Daniela

TO DANIELA FAAHAEHAARAA, I HOROAHIA MAI AI TE ORAMA IA ˈNA.

10 Tae aˈera i te toru o te matahiti o te arii o Peresia ra o Kuro, i faaitehia mai ai te tahi parau ia Daniela, o tei mairihia o Beletesazara; e parau mau ra taua parau ra, o te taime râ i haapaohia ra, te maoro ra ïa: ua haapao atura oia i taua parau ra, e ua ite hoi i te orama. 2 I mihi noa na vau nei o Daniela, e a toru atura o ˈu nei hebedoma i te mihiraa i reira. 3 Aore a ˈu e maa maitatai i amu; aore hoi e puaa e te uaina i ô mai i roto i tau vaha, e aore roa vau i faatahinu ia ˈu iho, e hope aˈera na hebedoma e toru atoa ra. 4 E tae aˈera i te mahana taau ma maha o te marama matamua ra, ia ˈu i parahi i te hiti o taua pape rahi ra o Hidekela; 5 ua nânâ aˈera vau i tau mata i reira, e ua hiˈo atura vau, e ite atura i te hoê taata i te ahuraa i te vavai, e ua tatuahia tana tauupu i te auro maitai no Uphaza; 6 e au hoi to ˈna tino i te tarisisa, e mai te uira to ˈna mata, e na mata no ˈna ra mai te lamepa auahi e ama ra, e na rima e na avae no ˈna ra, mai te veo faaanaanahia ra ïa, e te haruru o tana reo, mai te reo ïa o te hoê tiria rahi ra. 7 O vau anaˈe nei o Daniela tei ite i taua orama nei; aore hoi te mau taata i pihai iho ia ˈu ra i ite i taua orama nei; roohia ihora râ ratou e te mǎtaˈu, e ua horo atura e tapuni. 8 Toe ihora o vau anaˈe ra, ite atura vau i taua orama rahi nei, e aita ˈtura o ˈu e puai toe i roto ia ˈu, riro atura hoi taua puai no ˈu ra mai te mea tahuti, e aore roa o ˈu e puai i toe. 9 Te faaroo atura râ vau i te haruru o ta ˈna parau; e i to ˈu faarooraa i te haruru o ta ˈna parau, mairi matapouri noa ˈtura vau i raro tau mata i te repo.

10 E inaha, ua faatiaia maira te hoê rima ia ˈu, e ua faatia mai ia ˈu i nia au turi e o au apu rima. 11 Ua na ô maira oia ia ˈu, E Daniela, e te taata here-rahi-hia ra, ia ite mai oe i te parau ta ˈu e parau atu ia oe na, e tia hua mai i nia: i tonohia mai hoi au ia oe nei i teie nei. E oti aˈera te reira parau ia ˈu nei, tia ihora vau ma te rurutaina. 12 Ua na ô maira oia ia ˈu, Eiaha e mǎtaˈu, e Daniela; mai te mahana matamua mai â hoi ia oe i fariu i to aau i te imiraa i te ite ra, e te faahaehaaraa ia oe iho i mua i te aro o te Atua, ua faaroohia ta oe i ani i reira, e i haere mai ai hoi au nei no taua ani na oe ra. 13 O te arii râ o te basileia ra o Peresia tei patoi mai ia ˈu e a piti aˈenei ahuru hoê tiahapa i te mahana: e inaha, o Mikaela, te hoê arii rahi, tei haere mai e tauturu ia ˈu; i maoro ai hoi au i reira i ǒ te mau arii no Peresia ra. 14 I haere mai nei hoi au e faaite ia oe i te tupu i nia iho i to oe ra mau taata i te mau mahana hopea ra: e maoro râ e tupu ai taua orama nei.

15 E oti aˈera teie nei parau i te parauhia mai e ana ia ˈu nei, ua fariu ihora vau i tau mata i raro i te repo, e riro atura vau ei vava. 16 E inaha, ua faatiaia mai te hoê mai te tamaiti a te taata nei te huru i tau utu: matara aˈera tau reo, e ua parau ihora vau, na ô atura vau i tei tia mai i mua ia ˈu ra, E tau fatu, ua hoˈi mai te oto i nia ia ˈu i teie nei orama, e aita ˈtura o ˈu e puai e vai nei. 17 Eaha hoi e tia ˈi i te tavini o tau fatu nei ia paraparau atu i tau fatu nei? area vau nei aita rea o ˈu puai i toe i roto ia ˈu nei, e aore rea o ˈu aho e vai nei i roto ia ˈu. 18 Ua faatiaia faahou maira te hoê mai te taata te huru ra ia ˈu, e ua faaetaeta maira ia ˈu. 19 E ua na ô maira, Eiaha e mǎtaˈu, e tera ra taata here-roa-hia ra, ia ora na oe, e faaetaeta, oia ïa, e faaetaeta. E oti aˈera ta ˈna parauraa mai ia ˈu ra; ua etaeta ihora vau, e ua na ô atura, E parau noa mai oe, e tau fatu; ua faaetaeta mai hoi oe ia ˈu. 20 Ua na ô maira oia, Ua ite oe i tau tere i haere mai ai au ia oe nei? e teie nei, teie au a hoˈi e aro i te arii no Peresia; e ia reva vau ra, inaha, e riro i te haere mai te arii no Iavana. 21 E faaite atura râ vau ia oe i tei papaihia i roto i te parau mau ra: e aore roa e tauturu mai ia ˈu i teie nei mau parau, maori râ o to outou arii, o Mikaela.