Mataio

TO IESU RUURUURAAHIA E TE TUURAAHIA ˈTU IA PILATO.

27 E poipoi aˈera, ua apoo ihora te mau tahuˈa rarahi atoa e te feia paari o te fenua ra Iesu e taparahi ia ˈna. 2 E oti aˈera oia i te ruuruuhia e ratou, ua aratai atura ratou ia ˈna, tuu atura i te tavana ia Ponotio Pilato ra.

3 E ite aˈera Iuda i haavare ia ˈna ra, e ua faahapahia oia, ua tatarahapa ihora, faahoˈi atura i na moni ario e toru ahuru i te mau tahuˈa rarahi e i te feia paari ra, 4 na ô atura, Ua hara vau, o vau i tuu i te taata hara ore nei. Ua na ô maira ratou, Eaha ta matou i tena? tei ia oe iho tena. 5 Faarue ihora oia i te moni i raro i roto i te hiero, haere ê atura i rapae, taave ihora ia ˈna iho. 6 Ua rave ihora te mau tahuˈa rarahi i taua moni ra, na ô aˈera, E hoo toto teie, eita e au i te ture ia tuu i roto i te pueraa moˈa nei. 7 Ua feruriruri ihora ratou, e ua hoo atura i te maa fenua o te potera ra ei tanuraa taata ěê. 8 I parauhia ˈi te reira maa fenua, Te fenua toto e tae roa aˈenei i teie nei mahana. 9 Tia ˈtura te parau a te peropheta ra a Ieremia, a na ô ai ra e, Ua rave ihora ratou i na moni ario e toru ahuru, te hoo no tei hoohia ra, ta te tamarii a Iseraela i faaau ra; 10 o tei hopoihia ïa e ratou ei hoo i te maa fenua o te potera ra, mai ta Iehova i faaue mai ia ˈu ra.

11 Tia ˈtura Iesu i mua i te aro o te tavana ra; ua ui maira te tavana ia ˈna, na ô maira, O te arii maori oe o te ati Iuda? Ua parau atura Iesu ia ˈna, E parau mau ta oe i parau mai na. 12 Ia parihia maira oia e te mau tahuˈa rarahi e te feia paari, aore oia i parau noa ˈtu. 13 Ua parau maira Pilato ia ˈna, Aita oe i faaroo aˈe i te rahi o te hara ta ratou i pari mai ia oe nei? 14 Aita roa râ oia i parau noa ˈtu i taua mau parau atoa ra; maere roa ˈtura te tavana.

15 E peu hoi na te tavana i te tuu i te hoê taata tapeahia ia tae i taua oroa ra, o te taata ta ratou i hinaaro ra. 16 Te vai ra te hoê taata paroo i te hara, ua tapeahia i reira, o Baraba te iˈoa. 17 E putuputu maira te taata, ua parau atura Pilato ia ratou, O vai ta ˈu e tuu atu ia outou na? O Baraba anei, e o Iesu anei o tei parauhia, o te Mesia ra? 18 Ua ite hoi oia e no te feii i tuu mai ai ratou ia ˈna. 19 E te parahi ra oia i nia iho i te haavaraa ra, ua tono maira tana vahine i te vea e parau ia ˈna e, Eiaha roa oe e rave iti noa ˈtu i tena na taata parau-tia, e ati rahi hoi to ˈu i te moemoea ia ˈna i nauanei. 20 Ua fafau atura râ te mau tahuˈa rarahi e te feia paari i te parau i te mau taata ra ia ani ratou ia Baraba, e ia taparahihia Iesu. 21 Ua parau maira te tavana ia ratou, na ô maira, O teihea i taua na taata toopiti nei ta ˈu e tuu atu ia outou na? Ua parau atura ratou, o Baraba. 22 Ua parau maira o Pilato ia ratou, Eaha hoi au ia Iesu i tei parauhia, o te Mesia nei? Ua parau atura ratou atoa ia ˈna, Ia faasataurohia ïa. 23 Ua na ô maira te tavana, Eaha i na reirahia ˈi, eaha ta ˈna hara i rave? Rahi roa ˈtura râ to ratou pii, na ô atura, Ia faasataurohia ïa.

24 E ite aˈera Pilato e, e ore roa ta ˈna e tupu, te auě noa ra râ te taata, ua rave ihora oia i te pape, horoi ihora i tana rima i mua i taua feia rahi atoa ra, na ô maira, Aita a ˈu hara i te toto o teie nei taata parau-tia: ei ia outou te reira. 25 Ua parau atura te taata atoa, na ô atura, Ei nia ia matou to ˈna toto e ei nia i to matou tamarii. 26 Ua tuu maira oia ia Baraba ia ratou ra, papai ihora oia ia Iesu, e oti aˈera, ua tuu maira ia faasataurohia.

27 Ua aratai atura te mau faehau o te tavana ia Iesu i roto i te peraitoio, ua haaputu atoa maira te pǔpǔ faehau atoa ia ˈna ra. 28 Ua tatara ihora ratou i to ˈna ahu, faaahu maira ia ˈna i te ahu uteute. 29 Ua fatu ihora ratou i te hei raau taratara, e ua faahei maira ia ˈna, ua tuu maira i te aeho i tana rima atau, tuu ihora i te turi i raro i mua ia ˈna ma te tâhitohito, na ô maira, Ia ora na, e te Arii o te ati Iuda e! 30 Ua tufa maira i te huare i nia ia ˈna, rave maira i taua aeho ra, tairi maira i tana upoo. 31 E oti aˈera ta ratou tâhitohitoraa ia ˈna, ua iriti aˈera ratou i taua ahu ra, faaahu ihora ia ˈna i to ˈna iho ahu, aratai atura ia ˈna e faasatauro. 32 E te haere atura ratou i rapae au i te oire, farerei atura ratou i te hoê taata no Kurene, o Simona te iˈoa, ua faahepo atura ratou ia ˈna e hopoi i ta ˈna satauro. 33 E tae atura ratou i te vahi i parauhia ra, O Gologota, oia hoi te vairaa apu upoo ra. 34 Ua hopoi atura ratou i te vinega i anoihia i te raau avaava ia ˈna ra e inu; ia tamata râ oia, aita aˈera i inu. 35 E oti aˈera oia i te patitihia e ratou i te auri i nia i te satauro, ua tufa kelero ihora ratou i to ˈna ahu: tia ˈtura i reira te parau a te peropheta e, Ua tufa ihora ratou i tau ahu no ratou, e ua tuu kelero ihora i tau ahu pu. 36 Parahi ihora ratou i raro, tiai ihora ia ˈna: 37 ua tuu atura ratou, i te pariraa i papaihia ra i nia ˈˈe i tana upoo, O Iesu teie o te Arii o te Ati Iuda ra. 38 E o e toopiti pue eiâ haru tei faasatauro-atoa-hia, i te rima atau te hoê, i te rima aui hoi e tahi.

39 E te feia i haere na reira ihora, ua tâhitohito maira ïa ma te ueue i to ratou upoo, 40 na ô maira, E te vavahi i te hiero e, e ua rui toru anaˈe ua tia faahou, a faaora ia oe iho na. O ta te Atua Tamaiti oe na, a pou mai i raro faarue atu i te satauro. 41 Ua tâhitohito atoa maira te mau tahuˈa rarahi, e te mau papai parau, e te feia paari, ia ˈna na ô maira, 42 Ua faaora oia ia vetahi ê; eita e tia ia faaora ia ˈna iho. O te arii oia o Iseraela nei ra, a pou mai oia i teie nei faarue atu i te satauro, e na tatou e faaroo atu ia ˈna. 43 I tiaturi hoi oia i te Atua, e te ite maira te Atua ia ˈna, a faaora oia ia ˈna i teie nei; ua parau hoi oia e, E Tamaiti au na te Atua. 44 Na taata eiâ haru hoi i faasatauro-atoa-hia ra, ua na reira atoa i te tâhitohito mai ia ˈna.

45 Ati ihora taua fenua atoa ra i te pouri, mai te hora ono mai â e tae roa aˈera i te hora iva. 46 E tae aˈera i te hora iva, ua pii hua ˈtura Iesu, na ô atura, Eli, Eli, lama sabakatani! teie hoi te auraa, E tau Atua, e tau Atua, eaha oe i faarue mai ai ia ˈu? 47 E ia faaroo aˈera te tahi pae i tia noa i reira iho i taua parau ra, ua na ô aˈera, Te tiaoro nei teie nei taata ia Elia. 48 Ua horo atura te hoê o ratou i reira ra, rave atura i te rimu, uhi ihora i roto i te vinega, tuu ihora i nia iho i te aeho, hopoi atura na ˈna e inu. 49 Ua na ô aˈera te tahi pae, Eiaha, a hiˈo na tatou ia Elia i te haereraa mai e faaora ia ˈna. 50 Ua pii faahou atura Iesu ma te reo rahi, e ua tuu atura i te varua.

51 E inaha, ua mahae ihora te paruru o te hiero ra, mai nia mai â e raro roa, ua aueue ihora te fenua, e amahamaha ihora te mato: 52 maheu aˈera te mau menema; e ua tia maira te tino o te feia moˈa i taoto ra e rave rahi, i muri aˈe i tana tia-faahou-raa i nia ra, 53 e ua haere maira ratou mai raro mai i te apoo, haere atura i roto i te oire moˈa ra, e itea ihora e te taata e rave rahi. 54 Ite aˈera te raatira hanere, e ratou atoa i tiai ia Iesu ra, i te fenua i te aueueraa, e te mau mea atoa i te tupu ra, roohia ihora ratou i te mǎtaˈu rahi, ua na ô ihora, O te Tamaiti mau â teie na te Atua.

55 E rave rahi hoi te vahine i reira, tei te atea ê i te hiˈoraa mai, o tei pee mai ia Iesu mai Galilea maira, o tei turu mai ia ˈna ra: 56 o Maria Magadala te hoê, e o Maria te metua vahine o Iakobo raua o Iose ra, e te metua vahine hoi o na tamarii a Zebedaio ra.

57 E ahiahi ihora, ua haere maira te hoê taata taoˈa no Arimataio, e pǐpǐ iho na Iesu, o Iosepha te iˈoa: 58 haere atura oia ia Pilato ra, ua ani atura i te tino o Iesu. Ua faaue atura Pilato ia tuuhia mai te tino ia ˈna ra. 59 Ua rave atura Iosepha i te tino, viri ihora i te ahu parupape maitai ra; 60 ua tuu atura i roto i to ˈna iho menema apî, i paohia e ana i roto i te mato; huri atura i te hoê ofai rahi i te uputa o taua menema ra, haere atura. 61 I reira hoi Maria i Magadala, e te tahi Maria hoi, i te parahiraa i mua mai i taua menema ra.

62 E ao aˈera, i muri aˈe i te mahana faaneheneheraa ra, ua haaputuputu atoa maira te mau tahuˈa rarahi e te mau Pharisea i Pilato ra, 63 na ô maira, E te tavana, te manaˈo nei matou i te parau a taua taata haavare nei i te oraraa ra e, E tia faahou vau i nia ia tae i te rui toru. 64 E teie nei, e parau aˈe oe ia tiaihia te menema e ia rui toru aˈe, oi tii mai ta ˈna mau pǐpǐ e eiâ ia ˈna i te rui, a parau ai i te taata e, Ua tia faahou oia mai te pohe mai; e ino rahi atura to te reira haavare hopea i tei mutaa iho. 65 E parau atura Pilato ia ratou, E tiai hoi to outou, a haere a rave itoito i taua menema ra ta outou i hinaaro na. 66 Haere atura ratou, rave itoito ihora i taua menema ra, tapao atura i te ofai, tuu atura i te tiai.