Daniela

TO DANIELA FAAHAEHAARAA, E TE PURERAA IA FAAORAHIA IERUSALEMA.

9 I te matahiti matamua o Dariu a Ahasueru, no te huaai o Medai, e arii i nia i te fenua o te Kaladaio; 2 i te matahiti matamua o to ˈna ra hau, i ite ai au nei o Daniela i te mau buka ra i te matahiti i te taioraa, i tae mai ai te parau a Iehova i te peropheta ra ia Ieremia, e ia hitu aˈe ahuru i te matahiti i te anoraa Ierusalema e hope ai. 3 Ua hiˈo atura vau i nia i te Fatu ra i te Atua, i te imiraa i te pure, e te aniraa, e te haapaeraa maa, e te ahu oto, e te rehu auahi: 4 ua pure atura vau i tau Atua ra ia Iehova, e ua faˈi atura vau, na ô atura, E te Fatu, e te Atua rahi, e te mǎtaˈu, i te haapao-maite-raa i te faufaa e te aroha i te feia hinaaro mai ia oe ra, e tei haapao i ta oe ra parau; 5 ua hara matou, ua rave i te parau ino, ua faatia i te taiata, e ua taiva, i te faarueraa i ta oe i faaue e ta oe faaauraa: 6 e aita aˈenei matou i faaroo i to mau tavini i te mau peropheta ra, o tei parau mai i to oe ra iˈoa i to matou mau arii, e to matou feia mana, e to matou mau metua, e te taata atoa o te fenua nei. 7 Tei ia oe, e te Fatu e, te parau-tia, area matou nei, o te mata haama ïa, o tei iri mai i nia ia matou i teie nei; i te taata o Iuda, e to Ierusalema, e to Iseraela atoa e fatata nei, e to te atea ê, i te mau fenua atoa i tiahihia ˈi ratou e oe, no to ratou ino i ravehia e ratou ia oe ra. 8 E te Fatu e, no matou mau â te mata haama, to matou mau arii, to matou feia mana, e to matou mau metua, no te mea ua rave matou i te hara i mua ia oe ra. 9 Tei te Fatu ra, tei to matou Atua, te aroha e te faaoreraa i te mau hara, taiva noa ˈi tatou ia ˈna; 10 e aore aˈenei i faaroo i te reo o to tatou Atua ra o Iehova, ia haapao atu i ta ˈna mau ture i tuuhia mai e ana i mua ia tatou e tana mau tavini te mau peropheta ra. 11 O Iseraela atoa hoi tei hapa i te ture na oe ra, e ua faarue e aore i faaroo i to oe reo; i manii mai ai te katara i nia ia tatou nei, e te tǎpǔ i papaihia i roto i te ture a te tavini o te Atua ra a Mose, no te mea ua hara tatou ia ˈna. 12 Ua haapapu hua hoi oia i ta ˈna mau parau i parau mai ia tatou nei, e to tatou mau haava tei haava mai ia tatou ra, i te hopoiraa mai i teie nei ati rahi: aore roa hoi e raveraa i raro aˈe i te raˈi atoa nei mai te rave ia Ierusalema nei. 13 Mai tei papaihia i roto i te ture a Mose ra, o teie nei atoa ïa ati i te iriraa mai i nia ia tatou nei: aita râ tatou i riro ei feia ani i te ora i te aro o to tatou Atua ra o Iehova, i te fariuraa mai i ta tatou mau parau ino, e te haapaoraa i ta oe ra parau mau. 14 I tiai ai hoi Iehova i taua ati nei, e i tuu mai ai i nia ia tatou nei: e parau-tia anaˈe hoi ta to tatou Atua ta Iehova i te mau mea atoa ta ˈna e rave nei: aore aˈenei hoi tatou i faaroo i tana reo.

15 E teie nei, e te Fatu, e to matou Atua, o tei aratai mai i to mau taata mai te fenua ra mai Aiphiti ma te puai rahi, e ua itea to oe iˈoa, mai tei teie nei mahana; ua hara matou, ua rave matou i te parau ino. 16 E te Fatu, i tei au hoi i ta oe atoa ra mau parau-tia, te tau atu nei au ia oe, ia fariu-ê-hia hoi to riri e to riri tahoo i to oe ra oire i Ierusalema, i to mouˈa moˈa ra: no te mea no ta matou nei hara, e no te mau hara a to matou metua, o Ierusalema e to oe ra mau taata, tei riro ei tâhitohitoraa na te feia atoa e haaati mai ia matou nei. 17 E teie nei, e to matou Atua, e faaroo mai oe i te pure a to tavini nei, e ta ˈna e ani nei; no te Fatu nei hoi, e faaanaana mai hoi i to mata i nia i to vahi moˈa e ano nei. 18 E fariu mai i to tariˈa, e tau Atua, e faaroo mai, e hiˈo mai hoi to mata, ia ite mai oe i to matou pau, e te oire i mairihia i to oe nei iˈoa: e ere hoi no ta matou parau-tia i pure atu ai matou ia oe, no to oe râ aroha rahi. 19 E te Fatu e, e faaroo mai; e te Fatu e, e faaore mai i te hara; e te Fatu e, e haapao mai e e rave hoi; eiaha e faaroaroa, i to oe iho hoi iˈoa, e tau Atua; no te mea ua mairihia to oe oire e to oe ra mau taata i to oe iho iˈoa.

20 Te parau noa ra vau, e te pure noa ra, e te faˈi noa ra vau i ta ˈu nei hara e te hara a tau mau taata nei a Iseraela, e te faaite ra vau i ta ˈu aniraa i te aro o tau Atua o Iehova, no te mouˈa moˈa o tau Atua; 21 te parau noa ra vau i taua pure na ˈu ra, o taua taata ra o Gaberiela, o ta ˈu hoi i ite i te orama i mutaa ihora, i te maue-oioi-raa mai e ua tae maira ia ˈu nei i te taime i te tusia ahiahi ra. 22 Ua faaite maira oia ia ˈu, ua parau maira ia ˈu, na ô maira, E Daniela, i haere mai nei au e faaite ia oe i teie nei mau parau. 23 I te haamataraa i taua pure na oe ra i reva mai ai te parau nei ta ˈu e haere mai e faaite, no te mea ua here-rahi-hia oe: a haapao mai hoi i taua parau nei, e haamanaˈo hoi i te orama. 24 E hitu ahururaa i te hebedoma i haapaohia i to oe ra mau taata, e to oe ra oire moˈa, ei opaniraa ˈtu i te hara, ei faaotiraa ˈtu i te mau ino, ei tatararaa ˈtu i te hara, e ei faaôraa mai i te parau-tia mure ore ra, ei opaniraa ˈtu i te orama e te tohu ra, e ei faatahinuraa i tei Moˈa Rahi ra. 25 E teie nei, e faaroo mai ia ite, e mai te tuuraa i taua parau i te rave faahou e te patu ia Ierusalema e te Mesia te Arii ra, e hitu ïa hebedoma, e na hebedoma hoi e ono ahuru e piti tiahapa: e patu-faahou-hia hoi te mau aroâ, e te mau aua, i te anotau ati rahi ra. 26 E hope aˈera na hebedoma e ono ahuru e ma piti, e tâpû-ê-hia ˈi te Mesia, e ere râ nona iho. No reira te mau taata o te arii e haere maira e haamou ai i te oire e te vahi moˈa; e motu ê atu hoi ratou mai te riro pape pue ra; e vai â hoi taua mau pau ra e hope roa aˈera te tamaˈi. 27 E haapapu hoi oia i te hoê faufaa i te taata atoa e rave rahi e hoê aˈera hebedoma: ei ropu i taua hebedoma e faaore ai oia i te tusia e te ô ia ore; e riro ei roto i te hiero taua mea riaria faaano ra; e tuuhia hoi te reira no te pau e tae noa ˈtu i te hopea i haapaohia ra.