Mataio

TE FEIA MANA I TE APOORAA IA IESU RA.

26 E ia faaoti aˈera Iesu i teie nei parauraa, ua na ô maira i ta ˈna mau pǐpǐ, 2 Ua ite outou e e piti mahana toe i te pasa ra; ei reira te Tamaiti a te taata nei e tuuhia ˈi ia faasataurohia. 3 Ua putuputu maira te autahuˈa rarahi, e te mau papai parau, e te feia paari o te fenua ra i reira, i roto i te fare o te tahuˈa rahi ra o Kaiapha; 4 ua apoo ihora ratou i te ravea e noaa ˈi Iesu ia ratou ia haavare, a taparahi atu ai ia ˈna. 5 Ua na ô râ ratou, Eiaha i te oroa nei, o te nane noa hoi te taata.

6 Tei Betania Iesu tei te fare o Simona lepera ra, 7 ua haere maira te hoê vahine ia ˈna ra ma te piha alabata e monoˈi hauˈa, e mea taoˈa rahi, e ua ninii i nia iho i tana upoo i te amuraa maa ra. 8 Ite aˈera râ ta ˈna mau pǐpǐ ua riri ihora ratou, na ô aˈera, Eaha teie i haamauˈahia ˈi? 9 E moni rahi hoi te noaa i teie nei monoˈi ia hoo, a hopoi atu ai na te taata rii. 10 Ua ite ra Iesu i taua parau ra; e ua na ô atura ia ratou, Eaha outou i haapeapea noa mai ai i teie nei vahine? e ravea maitai hoi ta ˈna ia ˈu nei. 11 E tia mau â hoi te taata rii i ǒ outou nei, area vau e ore ïa e mau i ǒ outou nei. 12 E teie nei monoˈi ta ˈna i ninii mai i nia i tau tino nei, no to ˈu ïa tanuraa. 13 Oia mau ta ˈu e parau atu ia outou nei, Te mau vahi atoa e parauhia ˈi teie nei evanelia i te ao atoa nei, e parau-atoa-hia ïa ta teie nei vahine i rave iho nei ei manaˈoraa ia ˈna.

14 Haere atura te hoê o taua tino ahuru ma piti ra, o Iuda Isakariota te iˈoa, i te feia tahuˈa rarahi ra i reira ra, 15 ua parau atura, Eaha ta outou e horoa mai na ˈu, e na ˈu oia e tuu atu ia outou? Ua faito maira ratou i e toru ahuru moni ario na ˈna. 16 Mai reira mai â oia i te imiraa i te vahi maitai a tuu atu ai oia ia ˈna ia ratou ra.

17 E tae aˈera i te mahana matamua o te oroa i te maa faahopue-ore-hia ra, ua haere maira na pǐpǐ ia Iesu ra, na ô maira ia ˈna, Ei hea mauâ faanahonaho ai i te pasa na oe? 18 Ua parau atura oia, A haere i roto i te oire ia mea ra, a parau atu ai ia ˈna, Te tao maira te orometua, Ua fatata to ˈu taime, ei to fare na amu ai au i te pasa, e tau mau pǐpǐ atoa. 19 Ua na reira ˈtura na pǐpǐ ta Iesu i faaue ra, e ua faanahonaho ihora i te pasa. 20 E ahiahi ihora, taoto ihora oia i raro e te tino ahuru ma piti atoa i te amuraa maa ra. 21 E te amu noa ra ratou, ua na ô atura oia, E haavare mai te hoê o outou na ia ˈu, oia mau ta ˈu e parau atu ia outou na. 22 Taiâ roa ˈtura ratou, e ua tataitahi maite maira ratou atoa i te na ôraa mai ia ˈna, E te Fatu, o vau anei? 23 Ua parau atura oia, na ô atura, O te tuu i to ˈna rima e to ˈu atoa i roto i te auˈa nei, oia te haavare mai ia ˈu. 24 Te haere nei â hoi te Tamaiti a te taata nei i tei papaihia no ˈna ra; area taua taata e haavare mai i te Tamaiti a te taata nei, atae hoi oia! e maitai te reira taata ahiri aita i fanau mai. 25 Ua parau atoa maira Iuda tei haavare ia ˈna ra, na ô maira, E Rabi, o vau anei? Ua na ô atura oia ia ˈna, Oia ïa.

26 E te amu ra ratou, ua rave ihora Iesu i te pane, e oti aˈera i te haamaitai i te Atua, vavahi ihora, tuu atura i te mau pǐpǐ ra, na ô atura, A rave, a amu; o tau tino teie. 27 Ua rave ihora hoi oia i te auˈa, haamaitai atura i te Atua, tuu atura ia ratou ra, na ô atura, A inu outou atoa; 28 o to ˈu ïa toto, e toto no te faufaa apî, i haamaniihia no te taata e rave rahi ia matara te hara. 29 E faaite atu vau ia outou, Teie au a ore a inu faahou i to roto i te vine, e tae noa ˈtu i te mahana e inu ai au e outou atoa i te uaina apî o te basileia o tau Metua ra. 30 E oti aˈera te himene, haere atura ratou i rapae au i te mouˈa ra o Oliveta.

31 Ua parau atura Iesu ia ratou, I teie nei rui e maheaitu ai outou atoa ia ˈu; ua oti hoi i te papaihia e, E tairi au i te tiai, e e purara ê atu te nǎnǎ. 32 Ia tia faahou mai râ vau ra, e na mua vau ia outou i te haere i Galilea. 33 Ua parau maira Petero ia ˈna, na ô maira, Maheaitu noâ te taata atoa ia oe, e ore roa vau e maheaitu. 34 Ua na ô maira Iesu ia ˈna, Oia mau ta ˈu e parau atu ia oe nei, E ore e aaoa te moa i teie nei rui, a toru atura o oe hunaraa ia ˈu. 35 Ua parau atura Petero ia ˈna, Pohe noâ vau i ǒ na ia oe na, e ore roa vau e huna ia oe. Ua na reira hoi te mau pǐpǐ atoa.

36 Haere atura Iesu e ratou atoa i te hoê vahi, o Getesemane te iˈoa, ua na ô maira i te mau pǐpǐ, Ei ǒ nei na outou, e haere au i ǒ aˈera e pure. 37 Ua aratai atoa ˈtura ia Petero, e na tamarii a Zebedaio ra e toopiti, vehia ihora oia i te oto. 38 Ua parau maira oia ia ratou, Ua ati roa tau varua i te mauiui rahi pohe; e parahi i ǒ nei e ara tatou. 39 Haere atura oia i mua iti atu, tipapa ihora i raro ma te pure, na ô atura, E tau Metua e, ia tia ra, e hopoi ê atu i teie nei auˈa, ia tupu râ to oe hinaaro, eiaha to ˈu. 40 Ua hoˈi maira oia i taua mau pǐpǐ ra, e roohia mai te taoto ra ratou, ua na ô maira oia ia Petero, Oia tena, aita aˈera e tia ia outou ia ara tatou i te hora iti hoê nei? 41 E ara e e pure hoi, ia ore outou ia roohia e te ati; ua tia hoi i te varua, e paruparu râ to te tino. 42 Haere faahou atura oia, o te piti ïa o te haerea, pure ihora, na ô atura, E tau Metua e, aita roa e tuuraa ia ˈu, e inu â vau i teie nei auˈa e tia ˈi, ia tupu to oe hinaaro. 43 E ia hoˈi faahou mai oia ra, roohia mai te taoto râ ratou, ua teimaha hoi to ratou mata. 44 Vaiiho ihora oia ia ratou, haere faahou atura e pure, o te toru ïa hoê â pure. 45 Ua hoˈi faahou maira oia ia ta ˈna mau pǐpǐ ra, ua na ô maira ia ratou, E taoto noa ˈtu i tena, e ia aa maite, inaha ua fatata te hora e tuuhia ˈi te Tamaiti a te taata nei i te rima o te feia hara. 46 A tia, mai haere tatou; inaha! ua fatata mai nei te haavare ia ˈu nei.

47 E aitâ i oti taua parau na ˈna ra, inaha, o Iuda maira, te hoê o te tino ahuru ma piti ra, ma te tiaa rahi atoa, ma te ˈoˈe e te omore, i tonohia e te mau tahuˈa rarahi e te feia paari o te fenua ra. 48 Ua tuu na hoi taua haavare ra i te tapao ia ratou, na ô atura e, O te taata ta ˈu e hôˈi ra, oia ïa, o te haru ïa. 49 Ua haere maira oia i reira ia Iesu ra, na ô maira, E Rabi, ia ora na, e ua hôˈi maira ia ˈna. 50 Ua parau atura Iesu ia ˈna, E hoa, i haere mai oe i te aha? Ua faafatata maira ratou tei nia noa maira te rima ia Iesu, haru maira ia ˈna. 51 E inaha, ua rave ihora te hoê i ǒ Iesu ra i ta ˈna ˈoˈe, unuhi aˈera, tairi atura i te tavini o te tahuˈa rahi ra, motu ê atura te tariˈa. 52 Ua parau atura Iesu ia ˈna, A oomo i to ˈoˈe i roto i te vehî; o te rave hoi i te ˈoˈe ra, e pohe ïa i te ˈoˈe. 53 Aita oe i manaˈo e, e tia noa ia ˈu ia tau i tau Metua i teie nei, e na ˈna e horoa mai i te melahi e ia ahuru noa ˈtu te legeona e ia piti tiahapa e ia rahi atu â? 54 Eaha ihora râ e tupu ai te parau i papaihia ra i reira, o tei parau ra e ia tupu teie nei mau mea e tia ˈi? 55 I reira ra to Iesu parauraa ˈtu i taua feia rahi ra, E haere mai hoi outou ma te ˈoˈe e te raau e rave ia ˈu, mai te mea e, e eiâ? E tia vau i roto ia outou i te mau mahana atoa, i te haapiiraa i roto i te hiero ra, e aore outou i rave mai ia ˈu. 56 Ia tia râ te parau a te mau peropheta i papaihia ra i tupu ai teie. Faarue ihora te mau pǐpǐ atoa ia ˈna i reira ra, horo atura.

57 E te feia i haru ia Iesu ra, aratai atura ratou ia ˈna i te tahuˈa rahi ra ia Kaiapha, ua putuputu te mau papai parau e te feia paari i reira. 58 Ua pee atura Petero ia ˈna i muri ê atu, e te aumoa o te tahuˈa rahi ra, tomo atura i roto, parahi ihora e te mau tavini atoa ra, ia ite oia i te hopea. 59 Te imi ra te mau tahuˈa rarahi, e te feia paari, e te sunederi atoa, i te ite haavare ia Iesu, ia faahapa ˈtu ratou ia ˈna ia pohe; 60 aita râ i itea; e rave rahi ra te ite haavare i haere mai i pihai iho aita râ i tia ia ratou. E te hopea ihora ua haere maira e toopiti pue ite haavare, 61 na ô maira, I parau hoi teie nei taata, E tia ia ˈu ia vavahi i te hiero o te Atua nei, e ua rui toru anaˈe ua tia faahou ïa ia ˈu. 62 Ua tia aˈera te tahuˈa rahi i nia, ua na ô maira ia ˈna, Eita oe e parau? eaha teie ta teie nei pue taata i pari mai ia oe nei? 63 Te mamû noa ra râ Iesu. Ua parau maira te tahuˈa rahi ra ia ˈna, na ô maira, Te faatǎpǔ atu nei au ia oe i te Atua ora ra, e faaite mai oe ia matou, e o oe anei te Mesia, te Tamaiti a te Atua? 64 Ua parau atura Iesu ia ˈna, Oia mau ta oe e parau ra: e e faaite atu â hoi au ia outou, e ite outou a muri atu i te Tamaiti a te taata i te parahiraa i te rima atau o te Atua mana, e te haereraa mai na roto i te ata o te raˈi ra. 65 Ua hahae ihora te tahuˈa rahi ra i tana ahu, na ô atura, Ua faainaina Atua oia; eaha ˈtu â to tatou ite, inaha, ua ite hua outou i to ˈna faainaina Atua. 66 Eaha to outou na manaˈo? Ua parau maira ratou, na ô maira, E au ia ˈna te pohe. 67 Ua tufa ˈtura ratou i te huare i tana mata, moto atura hoi ia ˈna, poara ˈtura te tahi pae i te papariˈa, 68 na ô atura, A faaite mai na, e te Mesia e, i tei poara ˈtu ia oe na.

69 Te parahi noa ra Petero i rapae i roto i te aumoa ra, ua haere maira te hoê tavini vahine ia ˈna ra, na ô maira, I reira atoa hoi oe ia Iesu o Galilea ra. 70 Ua huna ihora râ oia i mua ia ratou atoa ra, na ô atura, Aore roa vau i ite i ta oe parau. 71 E reva ˈtura oia i rapae au i te uputa ra, ua hiˈo maira te hoê tavini vahine ia ˈna, ua na ô maira i tei pihai ihora, Ia Iesu o Nazareta atoa ra teie nei taata. 72 Ua huna faahou ihora oia ma te tǎpǔ, na ô atura, Aore au i ite i tena na taata. 73 E maoro iti aˈera, ua na ô maira tei tia i pihai ihora ia Petero, No ratou mau â oe, te itea nei hoi oe i to oe reo. 74 Ua horeo hua ihora oia ma te tǎpǔ, na ô aˈera, Aore au i ite i tena na taata. Ua aaoa ihora te moa i reira ra. 75 Ua manaˈo ihora Petero i te parau a Iesu i parau mai ia ˈna ra e, E ore e aaoa te moa, a toru aˈera o oe hunaraa ia ˈu. Haere atura oia i rapae, rahi roa ˈtura te oto.