Ezekiela

TE PAU-ROA-RAA O ISERAELA, E TE ATI RAHI O TE FEIA I ORA ˈTU.

7 E ua tae maira te parau a Iehova ia ˈu nei, na ô maira, 2 Te na ô atoa maira, e te tamaiti a te taata na, te Fatu ra o Iehova, i te fenua o Iseraela ra; E hopea teie e fatata maira, te fatata maira te hopea, i na hiti atoa e maha o te fenua nei. 3 Ua tae mai te hopea i nia ia oe ra; e e faatano atu vau i tau riri i nia ia oe ra, e e haava vau ia oe i ta oe ra parau, e tahoo atu vau i ta oe ra mau parau faufau ia oe ra. 4 E ore tau mata e faaherehere ia oe, e ore hoi au e aroha; e tahoo atu vau i ta oe ra parau ia oe, e ta oe mau parau faufau i roto ia oe ra; e ite hoi outou e, o vau o Iehova.

5 Te na ô maira te Fatu ra o Iehova, Inaha, e ino i te tipaparaa i te ino; 6 e hopea teie e fatata maira, te fatata maira te hopea; te moemoe maira ia oe; inaha, teie. 7 Te fatata nei te poipoi ia oe; e to te fenua nei e, ua fatata te taime: te mahana auê tei fatata nei, eiaha te pinai o te mau mouˈa ra. 8 Teie au a ninii atu i tau riri i nia ia oe ra, e faahope au i tau riri i nia ia oe ra, e e haava vau ia oe i ta oe ra mau parau, e tahoo atu vau i ta oe ra mau parau faufau i nia ia oe. 9 E ore hoi tau mata e faaherehere, e ore hoi au e aroha, e tahoo atu vau ia oe i ta oe ra parau, e ta oe ra mau parau faufau i roto ia oe ra: e ite hoi outou e, o vau teie o Iehova e tairi atu ia outou na.

10 A hiˈo na i taua mahana nei, a hiˈo na, te haere maira: ua mahemo aˈenei te poipoi; ua puâhia te raau, ua ruperupe te teoteo; 11 ua riro te aroha ore ei raau parau ino: e ore hoi ratou, e ore hoi to ratou atoa ra, e te rahi atoa o ratou ra e toe, e ore hoi ratou e otohia. 12 Te fatata maira te taime, te fatata maira te mahana, eiaha tei hoo atu e oaoa; eiaha tei riro ta ˈna ra e mihi: te vai nei hoi te riri uˈana i nia i te taata atoa nei. 13 E ore hoi tei hoo ra e hoˈi mai i ta ˈna i hoo ra, toe noa ˈi ratou i roto i te feia e ora ra: no te taata atoa nei hoi teie nei parau: e ore ïa e tupu, te parau maira Iehova; e ore hoi te hoê e tia ia faaetaeta ia ˈna iho i ta ˈna ra parau ino i te oraraa nei. 14 Ua faaoto ratou i te pu, ia ineine te taata atoa; aita râ te hoê i tae i te aroraa: te vai ra hoi te riri uˈana i nia i te taata atoa ra. 15 Tei rapae te ˈoˈe, e te maˈi ra e te poia tei roto: tei rapae au i te aua ra, e pohe ïa i te ˈoˈe, e tei roto i te oire ra, e pau ïa i te pohe i te poia e te maˈi. 16 O te feia râ e ora ra, o te ora ïa, e riro ïa i nia i te mouˈa ra mai te uupa o te peho ra, i te autâ-paatoa-raa i ta ˈna hara i ta ˈna hara. 17 E riro te mau rima atoa i te ore i te etaeta, e te mau turi atoa ra mai te pape ra te paruparu. 18 E tatua ratou ia ratou iho i te ahu oto, e tapoˈihia ratou e te riaria; e te haama tei nia atoa i to ratou mau mata, e te rouru ore i nia i to ratou atoa ra mau upoo. 19 E faarue ratou i ta ratou ario i roto i te aroâ, e riro hoi ta ratou auro mai te mea viivii ra: e ore hoi ratou e ora i te ario e te auro, i te mahana e riri ai Iehova ra: e ore hoi to ratou hiaai e mâha i te reira, e ore hoi to ratou opu e paia i te reira: e te turoriraa hoi te reira no ta ratou ra hara. 20 Te nehenehe o to ˈna ra unauna, tana ïa i vaiiho maite ei mea hanahana, ua hamani râ ratou i te hohoˈa o ta ratou mau mea faufau ra, e o ta ratou mau mea riaria, i reira: i faariro ai au i te reira ei mea viivii ia ratou. 21 E horoa ˈtu vau i te reira i te rima o te taata ěê ei taoˈa, e te rima o te mau taata parau ino i te fenua nei ei taoˈa pau, e na te reira ratou e haaviivii. 22 E fariu ê hoi au i tau mata ia ratou; e na te taata e haaviivii i tau vahi moe ra; na te haru e tomo i roto, a haaviivii ai.

23 E hamani oe i te tahi fifi na oe ra: ua î hoi te fenua i te hara toto, ua î hoi te oire i te rave uˈana. 24 E e hopoi mai au i te mau fenua aroha ore, e na ratou e parahi i to ratou mau fare; e faaore hoi au i te teoteo o te feia etaeta ra, e haaviiviihia to ratou mau vahi moˈa ra. 25 Te fatata maira te pohe, e imi hoi ratou i te ora, e ore râ e noaa. 26 E tupu hoi te ati na nia iho i te ati, e te tuiraa roo na nia iho i te tuiraa roo; e imi hoi ratou i te orama i te peropheta, e moe râ te ture i te taata tahuˈa, e te aˈo i te feia paari ra. 27 E oto te arii ia ˈna iho, e vehîhia hoi te tamaiti a te arii i te maere; e peapea hoi te rima o te mau taata o te fenua ra: e rave hoi au ia ratou i tei au i ta ratou iho parau, e mai ta ratou mau faaauraa ra, o ta ˈu ïa e faaau atu ia ratou; e ite hoi ratou e, o vau o Iehova.