Mataio

TA HERODA PARAU IA IESU.

14 E ite aˈera te teterareha ra o Heroda i te roo o Iesu i reira ra, 2 Ua parau atura oia i te mau tavini no ˈna ra, O Ioane Bapetizo teie, ua tia faahou mai nei, mai te pohe mai; i rave ai oia i te mau semeio nei.

3 Na Heroda hoi i haru ia Ioane, e ua ruuruu ia ˈna, e ua tuu ia ˈna i roto i te tapearaa, no Herodia, te vahine a tana taeae a Philipa. 4 I parau na hoi Ioane ia ˈna, E ore e au i te ture ia faaipoipo oe ia ˈna. 5 Ua tia hoi ia Heroda te taparahi ia ˈna, te mǎtaˈu ra râ oia i te taata, o tei manaˈo ïa ia ˈna e, e peropheta oia. 6 Ia tae râ i te mahana fanauraa o Heroda ra, ua ori ihora te tamahine o Herodia i mua i to ratou aro, rearea roa aˈera Heroda. 7 Ua parau atura oia ma te tǎpǔ e o ta ˈna e hinaaro i te ani maira, e horoahia ˈtu ïa e ana. 8 E no te mea ua aˈo-ê-hia na oia e tana metua vahine, ua parau maira oia, E ho mai i te upoo o Ioane Bapetizo i roto i te hoê umete. 9 Oto ihora te arii, no te tǎpǔ râ na ˈna ra, e no te mau manihini na ˈna, ua faaue atura oia ia hopoihia mai ia ˈna ra. 10 Ua tono atura oia i te taata, e tâpûhia ihora te upoo o Ioane i roto i te tapearaa ra. 11 Hopoihia maira to ˈna upoo i roto i te umete, e tuuhia maira i taua potii ra; e na ˈna i hopoi atu i tana metua vahine ra. 12 Ua tii atura ta ˈna mau pǐpǐ i te tino, hopoi atura e tanu, e ua haere maira e faaite mai ia Iesu. 13 E ite aˈera Iesu i taua parau ra, haere huna ˈtura oia i nia i te hoê pahi reva ˈtura i te tahi vahi moemoe; e ite aˈera te taata ua pee atura ia ˈna na uta, no roto i te mau oire.

14 E tei te tipaeraa ra ite atura Iesu i te taata e rave rahi aroha ˈtura oia ia ratou; e faaora ihora i to ratou feia maˈi. 15 E toihoiho atura te mahana, ua haere maira ta ˈna mau pǐpǐ, ua na ô maira ia ˈna, E vahi moemoe teie, e ua poto te mahana, e tuu atu i teie nei feia rahi ia haere na i te mau oire rii e hoo i te maa na ratou. 16 Ua parau atura Iesu, Eiaha ratou e haere, na outou e hopoi atu i te maa na ratou. 17 Ua parau maira ratou ia ˈna, E pae roa a tatou pane i ǒ nei e na iˈa hoi e piti. 18 Ua na ô atura oia, A hopoi mai i ǒ nei ia ˈu nei. 19 Ua parau atura oia i taua feia rahi ra, e taoto i raro i nia i te aretu, ua rave ihora oia i na pane e pae ra e na iˈa e piti ra, hiˈo atura i nia i te raˈi, haamaitai ihora, vavahi ihora i te mau pane, tuu atura i te mau pǐpǐ ra; e na ratou i opere na te mau taata atoa ra. 20 Amu anaˈe ihora ratou e paia aˈera, haaputu ihora i te toea maa e î aˈera na ete rarahi hoê ahuru ma piti. 21 E pae paha tausani tane taua feia i amu ra, te vai ra hoi te vahine e te tamarii.

22 Ua faaue atura Iesu i ta ˈna mau pǐpǐ e haere i nia i te pahi e fano na mua i te tahi paeau ra, a tuu atu ai oia i taua feia rahi ra. 23 E oti aˈera taua feia rahi ra i te tuuhia ˈtu e ana, haere atura oia anaˈe ra i nia i te hoê mouˈa e pure, e rui noa ihora oia i reira. 24 Tei ropu atura te pahi i taua roto ra i reira, i te tiria-haere-raahia e te mataare, te na mua maira hoi te mataˈi. 25 E tae aˈera i te maha o te araraa o te rui ra, haere atura Iesu ia ratou ra i na nia i te are. 26 E ite maira te mau pǐpǐ ia ˈna i te haere-noa-raa ˈtu na nia i te are, huehue atura ratou, na ô aˈera, E tupapau! e ua auě ihora i te mǎtaˈu. 27 Ua parau atura râ Iesu ia ratou i reira ra, na ô atura, A faaitoito, o vau, eiaha e mǎtaˈu. 28 Ua parau maira Petero ia ˈna, na ô maira, E te Fatu, o oe ra, e parau mai ia ˈu ia haere atu vau ia oe na na nia i te are. 29 Ua parau atura Iesu, A haere mai. Tei raro atura Petero faarue maira i te pahi, haere tia ˈtura ia Iesu ra na nia i te are. 30 Ia ite râ oia i te uˈana o te mataˈi, mǎtaˈu ihora, e te paremo ra i raro ua pii atura, E te Fatu, ia ora vau. 31 Ua faatoro maira Iesu i tana rima i reira ra, haru maira ia ˈna, na ô maira, E teie nei taata faaroo haraini, eaha oe i mǎtaˈu ai? 32 E tae maira raua i nia i te pahi ra, pohe ihora te mataˈi. 33 Ua haere maira to te pahi, ua tipapa maira ratou i raro i mua i tana aro, na ô maira, E tamaiti mau â oe na te Atua.

34 E tae atura ratou i te tahi paeau ra, tipae atura ratou i te fenua ra i Genesareta: 35 e ite aˈera to reira ia ˈna, ua tono atura i te taata e ati noa ˈˈe taua fenua ra, ua hopoi maira i te feia atoa i pohe i te maˈi ia ˈna ra, 36 o tei ani mai ia ˈna ia faatiaia iti noa ˈtu ratou i to ˈna hiti ahu; e te feia atoa i faatiaia ra, ua ora roa ïa.