Mataio

TE PARABOLE O TE MAU PARETENIA TINO AHURU RA.

25 E au te basileia o te ao i na paretenia tino ahuru i reira, tei rave i ta ratou mau lamepa e haere atura ia farerei i te tane faaipoipo apî ra. 2 E feia paari e toopae, e maamaa hoi e toopae. 3 O te feia maamaa ra, i hopoi atura i ta ratou mau lamepa, aita râ i hopoi atoa i te mori: 4 area te feia paari ra, ua hopoi i ta ratou mau lamepa ma te mori atoa i roto i ta ratou mau farii. 5 Te maoro ra râ taua tane faaipoipo apî ra, tiaruhe paatoa ihora ratou e mairi ihora te taoto. 6 E tae aˈera i te tuiraa po ra, o te pii maira, Inaha, te haere mai nei te tane faaipoipo apî nei, e haere outou ia farerei atu ia ˈna. 7 Ua tia aˈera te mau paretenia atoa ra i nia, ua faanehenehe ihora i ta ratou mau lamepa. 8 Ua parau atura te feia maamaa ra i te feia paari, Ho mai i te tahi vahi i ta outou mori na; te pohe nei hoi ta matou mau lamepa. 9 Ua parau maira râ te feia paari, na ô maira, Eiaha, o te ore hoi o te navai ia opere na tatou atoa; e haere râ outou i te feia hoo ra hoo atu ai i ta outou iho. 10 E te haere atura ratou e hoo ra, tae maira taua tane faaipoipo apî ra, e te feia i ineine ra, haere atura ïa e oia atoa i roto i te oroa faaipoiporaa, e opanihia ihora te uputa. 11 E i muri aˈera, ua haere maira te tahi pae paretenia ra, ua na ô maira, E te fatu, e te fatu, a iriti aˈe na ia matou. 12 Ua parau atura râ oia, na ô atura, Aore au i ite ia outou, oia mau ta ˈu e parau atu ia outou na. 13 E teie nei, e ara, aore hoi outou i ite i te mahana e te hora atoa e tae mai ai te Tamaiti a te taata.

14 E au hoi te Tamaiti a te taata nei i te hoê taata i opua i to ˈna tere, e ua parau atura i to ˈna iho mau tavini, tuu atura i ta ˈna taoˈa ia ratou. 15 Tuu atura oia i ta te tahi, e pae ïa taleni, e piti ta te tahi, hoê ta te tahi; i tei au atoa i taua na taata ra; reva ˈtura i to ˈna tere. 16 Haere atura tei rave i na taleni e pae ra, hoo haere atura i taua na taleni ra, e noaa maira na taleni ê e pae. 17 Mai te reira atoa tei rave i na taleni e piti ra, e noaa maira na taleni ê e piti. 18 Area tei rave i te hoê ra, haere atura ïa, heru atura i te repo, huna ihora i te moni a to ˈna fatu. 19 E maoro aˈera, hoˈi maira te fatu o taua mau tavini ra, faaau maira i te parau ia ratou. 20 Ua haere maira tei rave i na taleni e pae ra, hopoi atoa maira i na taleni ê e pae, na ô maira, E tau fatu, e pae a oe taleni i tuu mai ia ˈu; inaha, teie ïa, e na taleni ê hoi e pae i noaa ia ˈu nei. 21 Ua na ô atura tana fatu ia ˈna, Ua tia roa, e teie nei tavini maitai e te haavare ore; o oe i haapao maitai i tena na taoˈa iti haihai, e faatiaau atu vau ia oe i nia iho i te mea rahi: e haere oe i roto i te oroa oaoaraa a to fatu. 22 Ua haere atoa maira tei rave i na taleni e piti ra, na ô maira, E tau fatu, e piti a oe taleni i tuu mai ia ˈu; inaha, teie ïa, e na taleni ê hoi e piti i noaa ia ˈu nei. 23 Ua na ô atura tana fatu ia ˈna, Ua tia roa, e teie nei tavini maitai e te haavare ore, ua haapao maitai oe i tena na taoˈa iti haihai, e faatiaau atu vau ia oe i nia iho i te mea rahi: e haere oe i roto i te oroa oaoaraa a to fatu. 24 Ua haere maira hoi tei rave i te taleni hoê ra, na ô maira, E tau fatu, ua ite au e e taata iriâ oe, e ere i ta oe i tanu ra e ooti â oe, e ere hoi i ta oe i ueue ra e haaputu â oe; 25 mǎtaˈu aˈera vau haere atura, huna ihora vau i te taleni na oe i raro i te repo: inaha, i faahoˈi mai nei â vau i ta oe iho. 26 Ua parau atura tana fatu ia ˈna, na ô atura, E teie nei tavini ino e te faatau, ua ite oe e e ere i ta ˈu i tanu ra e ooti â vau, e ere i ta ˈu i ueue ra e haaputu â vau? 27 Eiaha hoi oe e hopoi i tau moni i te hooraa ra, e ia tae mai au ra noaa ihora ta ˈu ma te hoo? 28 A rave mai i ta ˈna taleni a hopoi atu ai i te taata auahuru a ˈna taleni ra. 29 E taoˈa ta ˈna ra, e horoahia ˈtu â ta ˈna e ia rahi; aita a ˈna ra, e hopoi-ê-hia ïa ta ˈna. 30 E huri atu i taua tavini faufaa ore nei i roto i te pouri i rapae au ra, tei reira te oto e te auauraa niho ra.

31 Ia tae maira te Tamaiti a te taata ma ta ˈna hanahana, e te mau melahi moˈa atoa ra, ei reira oia e parahi ai i nia iho i to ˈna terono hanahana; 32 e e haaputuhia to te mau fenua atoa i mua i to ˈna aro: e na ˈna e faataa ia ratou mai te tiai mamoe e faataa i te mamoe i te puaaniho ra: 33 e e tuu oia i te mamoe i tana rima atau, e te puaaniho i te rima aui. 34 Ei reira te arii e parau aˈe ai i tei tana rima atau ra, A haere mai outou, e te feia i faaorahia e tau Metua, e parahi i te basileia i haapaohia no outou mai te hamaniraa mai o te fenua nei ra: 35 i poia na hoi au, e ua horoa mai outou i te maa na ˈu; i poihâ na vau e ua faainu mai outou ia ˈu; e taata ê au, e ua ite mai outou ia ˈu: 36 i veve na vau, e ua faaahu mai outou ia ˈu; i pohe na vau i te maˈi, e ua utuutu mai outou ia ˈu; i roto vau i te tapearaa, e ua haere mai outou ia ˈu ra. 37 Ei reira te feia parau-tia ra e na ô aˈe ai i te parau ia ˈna, E te Fatu, i nafea matou i ite ai ia oe i te poiaraa, e ua faaamu ia oe? e te poihâraa, e ua faainu atu ia oe? 38 i nafea matou i ite atu ai ia oe, e e taata ê, e ua ite atu ia oe? e te veveraa, e ua faaahu ia oe? 39 i nafea matou i ite atu ia oe i te poheraa i te maˈi, e i roto i te tapearaa, e ua haere atu ia oe ra? 40 E na ô aˈe te arii i te parau ia ratou, na ô aˈera, Oia mau ta ˈu e parau atu ia outou nei, O outou i na reira i te hoê taeae iti haihai roa i roto i tau mau taeae nei, ua na reira mai ïa outou ia ˈu. 41 Ei reira oia e parau aˈe ai i tei te rima aui, E haere ê outou, e te feia faainohia, i roto i te auahi pohe ore i haapaohia no te diabolo e ta ˈna ra mau melahi: 42 i poia na hoi au, e aore outou i horoa mai i te maa na ˈu; i poihâ na vau, e aore outou i faainu mai ia ˈu; 43 e taata ê au, e aore outou i ite mai ia ˈu; i veve na vau, e aore outou i faaahu mai ia ˈu; i maˈihia na vau, e i roto vau i te tapearaa, e aore outou i haapao mai ia ˈu. 44 Ei reira atoa ratou e parau ai ia ˈna, i te na ôraa e, E te Fatu, i nafea matou i ite atu ai ia oe i te poiaraa, e te poihâraa, e te taata-ê-raa, e te veveraa, e te poheraa i te maˈi, e i roto i te tapearaa, e aore i turu atu ia oe? 45 Ei reira oia e na ô aˈe ai i te parau ia ratou, Oia mau ta ˈu e parau ia outou na, o outou aore i na reira i te hoê taeae iti haihai roa i roto i tau mau taeae nei, aore atoa ïa i na reira mai ia ˈu. 46 O te haere ê ïa e rave i te pohe mure ore, area te feia parau-tia ra, o te rave ïa i te ora mure ore.