Mataio

TE ARII O SIONA I NIA I TE ASINI.

21 E fatata maira Ierusalema ia ratou, ia tae ratou i Betephage, i te mouˈa ra o Oliveta, ua tono aˈera Iesu i e toopiti pue pǐpǐ a ˈna ra, 2 na ô atura, A haere na orua i tera aˈera oire iti, e e ite orua i te hoê asini i tena na, ua fetiihia, e te fanauˈa i pihai iho; e tatara e putô mai i ǒ nei ia ˈu nei. 3 E ia parau noa mai te hoê taata ia orua, e parau atu orua, Tei hinaaro maira te Fatu, e na ˈna ïa e tuu mai i reira ra. 4 Ia tupu te parau a te peropheta ra i na reirahia ˈi, o tei na ô maira e, 5 A parau atu i te tamahine o Siona, Inaha te haere mai na to arii ia oe na ma te haehaa, e ma te parahi i nia i te asini, e te pinia, te fanauˈa o te asini. 6 Haere atura na pǐpǐ, na reira ˈtura i ta Iesu i faaue mai ia raua ra, 7 putô maira i te asini ma te fanauˈa atoa, tuu ihora i to raua ahu i nia iho i taua na asini ra, haaparahi ihora ia ˈna i nia iho. 8 E e feia rahi tei horahora i to ratou ahu i te eˈatia ra; ooti aˈera hoi e tahi pae i te amaa raau, vauvau ihora i te eˈatia. 9 Te pii noa maira te tiaa rahi i na mua ra, e tei pee mai na muri, na ô maira, Hosana te Tamaiti a Davida; ia ora oia o tei haere mai ma te iˈoa o te Fatu. Hosana i te raˈi teitei ra. 10 E tae atura oia i roto i Ierusalema, aueue ihora taua oire atoa ra, e te taata atoa i te uiraa e, O vai teie? 11 Ua parau atura taua tiaa rahi atoa ra, O Iesu teie, o te Peropheta o Nazareta i Galilea ra.

12 Haere atura Iesu i roto i te hiero o te Atua, tiahi atura i rapae au i te feia i hoo atu e tei hoo mai i roto i te hiero ra, huri atura hoi i raro i te mau iri a te feia hoo moni ra, e te parahiraa o te feia hoo uupa ra, 13 ua parau atura ia ratou, Ua oti hoi i te papaihia e, E parauhia to ˈu fare e fare pureraa, faarirohia iho nei râ e outou ei ana no te eiâ haru. 14 Ua haere maira te matapo e te pirioi i roto i te hiero ia ˈna ra, ua faaora ˈtura oia ia ratou. 15 Ia hiˈo mai râ te feia tahuˈa rarahi e te mau papai parau i te mau mea huru ê ta ˈna i rave ra, e ia faaroo i te tamarii i roto i te hiero i te piiraa, e te na ôraa e, Hosana te Tamaiti a Davida, î aˈera ratou i te riri: 16 e ua parau maira ia ˈna, Te ite na oe i ta ratou e parau nei? Ua parau atura Iesu ia ratou, E; aitâ outou i taio, Ua noaa ia oe te haamaitai no roto i te vaha o te tamarii rii e te aiû rii? 17 Faarue atura oia ia ratou, haere atura i rapae i taua oire ra i Betania, taoto atura i reira.

18 E poipoi aˈera, poia ihora oia i te hoˈiraa mai i roto i te oire, 19 hiˈo aˈera oia i te hoê suke i te pae aratia, haere atura i pihia iho, roohia ˈtu aore roa o nia iho, o te rau anaˈe ra, ua parau atura, Eiaha roa ˈtu ei maa e hotu i nia ia oe na. Oriorio roa ˈtura taua suke ra i reira ra. 20 E ia hiˈo aˈera te mau pǐpǐ i te reira, ua na ô aˈera ma te maere, Teie nei suke i te oriorio vave e! 21 Ua parau atura Iesu ia ratou, Oia mau ta ˈu e parau atu ia outou nei, e faaroo turori ore to outou, e ere tei ravehia i teie nei suke anaˈe ra ta outou e rave, ia parau noa ˈtu râ outou i teie nei mouˈa, Ia pee oe e ia taorahia i roto i te tai; e tia ïa. 22 E te mau mea atoa ta outou e ani ma te faaroo, ia pure, e noaa ïa ia outou.

23 E tae maira oia i roto i te hiero, ua haere maira te mau tahuˈa rarahi e te feia paari i ǒ ratou ra, i pihai iho ia ˈna i ta ˈna ra haapiiraa, ua na ô maira, O vai te tumu i teie nei mau mea ta oe e rave nei? e na vai i horoa mai i teie nei mana ia oe? 24 Ua parau atura Iesu ia ratou, na ô atura, E ui atoa vau ia outou i ta ˈu, e ia faˈi mai outou ra, e faˈi atoa ˈtu vau ia outou i te tumu i ta ˈu nei mau mea e rave nei? 25 Nohea te bapetizo a Ioane? no te raˈi mai anei; e na te taata anei? Ua feruri ihora ratou ratou iho, na ô aˈera, Ia parau tatou, No te raˈi mai, e riro oia i te parau mai e, Eaha ihora outou i ore i faaroo atu ai ia ˈna? 26 Ia parau râ tatou, Na te taata; te mǎtaˈu nei hoi tatou i te taata, te parau nei hoi te taata atoa e, e peropheta mau Ioane. 27 Ua parau maira ratou ia Iesu, na ô maira, Aore matou i ite. Ua parau atura Iesu ia ratou, E ore atoa vau e faaite atu ia outou i te tumu i rave ai au i teie nei mau mea.

28 Eaha ra to outou manaˈo? I te hoê taata toopiti a ˈna pue tamarii tamaroa; ua haere atura oia i te matahiapo, na ô atura, E tau tamaiti, haere oe e rave i te ohipa i roto i tau ô vine ra aauanei. 29 Ua parau maira oia, na ô maira, E ore au e tae, e muri aˈera tatarahapa ihora, haere atura. 30 Ua haere atura oia, e ua na reira atoa ˈtura i te parauraa ˈtu i te teina. Ua parau maira oia, na ô maira, E, aita râ i tae. 31 O vai ta raua i haapao i te hinaaro o to raua metua ra? Ua na ô maira ratou ia ˈna, O te matahiapo ra. Ua parau atura Iesu ia ratou, E parau mau ta ˈu e parau atu ia outou nei, o te mau telona, e te mau vahine faaturi tei reva na i te basileia o te Atua, ia outou. 32 I haere mai hoi Ioane i ǒ outou nei ma te parau-tia, e aore outou i faaroo ia ˈna; ua faaroo râ te mau telona e te mau vahine faaturi ia ˈna: outou ra, ite noâ outou i te reira, aita roâ outou i tatarahapa a faaroo atu ai ia ˈna.

33 E faaroo mai â i te hoê parabole. Ua ô ihora te hoê taata fare i te ô vine, haaati atura i te aua, hamani ihora i te neneiraa vine i roto, faatia ihora i te fare tiai, tuu atura i te feia faaapu, haere atura i te fenua ê: 34 e fatata aˈera te tau vine, ua tono atura oia i tana mau tavini i te feia faaapu ra, i te maa o taua ô vine ra. 35 Ua haru ihora râ ratou i taua mau tavini no ˈna ra, papai ihora i te tahi, pehi ihora i te tahi i te ofai, taparahi pohe roa ihora hoi i te tahi. 36 Ua tono atura oia i te tahi mau tavini â, e rahi ïa i tei mutaa iho, e ua na reira atoâ ratou ia ratou. 37 E te hopea ihora, ua tono atura oia i ta ˈna tamaiti ia ratou, na ô aˈera, e riro ratou i te faaturatura mai i tau tamaiti. 38 Ia hiˈo mai râ te feia faaapu i te tamaiti, ua na ô aˈera ratou ratou iho, O te taata aiˈa teie, tatou e taparahi, a tapea ˈi tatou i tana fenua. 39 Ua haru maira ratou ia ˈna, hopara ˈtura i rapae au i taua ô vine ra, taparahi pohe roa ˈtura ia ˈna. 40 E ia haere mai te Fatu na ˈna taua ô vine ra, eaha maira oia i taua feia faaapu ra? 41 Ua na ô maira ratou ia ˈna, E taparahi pohe roa ïa oia i te reira mau taata iino i te pohe rahi ino, a tuu atu ai i te ô vine i te tahi mau faaapu ê, o te hopoi mai i te maa na ˈna i te tau mau ra. 42 Ua parau atura Iesu ia ratou, Aitâ outou i taio i roto i te parau i papaihia ra e, O te ofai i faaruehia e te feia patu fare ra, o tei faarirohia ïa ei ofai tiavâ? Na Iehova teie i rave e te hiˈo atu nei tatou ma te popou. 43 E teie nei, e parau atu vau ia outou, e hopoi-ê-hia te basileia o te Atua nei ia outou, e e tuuhia ˈtu i te nunaa e faahotu mai i te huero ra. 44 E o te hiˈa i nia iho i taua ofai nei, e paruparu ïa; area te mairihia e taua ofai nei, e huˈahuˈa roa ïa. 45 E ia faaroo te feia tahuˈa rarahi e te mau Pharisea i ta ˈna ra mau parabole, ua ite ihora e, o ratou ta ˈna i parau ra. 46 Ia titau râ ratou e haru atu ia ˈna, mǎtaˈu ihora ratou i te taata, no te mea e peropheta oia i ta ratou parauraa.