Daniela

TO PERESIA PAU I TE ARII O IAVANA I FAAITEHIA NEI.

11 I ta ˈu i tia i pihai iho i te matahiti matamua ia Dariu e ati Medai, ei faaitoito e ei faaetaeta ˈtu. 2 E teie nei, e faaite atu vau ia oe i te parau mau. Inaha, e tootoru â arii e tia mai i nia i Peresia; e te toomaha ra e taoˈa rahi roa ta ˈna i ta ratou atoa ra: e ia tupu oia e ia etaeta, no te rahi o ta ˈna ra taoˈa, na ˈna e faatiarepu i te taata atoa ei rave i taua fenua ra ia Iavana. 3 Ei reira e tia mai ai te hoê arii rahi, e ma te mana rahi to ˈna hau, e ma te haapao i to ˈna ihora hinaaro. 4 Ia haapapuhia ra oia, e parari ai to ˈna basileia, e operehia ïa ia maha tufaa, i na mataˈi e maha o te raˈi ra, eita râ e riro no to ˈna iho huaai, e ore hoi e au i to ˈna mana a mana ˈi oia ra: e taihitumuhia hoi to ˈna basileia, e riro hoi no vetahi ê atu â.

5 Ei reira e etaeta ˈi te arii no apatoa; e riro râ to ˈna re i te tahi taata rahi i ǒ na ra, e oia ˈtura tei mana; e riro hoi taua mana no ˈna ra ei mana rahi. 6 E ia mahemo e fanu pue matahiti, e amui ai ratou ra; e riro hoi te tamahine o te arii i apatoa ra i te haere mai i te arii no apatoerau ra a faaauau ai i te auraa; eita râ te mana o te rima e mau ia ˈna, e ore hoi oia e mau e to ˈna huaai: e tuua-ê-hia ra oia, e te feia i aratai mai ia ˈna, e ta ˈna tamaiti, e te feia atoa i turu mai ia ˈna i taua anotau ra.

7 No te ohi râ no te aa no ˈna te hoê i te tiaraa mai ei mono ia ˈna, e haere mai ïa ma te nuu atoa, e tomo hoi i te pare no te arii i apatoa, e rave hoi i te reira, e riro te re ia ˈna: 8 e to ratou mau atua atoa, e te mau hohoˈa i faatôhia ra, e ta ratou mau farii ario maitatai ra e te auro, o ta ˈna ïa e rave mai ei taoˈa pau i Aiphiti ra; e mana ˈi oia i taua arii i apatoerau ra i e fanu pue matahiti. 9 E ia tae oia i te basileia no te arii i apatoa, e hoˈi mai oia i to ˈna ihora fenua mau.

10 E riro râ ta ˈna mau tamarii i te amui i te tamaˈi, etaeta rahi ta ratou e haaputu: e tae mai hoi te hoê, e manii noa mai ïa, e reva roa hoi na roto, e e hopoi roa hoi i te tamaˈi e tae noa ˈtu i te pare. 11 Rahi roa aˈera te riri o te arii i apatoa, e ua haere mai i rapae e ua aro, i taua arii i apatoerau ra; e feia rahi roa ihora ta ˈna e haamau i te aro, e tuuhia ˈtura te rahi atoa ra i tana rima. 12 E ia hopoi-ê-hia e ana taua rahi ra, e hopoi-teitei-hia tana aau; e rave rahi noa iho te tausani i hiˈa ia ˈna, e ore â e riro te re ia ˈna. 13 E hoˈi mai hoi te arii i apatoerau ra ma te taata rahi e iti tei a mutaa iho ia haamau i te aro ra, ia mehemo e fanu matahiti ra e tae mai ai, ma te nuu rahi e ma te taoˈa rahi. 14 E ia tae i te reira tau, e rave rahi te tia mai i nia e rave i te arii i apatoa ra: e te mau tamarii mârô o to mau taata ra te faateitei ia ratou iho, ia tupu taua orama ra, e hiˈa râ ratou. 15 E tae mai hoi taua arii i apatoerau ra, e ahu hoi i te repo ia teitei, e rave hoi i te mau oire i auahia ra: e te nuu a to apatoa ra, e te mau taata maitihia no ˈna ra, e ore ïa e mau mai, aita hoi etaeta e mau mai ai ra. 16 O te tii maira, e rave ïa ia ˈna ra, e haapao ïa i ta ˈna i hinaaro ra, e aore roa e taata e mau ai ia patoi ia ˈna; e mau hoi oia i taua fenua hinuhinu ra, e riro hoi i te pupaa atoa ia ˈna.

17 E riro oia i te mârô e faaô atu ma te puai o to ˈna atoa ra basileia; e na reira hoi oia e te feia parau-tia i te amuiraa ˈtu ia ˈna, e horoa hoi oia i te tahi vahine apî na ˈna, ia rave-ino-hia; e ore râ oia e au maitai atu ia ˈna, e ia riro no ˈna. 18 E muri aˈe i te reira, e fariu ai oia i tana mata i te fenua miti fatata, e rave rahi hoi te pau; na te hoê taata mana ra e faaore i taua ino i hurihia i nia ia ˈna ra; e hopoi maira oia i te faaino i nia ia ˈna iho. 19 Ei reira oia e fariu ai i tana mata i te mau pare o to ˈna iho fenua; a turori râ oia e hiˈa ˈtu, e e ore e itea.

20 Ei reira e tia mai ai te hoê mai ia ˈna ra, o te tono i te tahi titau i te hinuhinu o taua basileia ra; e hope aˈera e fanu pue mahana e pohe roa ˈi oia, e ore râ e pohe i te riri, e ore atoa hoi i te tamaˈi. 21 E tia mai hoi mai ia ˈna ra te tahi taata vahavahahia ra, eiaha e horoahia ˈtu te maitai ra o te basileia ia ˈna; e haere hau noa maira oia, e riro te basileia ia ˈna i te taparu. 22 E te nuu o te fenua ninahia ra, e nina-atoa-hia ïa i mua ia ˈna, e e ofatihia; e te arii atoa i haafaufaahia ra. 23 E muri aˈe i te firia parau i faaauhia ia ˈna ra e haavare mai ai oia ra: e tae mai hoi oia, e riro hoi i te etaeta e aita rea e taata. 24 E tae mai hoi oia i te vahi hau e te vahi taoˈa i taua fenua ra; e rave hoi oia i ta to ˈna ra mau metua e to ratou atoa ra mau metua aore i rave: o te taoˈa haru, e te taoˈa pau, e te mau taoˈa atoa ra, o ta ˈna ïa e haapurara haere noa i roto ia ratou, e opua hoi oia i ta ˈna ravea i te mau haapueraa etaeta e tae noa ˈtu i te hoê tau. 25 E faaaraaraa hoi oia i ta ˈna etaeta, e to ˈna itoito ia itoito i te arii no apatoa ma te nuu rahi; e aro mai hoi te arii i apatoa ma te nuu rahi roa e te puai; e ore râ oia e mau mai; e riro hoi ratou i te opua i ta ratou ravea ia ˈna. 26 Oia ïa, na tei amu i ta ˈna ra maa e imi i to ˈna pohe; e e nina-noa-hia tana ra nuu, e hiˈa hoi ratou e rave rahi i raro ma te pohe roa. 27 E te manaˈo o eie nei pue arii toopiti, o te hamani ino ïa, e parau hoi ratou i te parau haavare i te amuraa-maa hoê ra; e ore râ e tupu; ia tae hoi i te tau i haapaohia ra, o te hopea ihora ïa. 28 Ei reira oia e hoˈi ai i to ˈna ihora fenua ma te taoˈa rahi; e no te mea ua opuahia ta ˈna parau eiaha te faufaa moˈa ra, e riro oia i te rave i te hoˈiraa i tana fenua ra.

29 Ia tae i te tau i haapaohia ra, e hoˈi faahou ai oia i te pae i apatoa ra; e ore râ e riro mai tei a mutaa ihora, e mai tei muri aˈe hoi. 30 O te mau pahi o te ati Kitima te tii mai e rave ia ˈna, e riro hoi oia i te inoino; e tano faahou â to ˈna riri i te faufaa moˈa ra, e ia hoˈi ra e faatupu ai: e amui hoi oia i ta ˈna parau i te feia e faarue i te faufaa moˈa ra. 31 E i muri aˈe ia ˈna ra, e tia atoa mai ai te nuu atoa ra, a haaviivii ai i te vahi moˈa i faaetaeta-rahi-hia ra, e ua hopoi ê i te tusia no te mau mahana atoa ra, a tuu atu ai i te mea faufau e ano ai ra i roto. 32 E te feia i hapa i taua faufaa ra e riro i te ino rahi i te taparu ra: o te feia râ i ite i to ratou Atua ra, e riro i te puai, e te haapao. 33 E te feia i haapii i te taata ra e rave rahi tei pii ia ratou; e pohe râ ratou i te ˈoˈe e te auahi, e tîtîhia hoi, e pau hoi i te haru, e rave rahi te mahana. 34 E ia hiˈa ratou ra, e turu-iti-hia mai ratou, e ere râ i te turu rahi; e rave rahi râ tei ati mai ia ratou i te taparu. 35 E hiˈa hoi te tahi pae i taua mau haapii ra, ei tamataraa ˈtu ia ratou, e e tamâ ˈtu, ei faateatea ia ratou, e tae noa ˈtu i te hopea ra: no te mea te vai ra te taime haapaohia. 36 E rave ai taua arii ra i ta ˈna iho i hinaaro; e faateitei oia ia ˈna iho, e faarahi hoi ia ˈna iho ia hau ê i te mau atua atoa ra, e parau hoi oia i te parau-maere-hia i te Atua no te mau atua ra, e riro hoi i te tupu, e ia hope roa te riri i te faatupuhia: o tei haapaohia râ, o te rave-mau-hia ïa. 37 E ore oia e haapao i te Atua o to ˈna ra mau metua, e te hinaaro o te vahine; e ore oia e haapao i te mau atua atoa ra, e faarahi oia ia ˈna iho ia hau i te mau mea atoa ra. 38 I to ˈna ra vahi oia e faatura ˈi i te Atua o te mau vahi etaeta ra; e atua hoi tei ore i itea e to ˈna ra mau metua; ta ˈna ïa e faatura, ma te auro, e te ario, e te mau ofai maitatai, e te mau mea hinaarohia ra. 39 E na reira oia i te haapao i taua mau vahi etaeta roa ra, ma te atua ê atoa, o tei ore e hunahia e ana, e faarahi atu oia i te tura; e haamana ˈtu hoi oia i te taata atoa e rave rahi, e tufa hoi i te fenua ia taoˈahia.

40 Ia tae ra i te taime hopea ra e nenei mai ai te arii i apatoa ra ia ˈna; e haerehia maira oia e te arii no apatoerau ra mai te puahiohio ra, ma te pereoo anaˈe, e te faahoro puaahorofenua ra, e ma te pahi atoa e rave rahi; e faaô atoa ˈtu oia i roto i te mau mataeinaa, e manii noa ˈtu e ua na roto i te haere. 41 E faaô atoa hoi oia i roto i te fenua hinuhinu ra, e rave rahi hoi te fenua e huri-tumu-hia ˈtu; o teie râ te ora i taua rima no ˈna ra, oia hoi o Edoma, e o Moabi, e te rahi hoi o te tamarii a Amona. 42 E faatoro râ oia i tana rima na nia i te mau fenua; e ore atoa hoi te fenua ra o Aiphiti e ora. 43 E mana râ oia i nia i te taoˈa ra i te auro, e te ario, e i nia atoa i te mau taoˈa maitatai i Aiphiti: o to Lubi, e to Kusa, tei ia ˈna atoa ïa. 44 E aehuehu râ oia i te parau no te hitia o te râ mai e no te pae i apatoerau: i haere ai oia ma te riri rahi ia pau, e ia faahope roa te taata e rave rahi no te pohe roa. 45 Na ˈna e haamau i to ˈna iho tiahapa, to ˈna iho fare i ropu i na miti ra i nia i te mouˈa moˈa hanahana ra; e tae râ oia i to ˈna iho hopea, e aore roa o ˈna e tauturu.