Ezekiela

TE ORAMA A TE ATUA I FAAITEHIA ˈTU IA EZEKIELA RA.

8 E tae aˈera i te ono o te matahiti e te ono hoi o te marama, e te pae o te mahana i taua marama ra, ia ˈu ra i parahi noa i roto i tau fare, e te mau taata paari o Iuda i te parahiraa i mua ia ˈu, tei nia maira te rima o Iehova ia ˈu i reira. 2 Ua hiˈo ihora vau, e inaha, e hohoˈa mai te auahi ra te huru: mai te tauupu e o raro, mai te auahi ra ïa, mai te tauupu hoi e o nia, mai te anaana te huru, mai te hesemala te huru. 3 Ua tuu maira hoi oia mai te rima te huru, e ua rave maira i te hoê io rouru no ˈu; ua hopoi aˈera te varua ia ˈu i nia i ropu i te area nei, o te raˈi i nia, e te fenua nei i raro, e ua hopoi maira ia ˈu i te orama a te Atua i Ierusalema, i te uputa i te opani o roto ra, tei fariu tia i te pae i apatoerau ra, i te parahiraa o te idolo faahae ra tei faatupu i te hae. 4 E inaha, tei reira te hanahana o te Atua o Iseraela, mai te orama ta ˈu i ite i te vahi atea ra.

5 Ua parau maira oia ia ˈu nei, E te tamaiti a te taata na, a nânâ na i to mata i te pae i apatoerau ra. Ua nânâ aˈera vau i tau mata i te pae i apatoerau, e inaha, i te uputa o te fata ra, i te pae i apatoerau ra, teie nei idolo faahae ra i te tomoraa ra. 6 Ua na ô maira hoi oia ia ˈu, E te tamaiti a te taata na, te ite ra oe i ta ratou e rave nei? e te parau faufau rahi ta te utuafare ra o Iseraela e rave i teie nei vahi, ia faarue roa vau i tau vahi moˈa nei? a fariu faahou râ e ite ïa oe i te parau faufau rahi roa ra. 7 Ua aratai maira oia ia ˈu i te opani no te aumoa; e ua hiˈo ihora vau, e inaha, e apoo tei roto i te patu. 8 Ua parau maira oia ia ˈu, E te tamaiti a te taata na, a ô na i roto i taua patu ra: e oti aˈera i te ôhia e au ra, inaha, e uputa. 9 Ua na ô maira oia ia ˈu, A haere i roto, a hiˈo i te mau parau ino faufau ta ratou e rave i ǒ nei. 10 Haere atura vau i roto, e ite atura vau; e inaha, te mau mea rii faufau atoa e nee haere ra, e te mau manu faufau ra, e te mau idolo atoa o te utuafare o Iseraela, i te otiotiraahia i nia i te patu e ati noa ˈˈe. 11 Ua tia noa maira na taata e hitu ahuru o te feia paari o te utuafare o Iseraela; e o Iaazania a Saphana i te tia-noa-raa i ropu i te feia i na mua ia ratou i te tiaraa; e vairaa auahi anaˈe tei te rima o taua mau taata atoa ra, pee atura te ata rahi mea noˈanoˈa meumeu ra i nia. 12 Ua parau maira oia ia ˈu, E te tamaiti a te taata na, ua ite oe i ta te feia paari o te utuafare o Iseraela e rave nei i te pouri, te mau taata atoa i roto i te mau piha vairaa hohoˈa no ˈna ra? ua na ô hoi ratou, E ore Iehova e hiˈo mai, ua faarue Iehova i te fenua nei.

13 E ua parau mai ra oia ia ˈu nei, E fariu faahou oe; e ite atu â oe i te rahiraa ˈtu o te parau faufau ta ratou e rave nei. 14 Ua aratai maira oia ia ˈu i te opani o te tomoraa o te fare o Iehova, i te pae i apatoerau ra; e inaha, e vahine anaˈe tei parahi i reira i te otoraa ia Tamuza. 15 Ua parau maira oia ia ˈu, Ua ite oe i te reira, e te tamaiti a te taata nei? fariu faahou oe e rahi atu â ta oe mau parau faufau e ite i teie. 16 Ua aratai maira oia ia ˈu i te aumoa i roto ra, i te fare o Iehova, e inaha, tei te uputa o te hiero o Iehova, i roto i te area i te tomoraa e te fata ra, na taata hoê taau e ma pae, ma to ratou tua i te fariu-tia-raa i te hiero o Iehova, e to ratou mau mata i te fariuraa i te hitia o te râ ra; piˈo tia ˈtura ratou i raro i te mahana i te pae i te hitia o te râ ra.

17 Ua parau maira oia ia ˈu, Ua ite atura oe i te reira, e te tamaiti a te taata na? e mea iti mâmâ anei i te utuafare o Iuda ia rave ratou i te mau parau faufau ta ratou i rave i ǒ nei? ua faaî ratou i te fenua i ta ratou ravea uˈana, e aita i tuutuu i te faaooo mai ia ˈu ia riri: e inaha, te tuu ra ratou i te amaa raau i to ratou apoo ihu. 18 E teie nei, e faatupu atu vau i tau riri: e ore tau mata e faaherehere, e ore hoi au e aroha ˈtu: e tae noa mai to ratou oto rahi i roto i tau tariˈa nei, e ore au e faaroo atu ia ratou.