Ezekiela
TE MAU FAITO, TE MAU PIHA, E TE MAU FAANEHENEHE O TAUA HIERO RA.
41 E muri aˈera, ua aratai maira oia ia ˈu i te hiero, e ua faito ihora i te mau pou, e ono kubiti i te aano i teie paeau, e ono hoi kubiti i te aano i tera paeau, o te aano ïa o te sekene. 2 E te aano o taua opani ra, hoê ïa ahuru i te kubiti; e na hiti i taua opani ra, e pae ïa kubiti i teie paeau, e pae hoi kubiti i tera paeau: e ua faito aˈera oia i te maoro e maha ahuru i te kubiti i te maoro; e te aano ra, e piti ïa ahuru i te kubiti.
3 Ua haere atura oia i roto, e ua faito ihora i te pou no te opani, e piti ïa kubiti; e te opani ra, e ono ïa kubiti; e te aano o taua uputa ra, e hitu ïa kubiti. 4 Ua faito ihora oia i te maoro o te reira, hoê taau ïa kubiti; e te aano hoê taau ïa kubiti, mai te paeau i mua atoa o te hiero ra: e ua parau maira oia ia ˈu, O te vahi moˈa roa ra teie.
5 Ua faito ihora oia i te patu i taua fare ra, e ono ïa kubiti; e te aano o te mau piha i te hiti ra, e maha ïa kubiti e ati noa ˈˈe taua fare atoa ra. 6 E taua mau piha i te hiti ra i nia te tahi i te tahi, e toru ïa nanai, e toru ahuru i te nanairaa; e ua faaôhia ratou i roto i te patu i taua fare ra ia ô taua mau piha ra, ia mau ratou, aita râ o ratou mau i taua patu fare ra. 7 Te faaaanohia ra taua haerea i nia i taua piha rii i te hiti ra, i te taninito haerea, te haere ra hoi i te aanoraa taua haerea o te fare ra e ati noa ˈˈe i te haere i nia ra, e aano atura taua fare ra i nia e tupu atura i te rahiraa; mai te piha i raro roa ra i te haere-noa-raa ratou na te piha i ropu e tae atura i tei nia roa ra. 8 Ua hiˈo atura hoi au i te teitei o taua fare ra e ati noa ˈˈe: te paeau i raro i taua piha rii ra, hoê ïa aeho kubiti rarahi e ono ra. 9 Te meumeu o te patu i te pae i rapae au i taua mau piha rii i te hiti ra, e pae ïa kubiti: e te vahi i toe, no te mau piha hiti ïa no taua fare ra. 10 E te area i taua mau piha ra, hoê taau ïa kubiti i te aano e ati noa ˈˈe taua fare ra, te tahi pae, e te tahi pae. 11 E te mau opani no te mau piha i te hiti ra, tei te pae i faatoehia ïa, tei te pae i apatoerau te tahi opani, tei te pae i apatoa te tahi opani: e te aano o taua vahi i faatoehia ra, e pae ïa kubiti e ati noa ˈˈe.
12 Taua patu ra i mua i taua vahi i faataa-ê-hia ra i te pae i te tooa o te râ ra, e hitu ïa ahururaa i te kubiti i te aano; e te aua i taua vahi patuhia ra, e pae ïa kubiti i te meumeu e ati noa ˈˈe, e te maoro ra, e iva ïa ahururaa i te kubiti. 13 Ua faito ihora oia i mua i taua fare ra e hoê aˈera hanere i te kubiti; taua vahi i faataa-ê-hia ra, e tei patuhia ra, e te aua atoa ra, hoê ïa hanere i te kubiti. 14 E te aano i mua i taua fare ra, e te vahi faataa-ê-hia ra, i te pae i te hitia o te râ ra, hoê ïa hanere i te kubiti. 15 Ua faito ihora oia i te patu i mua i te vahi faataa-ê-hia ra e tei muri mai hoi, e te mau piha teitei, i teie paeau e tera paeau, hoê ïa hanere i te kubiti, e te hiero i roto ra, e te mau poretiko o te aumoa ra: 16 te mau tomoraa, e te mau haamaramarama pirihao, e te mau piha teitei e ati noa ˈˈe na nanai e toru ra, i mua ˈtu i te mau uputa, ua tapoˈihia ïa i te raau e ati noa ˈˈe, mai raro i te repo e tae noa ˈtura i te haamaramarama; e ua tapoˈihia te mau haamaramarama; 17 i te vahi i nia ˈˈe i te mau uputa ra, e nia atoa i te fare i roto ra, e rapae au atoa ra, e te pae patu ra e ati noa ˈˈe i roto e i rapae au atoa i taua fare ra, i te faitoraa. 18 E kerubi tei hamanihia, e te tamara, ei tamara tei tuuhia i ropu, e kerubi tei te tahi pae, e kerubi i te tahi pae; e piti hoi mata to te kerubi hoê; 19 e mata taata tei fariu tia i te tamara i te tahi pae, e mata liona apî tei fariu tia i te tamara i te tahi pae: i nia i taua fare atoa ra te haamaniraahia e ati noa ˈˈe. 20 Mai raro i te repo ra e tae noa ˈtura i te mau uputa o nia ˈˈe te hamaniraahia taua mau kerubi ra, e te tamara i nia i te patu i te hiero ra. 21 Area te huru ra, i tarai-orapa-hia te mau pou ra; e o mua i te vahi moˈa ra, hoê â hete i te hiˈoraa ˈtu te tahi e te tahi.
22 E te fata raau ra, e toru ïa kubiti i te teitei, e piti kubiti i te maoro; e na poro ra, e to raro ra, e te aua ra, e raau ïa: ua na ô maira oia ia ˈu, O te pǎpǎ teie i mua i te aro o Iehova.
23 E te hiero e te vahi moˈa ra, e piti ïa uputa. 24 E taua na uputa ra tataipiti ïa tiafeturaa, e rurihia mai taua na tiafeturaa ra; e piti tiafeturaa i te uputa hoê, e piti hoi tiafeturaa to te tahi uputa. 25 E hamanihia ihora i nia i taua na uputa o te hiero ra, na kerubi e na tamara, mai tei hamanihia i nia i te patu ra; e na teˈa raau i nia iho i te poretiko i rapae au. 26 E te haamaramarama pirihao e te tamara i teie paeau e tera paeau, tei te hiti o na poretiko, e tei te piha rii i te hiti o te fare ra, e o te teˈa atoa hoi.