Mataio

TE TIA-FAAHOU-RAA O TE MESIA.

28 E oti aˈera te sabati, ia tae ra i te aahiata i te mahana matamua o te hebedoma ra, ua haere maira Maria i Magadala e te tahi Maria hoi e hiˈo i te menema. 2 E inaha, i rahi iho nei te aueue o te fenua, ua pou mai hoi te hoê melahi a te Fatu mai te raˈi mai, e ua huri ê atura i te ofai i te uputa ra, e parahi ihora i nia iho. 3 Mai te uira ra tana mata, e to ˈna ahu mai te hiona ïa i te teatea: 4 rurutaina ihora te mau tiai i te mǎtaˈu i te hiˈoraa ˈtu ia ˈna, riro atura mai te taata pohe ra te huru. 5 Ua parau maira râ te melahi i taua pue vahine ra, Eiaha orua e mǎtaˈu, ua ite hoi au e te imi nei orua ia Iesu i faasataurohia nei. 6 Aore oia i ǒ nei, ua tia faahou aˈenei ïa, ta ˈna i faaite atea maira. A haere mai na, a hiˈo i te vairaa o te Fatu ra. 7 A haere oioi na orua a parau atu i ta ˈna mau pǐpǐ, e ua tia faahou oia mai te pohe mai, e inaha te haere atura oia na mua ia outou i Galilea, ei reira outou e ite ai ia ˈna. A haapao na: ua faaite atu vau ia orua. 8 Faarue maira raua i te menema i reira ra ma te mǎtaˈu e te oaoa rahi, horo atura e faaite i ta ˈna mau pǐpǐ.

9 E te haere atura raua e faaite i ta ˈna mau pǐpǐ, e inaha, ua farerei atura Iesu ia raua, na ô maira, Ia ora na. Ua faafatata ˈtura raua, tapea ˈtura i tana avae, tahopu atura ia ˈna. 10 Ua na ô maira Iesu ia raua, Eiaha e mǎtaˈu; a haere a parau atu i tau mau taeae e haere ratou i Galilea, ei reira ratou e ite mai ai ia ˈu.

11 E tei te revaraa ˈtu raua ra, inaha, ua haere maira te tahi pae tiai i roto i te oire, ua faaite maira i te mau tahuˈa rarahi i te mau mea atoa i tupu ra. 12 Ua haaputuputu ihora ratou e te feia paari, ua apoo ihora, tuu atura i te moni rahi na te mau faehau, 13 na ô atura, E parau outou e, Na ta ˈna iho mau pǐpǐ i tii mai e i eiâ ia ˈna i te po te taoto ra matou. 14 E ia tae noa ˈtu teie nei parau i te tariˈa o te tavana ra, na matou ïa e taparu atu ia ˈna, e ora outou. 15 Ua rave ihora ratou i taua moni ra, e haapao atura i tei parauhia mai ia ratou ra. E te taua-parau-hia nei â taua parau ra e te ati Iuda atoa i teie nei mahana.

16 Haere atura te mau pǐpǐ tino ahuru ma hoê ra i Galilea, i te hoê mouˈa ta Iesu i parau mai ia ratou ra. 17 E ite aˈera ratou ia ˈna ua tahopu atura: i maere noa na râ te tahi pae. 18 Ua faafatata maira Iesu, na ô maira ia ratou, O te mana atoa i te raˈi e te ao atoa nei ua pûpûhia mai tei ia ˈu anaˈe. 19 E teie nei, e haere outou e faariro i te mau fenua atoa ei pǐpǐ, a bapetizo atu ai ia ratou i roto i te iˈoa o te Metua, e no te Tamaiti, e no te Varua Maitai; 20 ma te haapii atu ia ratou i te haapao i te mau mea atoa ta ˈu i parau atu ia outou na: e inaha, tei pihai atoa iho ïa vau ia outou, e tae noa ˈtu i te hopea o teie nei ao. Amene.