Mataio

TE PAURAA O TE HIERO I FAAITEHIA RA.

24 E tei te haereraa ˈtu Iesu i rapae au i te hiero ra, ua haere maira ta ˈna mau pǐpǐ, ua faaite maira ia ˈna i te patu o taua hiero ra. 2 Ua parau atura Iesu ia ratou, Te ite nei outou i teie nei mau mea? oia mau ta ˈu e parau atu ia outou nei, E ore roa te hoê ofai e vaiihohia i nia iho i te tahi, e hope roa i te hurihia i raro.

3 E te parahi ra oia i nia i te mouˈa ra i Oliveta, ua haere omoe maira ta ˈna mau pǐpǐ ia ˈna, e ua na ô maira, E faaite mai oe ia matou i te tupuraa o taua mau mea nei? e te tapao o to oe taeraa mai e te hopea o teie nei ao? 4 Ua parau atura Iesu ia ratou, na ô atura, E ara ia outou ia ore roa outou ia vare i te taata. 5 E rave rahi hoi te haere mai ma to ˈu nei iˈoa, e te na ôraa mai, O vau te Mesia, e e rave rahi hoi te vare. 6 E e faaroo outou i te parau tamaˈi, e te aueue roo tamaˈi, e ara râ eiaha outou e mǎtaˈu; ia tupu hoi taua mau mea ra e tia ˈi; aita râ e fatata te hopea i reira. 7 E tia mai hoi te tahi fenua e aro mai i te tahi fenua, e te tahi basileia e aro mai i te tahi basileia; e oˈe hoi, e te maˈi, e e aueue fenua i tera vahi, i tera vahi. 8 E matamehai anaˈe râ teie nei mau mea no te pohe.

9 E pûpû hoi ratou ia outou no te pohe, e taparahi pohe roa hoi ia outou, e e ririhia outou e te mau fenua atoa i to ˈu nei iˈoa. 10 E rave rahi te taiva i reira, e haavare hoi te tahi i te tahi, e riri hoi ratou ratou iho. 11 E tupu hoi te peropheta haavare e rave rahi, e rave rahi te haavarehia e ratou. 12 E no te mea e rahi te ino i te tupuraa, e riro te rahi o te taata i te iti te hinaaro. 13 Area te mau papu e tae noa ˈtu i te hopea ra, oia te ora. 14 E e parau-haere-hia te evanelia o te basileia nei e ati noa ˈˈe teie nei ao, ia ite te mau fenua atoa: o te hopea ihora ïa i reira ra.

15 E teie nei, ia hiˈo outou i te mea riaria e pau ai ra, i faaite-atea-hia mai e te peropheta ra e Daniela, i te tiaraa i te vahi moˈa ra, (e tei taio ra a haapao!) 16 E te feia e parahi i Iudea ra, a horo ratou i te mouˈa i reira; 17 eiaha tei nia iho i te fare e pou i raro a rave ai i te taoˈa i roto i to ˈna fare; 18 eiaha hoi tei roto i te aua ra e hoˈi e rave i to ˈna ahu. 19 Atae hoi te mau vahine hapû e tei faaote i te tamarii i te reira anotau! 20 E pure hoi outou ia ore to outou hororaa ia riro i te vero, e ia ore atoa i te sabati: 21 e ati rahi hoi tei te reira tau, aitâ ïa ati mai te matamehai mai o teie nei ao, e tae roa aˈenei i teie nei mahana, e e ore roa hoi a muri atu. 22 Ahiri hoi e haamaorohia taua tau ra, aore roa ïa e taata e ora; e haapotohia ra taua tau ra, no te feia maitihia ra. 23 E ia parau mai te taata ia outou, Inaha! teie te Mesia, e, inaha, tera, eiaha e faaroo atu. 24 E Mesia haavare hoi te tia mai i nia, e te peropheta haavare, e ua rave i te tapao e te semeio rahi, e tae noa ˈtu te vare i te feia maitihia ra, ahiri i tia. 25 Inaha, ua faaite atea ˈtu vau ia outou. 26 E ia parau mai te taata ia outou e, Inaha oia tei te medebara ra, eiaha e haere; inaha tei roto i te piha, eiaha e faaroo. 27 E au hoi te haerea mai o te Tamaiti a te taata nei i te uira e anapa i te hitia o te râ, e anaana noa ˈtura i te tooa o te râ ra. 28 Ei te vairaa hoi o te tino ra e haaputuputu ai te mau aeto.

29 E i muri iho â i taua anotau pohe ra, e haapourihia te mahana, e ore hoi te marama e anaana mai, e mairi mai hoi te mau fetia o te raˈi, e e pau hoi te mana o te raˈi i te ueuehia: 30 ei reira e itea mai ai te tapao no te Tamaiti a te taata i nia i te raˈi ra; ei reira te mau fetii atoa o te fenua nei e oto ai, ia hiˈo ratou i te Tamaiti a te taata i te haerea mai na nia i te ata o te raˈi ra, ma te mana e te hanahana rahi. 31 E na ˈna e tono i ta ˈna ra mau melahi ma te pu oto rahi ra, e na ratou e haaputu i to ˈna feia i maitihia ra no na apoo mataˈi e maha ra, mai te tahi pae raˈi e tae noa ˈtu i te tahi pae raˈi.

32 E teie nei, ia ite outou i te tahi parabole i te suke nei. Ia oteo te omou rii e mahora aˈera te rau, ua ite ïa outou e ua fatata te auhune i reira: 33 oia atoa i teie nei, ia hiˈo outou i taua mau mea nei, ua fatata te Tamaiti a te taata i reira, ia ite hoi outou; tei te pae uputa ïa. 34 Oia mau ta ˈu e parau atu ia outou nei, E ore e mou teie nei uˈi e hope ai teie nei mau mea atoa i te tupu. 35 E mou te raˈi e te fenua; e ore roa râ ta ˈu parau e mou.

36 Area te reira mahana e te reira hora, e ore roa te hoê e ite, e ore hoi te mau melahi o te raˈi; maori râ o tau Metua anaˈe ra. 37 Mai tei te anotau ra ia Noa ra, oia atoa te haerea mai o te Tamaiti a te taata nei. 38 Mai tei te anotau i mua iho i te diluvi ra, te amu ra ratou i te maa e te inu ra, te faaipoipo ra e te horoa ra ia faaipoipohia, e tae roa aˈera i te mahana i tomo ai Noa i roto i te pahi; 39 aore roa i ite, e roohia noa ihora ratou e te diluvi, pau roa ˈtura ratou; oia atoa te haerea mai o te Tamaiti a te taata nei. 40 Toopiti pue taata i roto i te aua ra; e riro te tahi, e ora ˈtu te tahi. 41 Toopiti pue vahine i te taviriraa i te mule; e riro te tahi, e ora ˈtu te tahi.

42 E teie nei, e ara, aore hoi outou i ite i te hora e tae mai ai to outou Fatu. 43 Ua ite râ outou e, ahiri te taata fare i ite i te hora e tae mai ai te eiâ, e riro oia i te ara, e ore e vaiiho noa i to ˈna fare ia vavahi-noa-hia na. 44 E teie nei, ia parahi ineine noa outou; ei te hora manaˈo-ore-hia e outou na e tae mai ai te Tamaiti a te taata nei. 45 O vai hoi te tavini haapao maitai e te paari, ta to ˈna ra fatu i faatavana i to ˈna utuafare ei hopoi atu i ta ratou maa i te hora mau ra? 46 E ao to te reira tavini, to tei roohia mai e to ˈna ra fatu te na reira ra. 47 Oia mau ta ˈu e parau atu ia outou nei, e faariro oia ia ˈna ei tiaau i te mau taoˈa atoa na ˈna ra. 48 Area te tavini ino ra, o tei parau i roto i to ˈna iho aau, E maoro tau fatu e hoˈi mai ai; 49 papai ihora i te mau taetaeae tavini to ˈna ra, amu ihora i te maa, inu ihora i te ava, oia e te feia atoa i faataero ra; 50 ia tae i te mahana manaˈo-ore-hia e ana ra, e te hora itea-ore-hia e ana e tae mai ai te fatu o taua tavini ra, 51 a faataa ê atu ai ia ˈna, a tuu atu ai i ta ˈna tufaa i roto i te feia haavare atoa ra: tei reira te oto e te auauraa niho.