Mataio

Te Evanelia a Mataio ra

TE FANAURAA O TE MESIA RA.

1 E parau no te fanauraa no Iesu Mesia, e tamaiti na Davida, e tamaiti na Aberahama. 2 Fanau aˈera ta Aberahama o Isaaka; fanau aˈera ta Isaaka o Iakoba; fanau aˈera ta Iakoba o Iuda e tana hui taeae; 3 fanau aˈera ta Iuda o Pharesa e o Zara ia Tamara; fanau aˈera ta Pharesa o Eseroma; fanau aˈera ta Eseroma o Arama; 4 fanau aˈera ta Arama o Aminadaba; fanau aˈera ta Aminadaba o Naasona; fanau aˈera ta Naasona o Salamona; 5 fanau aˈera ta Salamona o Boaza ia Rahaba; fanau aˈera ta Boaza o Obeda ia Ruta; fanau aˈera ta Obeda o Iese; 6 fanau aˈera ta Iese o te arii ra o Davida; fanau aˈera ta te arii ta Davida o Solomona i te vahine a Uria ra; 7 fanau aˈera ta Solomona o Roboama; fanau aˈera ta Roboama o Abia; fanau aˈera ta Abia o Asa; 8 fanau aˈera ta Asa o Iehosaphata; fanau aˈera ta Iehosaphata o Iorama; fanau aˈera ta Iorama o Ozia; 9 fanau aˈera ta Ozia o Iotama; fanau aˈera ta Iotama o Ahaza; fanau aˈera ta Ahaza o Ezekia; 10 fanau aˈera ta Ezekia o Manase; fanau aˈera ta Manase o Amona; fanau aˈera ta Amona o Iosia; 11 fanau aˈera ta Iosia o Iekonia e tana mau taeae, i te anotau i reva ˈtu ai i Babulonia ra: 12 e ia reva i Babulonia ra, fanau aˈera ta Iekonia o Salatiela; fanau aˈera ta Salatiela o Zorobabela. 13 Fanau aˈera ta Zorobabela o Abiuda; fanau aˈera ta Abiuda o Eliakima; fanau aˈera ta Eliakima o Azora; 14 fanau aˈera ta Azora o Zadoka; fanau aˈera ta Zadoka o Akima, fanau aˈera ta Akima o Eliuda; 15 fanau aˈera ta Eliuda o Eleazara; fanau aˈera ta Eleazara o Matana; fanau aˈera ta Matana o Iakoba; 16 fanau aˈera ta Iakoba o Iosepha, te tane a Maria, na ˈna i fanau ia Iesu, o tei parauhia ra e o te Mesia. 17 E te mau ui atoa mai ia Aberahama mai â e tae roa aˈera ia Davida ra, auahuru ïa e maha tiahapa: mai ia Davida mai hoi e tae roa aˈera i te revaraa i Babulonia ra, auahuru ïa e maha tiahapa; mai te revaraa hoi i Babulonia ra e tae roa aˈera i te Mesia nei ra, auahuru ïa e maha tiahapa.

18 Teie te huru o te fanauraa o Iesu Mesia: Te momoˈahia ra tana metua vahine o Maria ia Iosepha; aore râ raua i apiti i hapu ai oia i te Varua Maitai. 19 E taata parau-tia ra tana tane o Iosepha, aore i hinaaro i te faaite hua ia ˈna, manaˈo aˈera râ e haapae huna noa ia ˈna. 20 E te feruri noa ra oia i taua mau mea nei, e inaha, ua fa maira te hoê melahi a te Fatu, faaheitaoto maira ia ˈna, na ô maira, E Iosepha a Davida ra, eiaha e mǎtaˈu i to vahine ra ia Maria ia aratai mai i te utuafare, no te Varua Maitai hoi i hapu ai oia. 21 E te tamaiti ta ˈna e fanau, o ta oe ïa e topa ˈtu ia Iesu; e faaora hoi oia i to ˈna taata i ta ratou hara. 22 Tia mau atura tei parauhia mai e te Fatu i te vaha o te peropheta i taua mau mea atoa nei, a na ô mai ai ra e, 23 Inaha, e hapû te hoê paretenia, e e tamaiti ta ˈna e fanau, e e topahia oia ia Emanuela; oia hoi te Atua i ǒ tatou nei, ia iritihia ra. 24 E ara aˈera Iosepha, haapao atura i ta te melahi a te Fatu i parau mai ia ˈna ra, tii atura e aratai mai i tana vahine. 25 Aita râ i rave atu e fanau noa maira ta ˈna tamaiti matahiapo ra, topa ˈtura oia i to ˈna iˈoa o IESU.