Hosea
TA TE ATUA RA UTUA I TE FEIA TAHUˈA E TE TAATA ATOA.
5 E faaroo mai na i teie, e te feia tahuˈa; e fariu mai i to outou tariˈa, e te utuafare o Iseraela; e faaroo mai outou, e te fare o te arii e; ua faaitehia te parau e au ia outou, no te mea ua riro outou ei marei i Mizepe, e ei upeˈa hohorahia i nia ia Tabora. 2 E pau rahi ta te feia patiatia ra, e teie nei, o ratou atoa ra ta ˈu e aˈo. 3 Ua ite au ia Epheraima, e aore hoi Iseraela i moe ia ˈu; e teie nei, ua taiva ê oe, e Epheraima, e ua viivii Iseraela i te idolo. 4 O ta ratou e rave ra i ore i tia ˈi ia ratou ia fariu i to ratou Atua: e aau taiata hoi tei roto ia ratou, e ore ratou e ite ia Iehova. 5 Te teoteo o Iseraela tei faahapa ia ˈna ra; e teie nei, e hiˈa Iseraela e o Epheraima i ta raua hara; o Iuda e ratou atoa ra i te hiˈaraa. 6 Ma ta ratou mau nǎnǎ mamoe e ta ratou mau nǎnǎ puaatoro ia haere ratou e imi ia Iehova; e ore râ ratou e ite ia ˈna; ua haere ê hoi oia ia ratou. 7 Ua haavare ratou ia Iehova; e tamarii ěê anaˈe ta ratou i fanau: e teie nei, e pau ratou e ta ratou mau tufaa atoa i te marama hoê ra.
8 A faaoto na i te supheri i Gibea, e te pu i Rama: e tiaoro hua i Bete-avena, te auau maira te enemi ia oe, e Beniamina. 9 E ano Epheraima i te mahana e aˈohia ˈtu ai ra: te faaite nei au i te parau e tupu mau i te mau opu o Iseraela nei. 10 Ua riro te hui arii o Iuda mai te feia i hopoi ê i te tapao fenua; e ninii atu vau i tau riri i nia ia ratou mai te pape e niniihia. 11 Ua teiaha Epheraima e ua haaparuparuhia e te ati, no te mea ua pee oia ma te aau atoa i te parau i faauehia ra. 12 E teie nei, e riro vau mai te manumanu ia Epheraima, e mai te tahuti i te utuafare o Iuda. 13 Ite aˈera Epheraima i to ˈna maˈi, e Iuda i to ˈna puta; ua haere ihora Epheraima i Asura, e ua tono Iuda i te vea i te arii ra ia Iareba: aore râ i tia ia ˈna ia faaora ia outou, e to outou puta aore i ora ia ˈna. 14 E riro mau vau mai te liona ia Epheraima, e mai te liona apî i te utuafare o Iuda: o vau nei, e hahae au, e ua haere ê: na ˈu e hopoi ê atu, e aore roa e faaora. 15 E haere au, e hoˈi i to ˈu ra vahi e ia faˈi mai ratou i to ratou ino, e ia imi mai i to ˈu nei mata. Ia roohia ratou i te ati ra, e imi vave mai ïa ratou ia ˈu.