira ratou ia ˈna, Ei Bete-lehema Iudea nei e fanau ai: o tei papaihia ïa e te peropheta ra, 6 e o oe hoi, e Bete-lehema, i te fenua o Iuda nei, aore roa oe i iti roa i roto i te mau oire arii o Iuda, e na roto mai ia oe te hoê Tavana, e na ˈna e aratai i to ˈu nei taata ia Iseraela. 7 Ua tii huna ˈtura Heroda i te mau taata paari ra, ui papu atura oia ia ratou i te faraa mai o taua fetia ra. 8 Ua tono atura ia ratou i Bete-lehema, na ô atura, A haere a maimi maite i taua tamaiti iti ra; e ia itea ˈtu ia outou, e hoˈi mai e faaite ia ˈu, ia haere atoa vau e tahopu ia ˈna. 9 E ite aˈera ratou i te parau a te arii, haere atura ratou; e inaha! te fetia i itea ia ratou i te hitia o te râ ra, na mua ˈtura ia ratou e tae roa ˈtura i nia iho i te parahiraa o taua tamaiti iti ra, faaea ihora. 10 Rahi roa ˈtura to ratou oaoa i te ite-faahou-raa ratou i taua fetia ra.

11 E tae atura ratou i roto i te fare, ite atura ratou i taua tamaiti iti ra e tana metua vahine o Maria; tipapa ihora i raro, tahopu atura ia ˈna: ua iriti aˈera i ta ratou taoˈa, hopoi atura i te ô na ˈna, i te auro, e te tapau libano e te mura. 12 E i aˈo faaheitaotohia mai ratou e te Atua eiaha e hoˈi ia Heroda ra, haere atura ratou i to ratou iho fenua na te tahi eˈa ê. 13 E reva ˈtura ratou, inaha, ua fa maira te hoê melahi a te Fatu, faaheitaoto maira ia Iosepha, na ô maira, A tia a rave i te tamaiti iti e tana metua vahine, a maue i Aiphiti, ei reira parahi ai e ia parau atu vau ia oe ra: e imi hoi Heroda i te tamaiti iti na e taparahi. 14 Ua tia aˈera oia, rave ihora i te tamaiti iti e te metua vahine, haere atura i Aiphiti i te rui; 15 parahi atura i reira e tae aˈera i te poheraa o Heroda: tia mau atura ta te Fatu i parau mai i te vaha o te peropheta ra, a na ô mai ai ra, I toina e au tau tamaiti i Aiphiti.

16 E ite aˈera Heroda e ua faahemahia oia e te mau taata paari ra, riri roa aˈera oia; tono atura i te taata e taparahi atura i te mau tamarii tamaroa atoa i Bete-lehema, e te mau vahi atoa i reira iho, o tei tae i te piti o te matahiti ra e tei ore, mai te taime mai â ta ˈna i ui papu i te mau taata paari ra. 17 Tia mau atura i reira te parau a te peropheta ra a Ieremia, a na ô mai ai ra e, 18 E reo tei itea i Rama, e auê, e te oto, e te mihi rahi; o Rahela i te hearaa i ta ˈna mau tamarii, e aore roa i nâ, no te mea aita ra ratou.

19 Ia pohe râ Heroda, inaha, ua fa maira te hoê melahi a te Fatu, faaheitaoto maira ia Iosepha i Aiphiti, 20 na ô maira, A tia, a rave i te tamaiti iti e te metua vahine, a hoˈi i te fenua o Iseraela; ua pohe hoi tei titau mai e taparahi i te tamaiti na. 21 Ua tia aˈera oia, rave ihora i te tamaiti iti e te metua vahine, hoˈi maira i te fenua o Iseraela. 22 Ia ite râ oia e o Arehelau te ono i tana metua ïa Heroda i te hau i Iudea ra, mǎtaˈu ihora oia ia haere i reira: i aˈo faaheitaotohia mai râ oia e te Atua, ohipa ê atura i te pae au i Galilea; 23 tae atura i te hoê oire o Nazareta te iˈoa, parahi ihora i reira: tia mau atura te parau a te mau peropheta ia Iesu ra, e e parauhia oia e no Nazareta.