Ezekiela
TE MAU PIHA NO TE MAU TAHUˈA RA, E TO REIRA RA MAU PEU.
42 Ua aratai atura oia ia ˈu i te aumoa i rapaeau ra, i te eˈatia ia haere i te pae i apatoerau ra; e ua aratai maira ia ˈu i te piha i mua mai i taua vahi faataahia ra, i mua hoi i te patu i te pae i apatoerau ra. 2 Hoê hanere i te kubiti te maoro i te pae i te uputa i te pae i apatoerau, e pae ahuru i te kubiti i te aano. 3 I mua mai i te mau uputa no te aumoa i roto ra, e i mua mai hoi i te patu no te aumoa i rapae, e piha tiahiti anaˈe i te taatiraa mai i te piha tiahiti, e toru atoa nanai. 4 E i mua mai i taua mau piha ra, e eˈatia ïa hoê ahuru i te kubiti i te aano i roto ra, e eˈa hoi hoê kubiti ra; tei te pae i apatoerau te mau uputa. 5 Te poto ra te mau piha i nia ra; e vahi rahi hoi to reira i riro i te tahi mau piha, iti aˈe to te mau piha i raro e to ropu i taua fare ra. 6 E toru hoi o ratou nanai, aita râ e pou mai te pou o te mau aumoa ra: i pirihao ai te reira, iti ihora to raro roa e to ropu ia faitohia na raro ra. 7 O te patu ra i rapaeau ra i mua mai i te mau piha ra, i te pae i te aumoa i rapae, i mua i te mau piha ra, e pae ahuru ïa kubiti i te maoro. 8 Te maoro o te mau piha i roto i te aumoa i rapaeau ra, e pae ahuru ïa kubiti i te maoro; e inaha, o mua ˈtu i te hiero, hoê hanere ïa kubiti ra. 9 E tei te paeau i raro i taua mau piha nei, o te tomoraa ïa i te pae i te tooa o te râ ra, ia na te aumoa i rapaeau ra i te haere.
10 Teie te aano o taua patu i te aumoa i te pae i te hitia o te râ ra, i mua mai i te vahi i faataahia ra, e i mua hoi i te fare, e piha anaˈe. 11 E te eˈa i mua maira, mai te mau piha atoa i te pae i apatoerau ra, hoê â hete maoro, hoê â hete aano: e to reira tomoraa i rapae hoê â hete, e hoê â hete opani mai te reira atoa ra. 12 E mai te reira atoa te mau opani o te mau piha ra i te pae i apatoa ra; e opani tei te hopea mai o taua eˈa ra, i te eˈa i mua mai i te patu ra ia hiˈo tia i te pae i te hitia o te râ ra, ia na reira i te haere ra.
13 Ua parau maira oia ia ˈu, Te mau piha i te pae i te tooa o te râ ra, e te mau piha i te pae i apatoa ra, i mua i te vahi i faataa-ê-hia ra, e piha moˈa anaˈe ïa, e ei reira te feia tahuˈa e haafatata ˈi ia Iehova ra a amu ai i te mau mea moˈa rahi ra: ei reira hoi vai ai te mau mea moˈa roa ra, te tusia amu, e te tusia no te hara, e te tusia no te hape; e vahi moˈa hoi taua vahi ra. 14 Ua tomo anaˈe te feia tahuˈa i roto ra, eiaha ratou e haere i rapae a tomo ai i roto i te aumoa i rapaeau ra, ei reira râ ratou e vaiiho ai i to ratou ahu i ta ratou i rave i te toroa ra; ua moˈa hoi te reira; a ahu ai i te ahu ěê, a haere atu ai i te vahi no te taata atoa ra.
15 E hope aˈera te fare i roto i te faitohia e ana, ua aratai maira oia ia ˈu i te uputa e hiˈo tia ˈtu i te pae i te hitia o te râ ra, e ua faito ihora e ati noa ˈˈe. 16 Faito ihora oia i te pae i te hitia o te râ ra i te aeho faito ra, e pae hanere ïa i te aeho, i te aeho faito e ati noa ˈˈe. 17 Ua faito ihora oia i te pae i apatoerau, e pae hanere i te aeho, i te aeho faito ra e ati noa ˈˈe. 18 Ua faito ihora oia i te pae i apatoa, e pae hanere i te aeho, i te aeho faito ra e ati noa ˈˈe. 19 E te pae i te tooa o te râ ra, ua faito ihora oia e pae hanere i te aeho i te aeho faito ra. 20 Faito ihora oia i na pae e maha; e aua tei patuhia e ati noa ˈˈe, e pae hanere i te aeho i te maoro, e pae hanere hoi i te aano, ei faataaraa ˈtu i te vahi moˈa ra e te vahi noa.