Hosea
TE TAHOO A TE ATUA I TE HARA O TE TAATA E TE FEIA TAHUˈA ATOA RA.
4 E faaroo mai, e te tamarii a Iseraela, i te parau a Iehova: e mârôraa hoi ta Iehova i te mau taata o te fenua nei, no te mea, aita e parau mau, aore e aroha, aore hoi e ite i te Atua i te fenua nei. 2 I te tuhi, e te haavare, e te taparahi taata, e te eiâ, e te faaturi, ua rave uˈana ratou, e ua taea te tahi toto i te tahi. 3 E teie nei, e mihi te fenua nei, e te feia atoa i parahi i nia iho, e riro ïa i te taiâ, e te mau puaa atoa o te fenua nei, e te mau manu o te reva; e te iˈa atoa o te tai ra, e ravea-ê-hia ïa. 4 Eiaha râ te hoê e patoi atu, eiaha te hoê e aˈo atu i te tahi; e au hoi to oe ra mau taata i te feia e mârô atu i te tahuˈa ra. 5 E teie nei, ei te ao oe e hiˈa ˈi, e mairi atoa hoi te peropheta e oe atoa i te rui, e e tâpû-ê-hia e au to metua vahine ra.
6 Ua pohe to ˈu ra mau taata i te ite ore; no te mea na oe, e te tahuˈa, i faarue i te ite, e faarue atoa vau ia oe eiaha ei tahuˈa na ˈu nei; no te mea ua haamoe oe i te ture a to Atua, e haamoe atoa vau i to mau tamarii. 7 Te tupu ra ratou i te rahi, e te rahi atoa ra ta ratou hara ia ˈu nei; e teie nei, e faariro vau i to ratou maitai ei mea haama. 8 Te amu ra ratou i te mau taraehara a to ˈu ra mau taata, e te haamau nei i to ratou aau i ta ratou parau ino. 9 E riro hoi mai ta te taata ra, o ta te tahuˈa atoa ra â ïa: e tahoo atu vau i ta ratou parau i nia ia ratou ra, e ta ratou i rave ra e faautua ˈtu vau ia ratou. 10 E amu hoi ratou, e ore râ e paia: e taiata hoi ratou, e ore râ e rahi: ua ore hoi ratou ua haapao ia Iehova. 11 E riro ê te aau i te taiata, e te uaina, e te uaina apî.
12 Te ui nei to ˈu mau taata i te raau, e na te raau e faaite mai ia ratou, na te aau taiata i hape ai ratou, e ua faarue ratou i to ratou Atua. 13 Te hopoi nei ratou i te tusia i nia i te tupuai mouˈa ra, e ua tutui i te mea noˈanoˈa i nia i te mau aivi, i raro aˈe i te mau aluna, e te lebene, e te ale, no te mea e raau marumaru maitai: e teie nei, te taiata nei ta outou mau tamahine, e te faaturi nei ta outou mau vahine. 14 E ore au e tahoo atu i ta outou mau tamahine ia taiata ra, e ta outou mau vahine ia faaturi ra, ua amui hoi ratou i roto i te mau taiata ra, e ua faatusia ratou e te mau faaturi atoa ra; e teie nei, e riro te feia ite ore ra i te hiˈa.
15 Ia taiata noa oe, e Iseraela, eiaha râ Iuda ia harahia; eiaha outou e tae i Gilagala, eiaha hoi outou e haere i Bete-avena, eiaha hoi outou e tǎpǔ e, Te ora ra Iehova. 16 Te pahee nei Iseraela i muri, mai te puaatoro ufa e pahee ra: e teie nei, e faaamu Iehova ia ratou mai te fanauˈa mamoe i te vahi atea ra. 17 Ua ati Epheraima i te mau idolo: e vaiiho noa ˈtu. 18 Ua oti anaˈe ta ratou inu faataeroraa, tei te taiata ihora ratou: ua hinaaro to ratou mau tavana i te mea haama. 19 Ua rave uˈana te mataˈi ia ˈna i to ˈna pererau, e haama ratou i ta ratou mau fata.