Mataio

TE OROA FAAIPOIPORAA.

22 Tamau atura Iesu i te parauraa ˈtu i te parau parabole ia ratou, na ô atura, 2 E au te basileia o te ao i te hoê arii, o tei faatupu i te oroa faaipoiporaa na ta ˈna tamaiti. 3 E ua tono atura i te mau tavini e tii i te feia i parauhia ra e haere mai i te oroa; e aita ratou i tae mai. 4 Ua tono atura oia i te tahi mau tavini ê â, na ô atura. A tao atu i te feia i parauhia ra, Inaha, ua nahonaho tau amuraa, ua tiapaihia tau mau puaatoro e tau mau puaa faaamu, ua nahonaho roa; a haere mai i te oroa faaipoiporaa. 5 Aita râ ratou i haapao mai, haere ê atura te tahi i ta ˈna ra aua, e te tahi i ta ˈna ra hooraa: 6 haru maira te tahi pae i tana mau tavini ra, hamani ino maira; e taparahi pohe roa ihora. 7 Ia ite râ taua arii ra, riri roa ˈtura, tono atura i te mau taata tamaˈi no ˈna ra, taparahi pohe roa ˈtura i taua mau taparahi taata ra, tanina ˈtura i to ratou oire i te auahi. 8 Ua parau atura oia i tana mau tavini, Ua nahonaho te oroa faaipoiporaa nei, area te feia i parauhia ra, aore ïa i au. 9 E teie nei, a haere i te mau eˈa rarahi ra, e te feia atoa i itea ˈtu ia outou ra, e tao atu e haere mai i te oroa faaipoiporaa. 10 Haere atura taua mau tavini ra i te mau eˈa rarahi ra, e ua ope atoa maira i tei itea-atoa-hia ia ratou ra, te maitai e te ino; î roa aˈera taua oroa faaipoiporaa ra i te manihini.

11 E ia haere maira taua arii ra i roto e hiˈo i te manihini, ite ihora oia i te hoê taata, aita o ˈna e ahu faaipoiporaa; 12 ua parau atura oia ia ˈna, E hoa, eaha oe i tae mai ai i ǒ nei aore e ahu faaipoiporaa? Aita ˈtura a ˈna e parau. 13 Ua parau atura taua arii ra i ta ˈna mau tavini, A ruuruu ia ˈna i te rima e te avae, a hopara ˈtu i rapae i roto i te pouri; tei reira te oto e te auauraa niho. 14 E rave rahi hoi tei parauhia, e iti râ tei maitihia.

15 Haere atura te mau Pharisea, apoo ihora i te parau e fifi ai oia ia ratou ia parau. 16 Ua tono atura ratou i ta ratou mau pǐpǐ ia ˈna ra, e ta te mau Herodiani ra, o tei parau atu e E Rabi, ua ite matou e, e taata parau mau oe, e te haapii nei oe i te parau a te Atua ma te tia, ma te hirahira ore i te taata atoa; aore hoi oe e haapao i te tino o te taata nei. 17 E teie nei, e faaite mai oe ia matou i to oe manaˈo; E mea au anei i te ture ia hopoi i te moni aufau na Kaisara, e aore anei? 18 Te ite maira râ Iesu i to ratou tairoiro, e ua na ô maira, Eaha outou i râmâ mai ai ia ˈu, e teie nei feia haavare? 19 A faaite mai na i te moni aufau. Ua faaite atura ratou i te hoê moni veo. 20 Ua ui maira oia ia ratou, No vai teie nei hohoˈa e te parau? 21 Ua parau atura ratou ia ˈna, No Kaisara. Ua na ô maira oia ia ratou, E hopoi maori i ta Kaisara ia Kaisara ra, e ta te Atua ra, e hopoi â ïa i te Atua ra. 22 E ite aˈera ratou i te reira parau, maere ihora, faarue ihora ia ˈna, haere atura.

23 E e mau Sadukea tei haere mai ia ˈna i taua mahana ra, o tei parau ra e, aita e tia-faahou-raa, ua ui maira ia ˈna, 24 na ô maira, E Rabi, i parau mai Mose, Ia pohe te hoê taata aore ra e tamarii, e faaipoipo te teina i tana vahine ra, e faafanautama i te tamarii na te tuaana. 25 Toohitu pue tamaroa te fetii hoê i ǒ matou nei, faaipoipo ihora te matahiapo i te vahine, e pohe atura aore e tamarii, vaiiho ihora i tana vahine na te teina; 26 i na reira atoa te teina, o te toopiti ïa, i na reira hoi te tootoru, e tae noa ˈtura i te toohitu. 27 E te hopea ihora, pohe atoa ˈtura te vahine. 28 E teie nei, ia tae i te tia-faahou-raa ra, ei vahine oia na teihea i taua toohitu ra? ua faaipoipo hoi ratou atoa ia ˈna. 29 Ua parau atura Iesu ia ratou, na ô atura, Te hape nei outou i te ite ore i te parau i papaihia ra, e te mana o te Atua. 30 I te tia-faahou-raa ra, aore ïa e faaipoiporaa, aore hoi e horoaraa ia faaipoipohia, e au râ ratou i te mau melahi a te Atua i te ao ra. 31 I te parau râ o te ora-faahou-raa o tei pohe ra, aita outou i taio i ta te Atua i parau mai ia outou na, a na ô mai ai ra e, 32 O vau to Aberahama nei Atua, e to Isaaka nei Atua, e to Iakoba nei Atua? E ere hoi te Atua i te Atua no te taata pohe, no te taata ora râ. 33 E ite aˈera taua feia rahi ra i te reira, maere roa ˈtura ratou i ta ˈna parau.

34 Ite aˈera râ te mau Pharisea e ua pohe te mau Sadukea ia ˈna, ua aururu maira ratou ia ˈna ra, 35 ua ui maira te hoê haapii ture no ratou ia ˈna, na ô maira i te râmâraa mai, 36 E Rabi, teihea te parau rahi i roto i te ture? 37 Ua parau atura Iesu, Hinaaro oe i to Atua ia Iehova ma to aau atoa, e ma to varua atoa, e ma to manaˈo atoa. 38 O te ture matamua teie e te hau i te rahi. 39 E mai te reira atoa te piti; E aroha ˈtu oe i to taata-tupu, mai to aroha ia oe iho na. 40 Te ture atoa e te mau peropheta, tei teie nei ïa pue ture e piti nei.

41 Te aururu noa maira te mau Pharisea, ua ui atura Iesu ia ratou, 42 na ô atura, Eaha to outou manaˈo i te Mesia ra? ei tamaiti oia na vai? Ua na ô maira ratou ia ˈna, Na Davida. 43 Ua parau atura oia ia ratou, Eaha hoi Davida o tei parau ma te Varua ra i parau ai ia ˈna e, e Fatu no ˈna? a na ô ai ra e, 44 Ua parau atura Iehova i tau Fatu, E parahi oe i tau rima atau nei, e ia faariro vau i to mau enemi ei taahiraa avae no oe? 45 Ahiri Davida i parau atu ia ˈna e, e Fatu, eaha ihora oia i riro ai ei tamaiti no ˈna? 46 Aita ˈtura i tia i te hoê o ratou ia parau mai ia ˈna i te reira, e mai taua mahana maira aore roa i tia i te hoê ia ui faahou mai ia ˈna.