Ezekiela
TE ORA O TE TAHI PAE, E TE POHE O TE TAHI PAE, I FAAITEHIA MAI.
9 Ua pii atoa maira oia i te reo puai i roto i tau tariˈa, na ô maira, Haafatata maira i te feia i poroihia i teie nei oire, te taata ma te mauhaa taparahi taata ra i tana rima. 2 E inaha, te haere maira na taata tooono i na te eˈa i te uputa i nia ra, e tiraha tia i te pae i apatoerau ra, te taata atoa ma te mauhaa taparahi taata ra i tana rima; e te hoê taata i taua na taata tooono ra, e vavai te ahu, ma te farii inita a te taata papai parau ra i te aoao ra: haere anaˈe atura ratou i roto tia ihora i te hiti o te fata veo ra. 3 Reva ˈtura te anaana o te Atua o Iseraela mai nia i te vairaa ra i nia i te kerubi, e te tomoraa o te fare ra. Ua parau atura oia i te taata i ahu i te ahu vavai ra, tei ia ˈna te farii inita i te aoao ra; 4 ua na ô atura Iehova ia ˈna, E haere na rotopu i te oire, na rotopu i Ierusalema, a tuu ai i te tapao i nia i te rae o te mau taata i autâ noa e ua pii hua, i te mau parau faufau atoa i ravehia i roto ra. 5 Ua na ô atura oia i te tahi pae, o vau tei faaroo, E haere outou na muri ia ˈna i te pee na roto i te oire, a tairi ai: eiaha to outou mata e faaherehere, eiaha outou e aroha: 6 e taparahi hua i te taata paari, e te taata apî, e te paretenia, e te tamariirii, e te vahine: eiaha râ e haafatata noa ˈtu i te taata tei nia ia ˈna te tapao ra; e mata na i ǒ nei na tau vahi moˈa nei i te rave. Ua tamata ˈtura ratou i te rave i te feia paari i mua i taua fare ra. 7 Ua parau atura oia ia ratou, A haaviivii atu i te fare, e faaîî i te mau aumoa i te taata pohe: a haere outou. Haere atura ratou, e ua taparahi i roto i te oire.
8 E te taparahi noa ra ratou ia ratou, te toe ra vau, ua tipapa ihora vau i raro tau mata, e ua pii atura vau, na ô atura, Auê, e te Fatu ra, e Iehova! e haapau roa oe i te toea o Iseraela, i te niniiraa i to riri i nia ia Ierusalema? 9 Ua parau maira oia ia ˈu; Te hara a te utuafare o Iseraela e o Iuda, ua rahi roa ïa, e ua îî hoi te fenua i te toto, ua îî hoi te oire i te mârô: te parau nei hoi ratou e, Ua faarue Iehova i te fenua nei; e aore hoi Iehova e hiˈo mai. 10 E teie nei, o vau nei, e ore tau mata e faaherehere, e ore hoi au e aroha, e tahoo râ vau i ta ratou parau i nia i to ratou iho upoo. 11 E inaha, taua taata i ahu i te vavai ra, na ˈna te farii inita i te aoao ra, ua parau maira i ta ˈna parau, na ô maira, Ua na reira vau i ta oe i faaue mai ia ˈu ra.