Mataio

TE FEIA I TONOHIA I ROTO I TE Ô VINE.

20 E au hoi te basileia o te ao ra i te hoê taata fare, o tei haere i rapae au i te poipoi roa e tarahu i te rave ohipa i ta ˈna ra ô vine. 2 E au aˈera ta ˈna parau i te tahi pae rave ohipa e ia taihoê moni veo i te mahana hoê, ua tono atura oia ia ratou i roto i ta ˈna ô vine. 3 E tae aˈera i te toru o te hora, haere faahou atura oia i rapae, ite atura i te hoê pae taata i te tia-noa-raa i te hooraa taoˈa ra; 4 ua parau atura oia ia ratou, E haere atoa outou i roto i tau ô vine ra, e na ˈu e horoa ˈtu na outou i tei au ra. Haere atura ratou. 5 Haere faahou atura oia i rapae i te hora ono e te iva, ua na reira faahou atura. 6 E tae aˈera hoi i te ahuru ma hoê o te hora ra, haere faahou atura oia i rapae, itea ˈtura te tahi pae taata i te tia-noa-raa, e ua parau atura ia ratou, Eaha outou i tia ohipa ore noa ˈi i ǒ nei e mairi noa ˈtu teie nei mahana? 7 Ua na ô maira ratou, No te mea aore e taata i tarahu mai ia matou. Ua parau atura oia ia ratou, E haere atoa outou i tau ô vine ra; e na ˈu e horoa ˈtu na outou i tei au ra. 8 E rui ihora, ua parau atura te taata ô vine ra i te tiaau no ˈna, A parau atu na i te mau rave ohipa ra, e hopoi atu i ta ratou utua; e na te hopea na e tae noa ˈtu i te matamehai ra. 9 E tae maira tei tarahuhia i te hora ahuru ma hoê ra, noaa ihora ta ratou taihoê moni veo i te taata hoê ra. 10 Ia tae mai râ tei tarahuhia i te matamehai ra, manaˈo ihora ratou e rahi ta ratou e noaa, taihoê atoa râ a ratou moni veo i noaa i te taata hoê. 11 E tei te raveraa ra, ua omumu ihora ratou i te taata fare ra, na ô maira, 12 Hoê roa râ hora a teie feia i te ohiparaa, e ua faafaito oe ia ratou ia matou nei, i tei faaoromai i te rohirohi e te veavea o te mahana. 13 Ua parau atura râ oia i te hoê o ratou, E hoa, aita i hapa ta ˈu parau ia oe: aore tâua i faaau i te parau e ia hoê aˈe a oe moni veo? 14 A rave i ta oe, a haere. O to ˈu ïa hinaaro, mai ta oe atoa na ia hopoi atu na te faahopea nei. 15 Eiaha vau e haapao i to ˈu hinaaro i ta ˈu iho nei? Te ino na to oe mata i to ˈu nei maitai? 16 Oia ïa, e riro te hopea ei matamehai, e te matamehai ei hopea; e rave rahi hoi tei parauhia, e iti râ tei maitihia.

17 E te haere atura Iesu i Ierusalema, ua rave atura oia i te mau pǐpǐ tino ahuru ma piti ra, opai aˈera i te pae eˈa, na ô atura ia ratou, 18 Inaha, te haere nei tatou i Ierusalema, e e tuuhia te Tamaiti a te taata nei i te feia tahuˈa rarahi e te mau papai parau ra, e e faahapa mai ratou ia ˈna ia pohe, 19 e tuu hoi ia ˈna i te Etene, ia tâhitohitohia oia, e ia papaihia, e ia faasataurohia hoi: e tia faahou mai râ oia ia tae i te rui toru ra.

20 Ua haere maira te metua vahine o na tamarii a Zebedaio ra ia ˈna, e ta ˈna pue tamarii atoa, ua tahopu maira oia ia ˈna e ua ani maira i to ˈna hinaaro. 21 Ua na ô atura oia ia ˈna, Eaha to oe hinaaro? Ua parau maira oia ia ˈna, Ia tae i to oe ra basileia, ia parahi te hoê o tau pue tamarii nei i to rima atau, e te hoê i to rima aui. 22 Ua parau atura Iesu, na ô atura, Aita orua i ite i ta orua i ani mai nei. E tia ia orua ia inu i te auˈa ta ˈu e fatata i te inu nei? e ia bapetizohia i te bapetizo e bapetizohia ˈi au nei? Ua parau maira raua ia ˈna, E tia ïa ia mâua. 23 Ua parau atura oia ia raua, E inu mai â hoi orua i to ˈu ra auˈa e e bapetizohia i te bapetizo e bapetizohia ˈi au nei, area te parahi i tau rima atau e tau rima aui, eita ïa e tia ia ˈu ia horoa, maori râ no te feia i haapaohia e tau Metua no ratou ra. 24 E ite aˈera te tino ahuru ra, î aˈera i te riri i taua pue taeae ra. 25 Ua parau atura Iesu ia ratou e haere mai ia ˈna ra, e ua na ô atura, Ua ite outou e, te faahepo nei te hui mana o te Etene ia ratou, e te feia rarahi ra te mana ra ïa i nia iho ia ratou. 26 Eita râ e tia ia na reira i roto ia outou; o te hinaaro râ i te faarahi i roto ia outou na, ia riro ïa oia ei tavini no outou e tia ˈi; 27 e o te hinaaro ia hau oia i roto ia outou na, ei tavini haehaa oia no outou: 28 aita atoa hoi te Tamaiti a te taata nei i haere mai ia tavinihia to ˈna, ei tavini râ, e ia horoa i to ˈna ora ei hoo no te taata e rave rahi.

29 E i to ratou faarueraa i Ieriko, e tiaa rahi tei pee mai ia ˈna. 30 E inaha, te parahi noa ra e toopiti pue taata matapo i te pae aratia, e ite aˈera te haere ra Iesu na reira iho, ua pii maira, na ô maira, E te Fatu, e te Tamaiti a Davida, e aroha mai ia mâua. 31 Ua avau atura taua tiaa rahi ra ia raua ia mamû atu; rahi roa ˈtura to raua pii, na ô maira, E te Fatu, e te Tamaiti a Davida, e aroha mai ia mâua nei. 32 Tia noa ihora Iesu, ua parau atura ia raua e haere mai, na ô atura, Eaha to orua hinaaro ia ˈu? 33 Ua na ô maira raua ia ˈna, E te Fatu, ia ara to mâua mata. 34 Aroha ˈtura Iesu ia raua, faatiaia ˈtura i to raua mata; araara aˈera to raua mata i reira ra, e ua pee maira raua ia ˈna.