Mataio

TE HURU O TE PARAU A TE MAU PHARISEA.

23 Ua parau atura Iesu i taua feia rahi ra, e i ta ˈna mau pǐpǐ, na ô atura, 2 Te parahi nei te mau papai parau e te mau Pharisea i te parahiraa o Mose; 3 e teie nei, e haapao outou e e rave i ta ratou e parau mai ia outou: eiaha râ outou e pee ia ratou; o te parau hoi ta ratou, aita râ i haapao. 4 Te taamu nei hoi ratou i te hopoia teimaha e te maraa ore, e te tuu nei i nia i to vetahi ê tapono; e ore râ te hoê rima o ratou e faatiaia noa ˈtu i taua mau hopoia ra. 5 E ta ratou atoa e rave ra, i rave ïa ia hiˈohia mai e te taata. Te faaaano nei hoi ratou i ta ratou mau phulakateri, e te faarahi nei i te hiti o to ratou ahu, 6 E te titau i te vahi teitei i te mau amuraa maa ra, e te parahiraa i hau i te mau sunago ra, 7 e ia arohahia i te vahi taata ra, e ia parauhia mai e te taata, E Rabi, E Rabi, 8 Area outou, eiaha e titau ia parauhia, ia Rabi; hoê roa hoi a outou orometua, o te Mesia; e e taeae anaˈe hoi outou atoa na. 9 E eiaha roa outou e faametua i te hoê taata o teie nei ao, oia anaˈe ra hoi to outou Metua o te parahi i te raˈi ra. 10 Eiaha atoa e titau ia parauhia outou, i te aratai; hoê roa hoi o outou aratai, o te Mesia. 11 E tei rahi ra i roto ia outou na, ei tavini ïa no outou. 12 Te faateitei ia ˈna ihora, e faahaehaahia ïa; e o te faahaehaa ia ˈna ihora, e faateiteihia ïa.

13 Auê outou, e te mau papai parau e te mau Pharisea, e haavare outou! te opani nei hoi outou i te basileia o te ao i te taata nei; e ore outou iho e tomo, e te feia e tomo ra te tapea nei outou. 14 Auê outou, e te mau papai parau e te mau Pharisea, e haavare outou! te rave pau roa nei outou i ta te mau fetii a te mau vahine ivi; e te haamaoro nei i te pure ei tapoˈi, e rahi ïa to outou pohe i te reira. 15 Auê outou, e te mau papai e te mau Pharisea, e haavare outou! te haaati nei outou i te tai e te fenua ia noaa te peroseluto hoê, e ia noaa ra, rahi atura to ˈna au ia outou ei tamaiti no te po i to outou iho. 16 Auê outou, e te mau aratai matapo e, o tei parau e, O te tǎpǔ i te hiero ra, aita ïa o reira! o te tǎpǔ râ i te auro o te nao ra, e amutarahu ïa. 17 E te mau maamaa e te matapo e! o teihea hoi tei rahi, o te auro anei e o te hiero anei tei haamoˈa i taua auro ra? 18 E o te tǎpǔ i te fata ra, aita ïa o reira; o te tǎpǔ râ i te taoˈa i nia ihora, e amutarahu ïa. 19 E te mau maamaa e te matapo e! o teihea hoi tei rahi, o te taoˈa anei, e o te fata anei tei haamoˈa i taua taoˈa ra? 20 E teie nei, o tei tǎpǔ i te fata ra, ua tǎpǔ ïa i te reira, e te mau mea atoa i nia ihora. 21 E o tei tǎpǔ i te hiero ra, ua tǎpǔ ïa i te reira, e ia ˈna atoa i tei parahi i roto ra. 22 E o tei tǎpǔ i te raˈi ra, ua tǎpǔ ïa i te terono o te Atua, e ia ˈna atoa i tei parahi i nia ihora. 23 Auê outou, e te mau papai parau e te mau Pharisea, e haavare outou! te horoa na hoi outou i te ahuru o te mineta, e te aneto, e te kumina, e te haapae nei i te mau mea rarahi o te ture ra, i te parau-tia, e te aroha, e te haapao mau ra: o ta outou ïa e haapao e tia ˈi, e eiaha atoa e haapaehia tera. 24 E te mau aratai matapo e! te tamouu na outou i te naonao, e te horomii noa na i te kamela. 25 Auê outou, e te mau papai parau e te mau Pharisea, e haavare outou! te tamâ nei hoi outou i to rapae au i te auˈa e te umete, area o roto ra, te î na ïa i te nounou, e te parau-tia ore. 26 E te Pharisea matapo e! e mata na i te tamâ i te auˈa e te umete i roto, ia mâ atoa rapae au aˈe. 27 Auê outou, e te mau papai parau e te mau Pharisea, e haavare outou! te au nei hoi outou i te mau vairaa tupapau i faateateahia ra, o tei nehenehe i rapae au aˈe, area o roto ra, ua î ïa i te ivi taata pohe, e te mea faufau. 28 Oia atoa outou na, mai te feia parau-tia ra outou i rapae au i ta te taata nei hiˈoraa, area o roto ra, te î na ïa outou i te haavare e te ino. 29 Auê outou, e te mau papai parau e te mau Pharisea, e haavare outou! te patu nei hoi outou i te vairaa o te mau peropheta, e te faaunauna nei i te menema o te feia parau-tia ra, 30 e te parau na outou, Ahiri o matou atoa i te anotau o to matou hui metua ra, e ore matou e amui ia ratou i te taparahiraa i te mau peropheta. 31 E tena na, o outou iho maori te ite e o te tamarii outou na te feia i taparahi i te mau peropheta ra. 32 A faaî na maori outou i te faito a to outou mau metua ra. 33 E te mau ophi e! e te mau fanauˈa ehidena e! Eaha outou e ora ˈi i te pohe ra i te po?

34 E teie nei, inaha te tono atu nei au i te peropheta, e te taata paari, e te papai parau ia outou na; e taparahi ïa outou i e tahi pae, e e faasatauro; e papai ïa outou i e tahi pae i roto i to outou mau sunago ra, e e tiavaru hoi i tera oire, i tera oire; 35 ia parihia outou i te toto hara ore atoa i manii i te fenua nei, mai te toto o Abela parau-tia mai â, e tae roa ˈˈe i te toto o Zakaria a Barakia, ta outou i taparahi i te area o te fata e te hiero ra. 36 Oia mau ta ˈu e parau atu ia outou nei, e pari-atoa-hia teie nei ui i te reira. 37 A tae hoi oe, e Ierusalema e, e Ierusalema! o tei taparahi i te mau peropheta, e te pehi hoi i te ofai i te feia i tonohia ˈtu ia oe na e, e rave rahi to ˈu haaputuraa i to tamarii, mai te moa e haaputu i to ˈna fanauˈa i raro aˈe i to ˈna pererau ra; aita râ i tia ia outou. 38 Ei teie nei, to outou utuafare e tuuhia ˈi i te ano. 39 Teie outou a ore a hiˈo mai ia ˈu, ia ite mai outou, e tae noa ˈtu i te mahana e parau ai outou e, Ia ora na oia o te haere mai ma te iˈoa o te Fatu.