Mataio

TA TE ATUA RA PARAU, E TA TE MAU PHARISEA.

15 Ua haere maira e toofanu mau papai parau e te Pharisea no Ierusalema, ua parau maira ia Iesu, 2 Eaha ta oe nei mau pǐpǐ i faahapa ˈi i te parau a te feia tahito ra? aore hoi ratou e horoi i to ratou rima ia amu i te maa. 3 Ua parau atura râ oia, na ô atura ia ratou, Eaha hoi outou iho na i faahapa ˈi i te ture a te Atua i ta outou na tutuu? 4 Ua parau mai hoi te Atua, na ô maira, E faatura i to metua tane e to metua vahine; e O tei faaino i te metua tane e te metua vahine, ia pohe mau ïa oia. 5 Te parau na râ outou e, O te parau atu i tana metua tane e tana metua vahine, Ia moˈa te mau mea atoa na ˈu nei e faufaahia ˈi oe na; 6 eiaha oia e faatura ˈtu i tana metua tane e tana metua vahine i reira. Ua na reira outou i te faaore i te ture a te Atua i ta outou na tutuu. 7 E te mau haavare e, te au maite na outou i ta Isaia i parau ia outou na, a na ô ai ra, 8 Te ati mai nei teie nei feia ia ˈu i to ratou vaha, e te faatura mai nei ia ˈu i to ratou utu; tei te atea ê râ to ratou aau ia ˈu. 9 E mea faufaa ore râ ta ratou e pure ia ˈu nei, a haapii ai i tei tuuhia mai e te taata anaˈe ra.

10 Ua parau atura oia i taua feia rahi ra, na ô atura ia ratou, A faaroo mai, ia ite. 11 E ere hoi tei ô atu i roto i te vaha i te mea e viivii ai te taata, o tei na roto mai râ i te vaha ra, e viivii ïa te taata i te reira. 12 Ua haere maira ta ˈna mau pǐpǐ, ua na ô maira ia ˈna, Te ite atura oe e ua riri te mau Pharisea i te faarooraa i taua parau nei? 13 Ua parau atura oia, O te mau raau atoa aore i tanuhia e tau Metua i te ao ra, e ihipapahia ïa. 14 E vaiiho noa ˈtu, e matapo aratai matapo ïa; e ia aratai te matapo i te matapo ra, e hiˈa apipiti ïa i roto i te pouohu. 15 Ua parau maira Petero ia ˈna, na ô maira, A faaite mai na ia matou i te auraa i taua parau na. 16 Ua na ô atura Iesu, Te vai ite ore atoa na outou? 17 Aitâ outou i ite e o te ô atu i te vaha ra e tae ïa i te opu? e faaruehia ˈtura i rapae? 18 Area ta te vaha e haapuai mai, no roto mai ïa i te aau, o te mea ïa e viivii ai te taata. 19 No roto mai hoi i te aau te manaˈo iino, te taparahi taata, e te faaturi, te poreneia, e te eiâ, te haavare, e te faaino. 20 O te mau mea ïa e viivii ai te taata; area te amu noa ma te rima horoi-ore-hia ra, e ore te taata e viivii i te reira.

21 Haapai tia ˈtura Iesu i te pae au i Turia e Sidona. 22 E inaha! ua haere maira ia ˈna ra te hoê vahine ati Kanaana no reira iho, ua pii maira ia ˈna, na ô maira, E te Fatu, e te Tamaiti a Davida, e aroha mai oe ia ˈu; ua rahi roa te pohe o tau tamahine i te hoê demoni. 23 Aita râ oia i parau noa ˈtu ia ˈna. Ua faafatata maira ta ˈna mau pǐpǐ, ua parau maitai maira ia ˈna, na ô maira, A tuu atu ia ˈna ia haere na, te pii noa maira oia i muri iho ia tatou. 24 Ua parau atura oia, na ô atura, Aita vau i tonohia mai i ǒ na maori râ i te mau mamoe anaˈe i moe i te utuafare ra o Iseraela. 25 Ua faafatata noa mairâ oia, tahopu maira ia ˈna, na ô maira, E te Fatu ê! e turu mai oe ia ˈu. 26 Ua parau atura oia, E mea au ore ia rave i te maa a te tamarii ra a titiri atu ai na te urî. 27 Ua parau maira oia, Oia mau, e te fatu, te amu nei râ te urî i te huˈa rii maa i mairi no nia i te amuraa a to ratou ra mau fatu. 28 Ua parau atura Iesu ia ˈna, na ô atura, E teie nei vahine e! e faaroo rahi to oe: o ta oe i hinaaro na, ia na reirahia oe. Ora roa ˈtura ta ˈna tamahine i reira ra.

29 Faarue maira Iesu i taua vahi ra, tae atura i te pae roto i Galilea ra; haere atura i nia i te hoê mouˈa, parahi ihora i raro. 30 E e feia rahi tei haere mai ia ˈna ra, i te hopoi-atoa-raa mai i te pirioi, e te matapo, e te vava, e te paruparu, e te mau maˈi ěê atoa e rave rahi, e ua tuu maira i te pae avae o Iesu; faaora ihora oia ia ratou. 31 Maere anaˈe ihora taua feia rahi ra, i te iteraa ratou i te vava i te parauraa, e te paruparu i te oraraa, e te pirioi i te haereraa, e te matapo i te hiˈoraa; haamaitai atura ratou i te Atua o Iseraela.

32 Ua parau atura Iesu i ta ˈna mau pǐpǐ e haere mai ia ˈna ra, ua na ô atura, Te aroha nei au i teie nei feia rahi, i te mea a rui toru aˈenei ratou ia ˈu nei e aita a ratou maa ia amu: e ore au e tuu porori noa ia ratou, oi paruparu noa ratou i te aratia. 33 Ua parau maira ta ˈna mau pǐpǐ ia ˈna, Ei hea ïa maa e noaa ˈi ia tatou i teie nei medebara, e navai ai e paia ˈi teie nei feia rahi? 34 Ua parau atura Iesu ia ratou, E hea a outou pane? Ua parau maira ratou, E hitu, e na iˈa rii. 35 Ua faaue atura oia i taua feia rahi ra e taoto i raro. 36 Ua rave ihora oia i na pane e hitu ra e na iˈa rii ra, haamaitai atura, vavahi ihora, tuu atura i te mau pǐpǐ ra, e na ratou i opere i te taata atoa ra. 37 Amu anaˈe ihora ratou e paia roa aˈera; haaputu ihora i te huˈa rii maa toea ra e î aˈera na ete e hitu. 38 E maha tausani tane i taua feia i amu ra, e te vahine hoi e te tamarii. 39 Ua tuu atura oia i taua feia rahi ra, haere atura oia i nia i te pahi, fano atura i te fenua ra o Magadala.