Mataio

TE HAAVARE A TE MAU PHARISEA.

16 Ua haere maira te mau Pharisea e te Sadukea ia ˈna ra, ua ani râmâ maira ia ˈna i te hoê tapao no nia i te raˈi. 2 Ua parau atura oia ia ratou, na ô atura, Ia tae i te ahiahi ra, te parau na outou e, E riro i te raumai, e raˈi uraura. 3 E ia poipoi ra, e verohia auanei; te uraura nei hoi te raˈi e te rumaruma. E te mau haavare e, te ite na outou i te hiˈo i te huru o te raˈi, aita râ outou e ite i te mau tapao o teie nei anotau? 4 E titau â te ui taata iino e te faaturi i te tapao; aita râ e tapao e horoahia ˈtu, maori râ te tapao i te peropheta ra ia Iona. Faarue ihora oia ia ratou, reva ˈtura.

5 Ua aromoina i te mau pǐpǐ te hopoi atoa i te pane a fano ai ratou i te tahi paeau ra. 6 Ua parau atura Iesu ia ratou, E faaitoito, e ara i te faahopue a te mau Pharisea e te Sadukea. 7 Ua feruri noa ihora ratou ratou iho, na ô aˈera, No te mea aore tatou i hopoi atoa mai i te pane. 8 Ite aˈera râ Iesu, ua na ô atura ia ratou, E te feia faaroo tapetepete e, eaha outou i feruri noa ˈi i roto ia outou iho, i te mea aore outou i rave atoa mai i te pane? 9 Aitâ outou i ite? e aore i haamanaˈo i na pane e pae e na tausani hoi e pae ra, e na ete rarahi ta outou i faaî i te toea maa ra? 10 E na pane hoi e hitu e na tausani e maha ra, e na ete hoi ta outou i faaî ra? 11 Eaha hoi outou i ore i ite ai, e e ere i to te maa te parau ta ˈu i parau atu ia outou na e, e ara i te faahopue a te mau Pharisea e te Sadukea? 12 Ite atura ratou e, e ere i to te faahopue maa ta ˈna i parau mai ia ratou ra e e ara, o te parau râ a te mau Pharisea e te Sadukea.

13 E te haere tia ˈtura Iesu i te pae fenua i Kaisarea Philipi ra, ua ui atura oia i ta ˈna mau pǐpǐ, na ô atura, O vai au te Tamaiti a te taata nei i ta te taata nei parauraa? 14 Ua parau maira ratou, O Ioane Bapetizo ta vetahi, o Elia ta te tahi pae, o Ieremia hoi, e o te hoê i te mau peropheta ra ta vetahi. 15 Ua parau atura oia ia ratou, O vai râ vau nei i ta outou na parauraa? 16 Ua parau maira Simona Petero, na ô maira, O te Mesia oe, te Tamaiti a te Atua ora ra. 17 Ua parau atura Iesu ia ˈna, na ô atura, E ao to oe, e Simona Bare-iona, e ere na te taata i faaite mai ia oe i te reira, na tau Metua râ i te ao ra. 18 E parau atoa ˈtu vau ia oe, O Petero oe, e ei nia iho i teie nei pǎpǎ e patu ai au i tau ekalesia, e e ore roa ïa e noaa i te uputa o hade. 19 E e horoa ˈtu hoi au i te mau taviri o te basileia o te ao ra ia oe e ta oe e haamau i raro nei, e haamau-atoa-hia ïa i te ao; e ta oe e tuu i raro nei, e tuu-atoa-hia ïa i te ao. 20 Ua aˈo atura oia i ta ˈna mau pǐpǐ, eiaha roa e faaite i te taata, e o te Mesia oia o Iesu.

21 I reira Iesu i te faaiteraa ˈtu i ta ˈna mau pǐpǐ, e e haere oia i Ierusalema e e rahi to ˈna hamani-ino-hia i reira e te feia paari, e te mau tahuˈa rarahi ra, e te mau papai parau, e e taparahi-pohe-roa-hia hoi, e e faatia-faahou-hia oia ia tae i te rui toru ra. 22 Ua aratai iti ê atura Petero ia ˈna, ua aˈo atura, na ô atura, Eiaha roa ïa, e te Fatu, eiaha roa oe ia na reirahia mai. 23 Ua fariu maira oia, na ô maira ia Petero, E haere ê atu oe, e tena na enemi, e turoriraa oe na ˈu, aore hoi oe i au i ta te Atua ra, o ta te taata râ ta oe i au. 24 Ua parau atura Iesu i ta ˈna mau pǐpǐ, O te taata i hinaaro i te pee mai ia ˈu, e faarue oia ia ˈna iho, a rave ai i ta ˈna satauro, a pee mai ai ia ˈu. 25 O tei hinaaro hoi i te tapea i to ˈna ora, e ere ïa i te ora; e o tei tia ia ˈna i te tuu i to ˈna ora ia ˈu nei, e roaa ïa ia ˈna te ora. 26 Eaha ta te taata faufaa i noaa, ia noaa ia ˈna te taoˈa atoa o teie nei ao, ia ere oia i te ora? eaha hoi ta te taata e ore e horoa ei hoo i to ˈna iho ora? 27 E tae mai hoi te Tamaiti a te taata ma tana ra mau melahi atoa, e te hanahana o to ˈna ra Metua, ei reira oia e faautua mai ai i te taata atoa ia au i ta ˈna ra ohipa. 28 Oia mau teie ta ˈu e parau atu ia outou nei, O te tahi pae i teie nei feia e tia mai nei, e ore ïa e ite i te pohe, e ite ai ratou i te Tamaiti a te taata i te taeraa mai i to ˈna ra basileia.