Ezekiela

TE HOˈIRAA MAI O TE ANAANA NO Ǒ I TE ATUA RA I ROTO I TE HIERO.

43 Ua aratai atura oia ia ˈu i te uputa, e hiˈo tia ˈtu i te hitia o te râ ra, 2 E inaha, te haere maira te hanahana o te Atua o Iseraela mai te hitia o te râ mai: e to ˈna reo, e au ïa i te haruru tai rahi ra: e ua anaana te fenua i te hanahana no ˈna ra. 3 E te huru o ta ˈu i ite ra, mai te huru i itea e au, ia ˈu i haere mai e rave i te oire nei: e te huru o te pereoo ra, e au ïa i te huru i itea e au i te pae pape ra i Kebara; e ua tipapa ihora vau i raro te mata. 4 E ua tae maira te hanahana o Iehova i roto i te fare, na te uputa e hiˈo tia ˈtu i te pae i te hitia o te râ ra. 5 Ua rave maira te varua ia ˈu, e ua hopoi maira ia ˈu i roto i te aumoa i roto ra; e inaha, ua î aˈera te fare i te hanahana o Iehova. 6 Faaroo atura vau i te hoê i te parauraa mai ia ˈu i roto i te fare; te tia noa maira taua taata ra i pihai iho ia ˈu.

7 E ua na ô maira ia ˈu, E te tamaiti a te taata na, o te vairaa teie o to ˈu nei terono, e te tiaraa teie no tau avae, ei ǒ nei au e parahi ai i roto i te tamarii a Iseraela e a muri noa ˈtu, e ore hoi te utuafare o Iseraela e haaviivii faahou i to ˈu nei iˈoa moˈa, o ratou e to ratou mau arii i ta ratou taiataraa, e te mau tino o to ratou mau arii i to ratou mau vahi teitei: 8 ratou i faatia i to ratou uputa i pihai iho i to ˈu ra; e to ratou pou i pihai iho i to ˈu ra pou, o te patu anaˈe ra te arai ia ˈu e ia ratou; viivii atura tau iˈoa moˈa ia ratou i ta ratou mau parau faufau i ravehia e ratou ra: no reira ratou i pau ai i te riri no ˈu ra. 9 Teie nei râ, e tuu ê atu ratou i ta ratou taiata ia atea ê atu, e te mau tino o to ratou mau arii, e na ˈu e parahi i roto ia ratou e a muri noa ˈtu.

10 E o oe hoi, e te tamaiti a te taata na, e faaite i teie nei fare i te utuafare o Iseraela, ia haama ratou i ta ratou mau hapa: e na ratou e faito i tena na hohoa fare. 11 E ia haama ratou i ta ratou i rave ra, e faaite ia ratou i te huru o taua fare ra, e to ˈna hohoˈa, e te tomoraa i rapae, e te faaôraa mai i roto ra, e te mau huru atoa ra, e te mau haapaoraa atoa ra, te mau peu e te mau ture atoa ra; e papai hua i mua i to ratou mata, ia haapao-paatoa-hia e ratou te mau peu, e te mau haapaoraa atoa ra, e ia rave hoi. 12 Teie te ture o te fare i nia i te mouˈa ra: e moˈa roa te hiti atoa ra e ati noa ˈˈe: inaha, o te ture teie o taua fare nei.

13 Teie hoi te faito i te fata i te kubiti ra; te mau kubiti atoa ra, hoê ïa kubiti e hoê rima tiapana; tei raro paeau ra, hoê ïa kubiti i te teitei, hoê hoi kubiti i te aano; e to ˈna hiti, hoê ïa rima i taua hiti ra e ati noa ˈˈe; o te fata teie i te paeau i rapaeau ra. 14 E mai raro i te repo ra e tae aˈera i te hiti i raro ra, e piti ïa kubiti, hoê hoi kubiti i te aano; e mai te hiti iti e tae aˈera i te hiti rahi, e maha ïa kubiti, hoê hoi kubiti i te aano. 15 E te vauvau i raro aˈe i te fata ra, e maha ïa kubiti: e mai te vauvau i te fata ra e i nia ra, ia maha ïa tara. 16 E te vauvau i taua fata ra, hoê ahuru ma piti ïa i te kubiti i te maoro, hoê ahuru ma piti i te aano, hoê â hete i na aroâ atoa e maha ra. 17 E te hiti ra, hoê ahuru ma maha ïa i te kubiti i te maoro, hoê ahuru hoi e ma maha i te kubiti i te aano, i na hiti atoa e maha ra; e te hei i nia ihora, ei kubiti vaehaa ïa; e te pae i raro ra, hoê ïa kubiti i te aano e ati noa ˈˈe e te paiumaraa i nia ra, e fariu tia ïa i te hitia o te râ ra.

18 Ua parau maira oia ia ˈu, E te tamaiti a te taata na, te na ô maira te Fatu ra o Iehova; Teie te haapaoraa no te fata ra, ia tae i te mahana e hamanihia ˈi ra, ei hopoiraa tusia taauahi ïa i nia ihora, e ei pîpîraa toto ra. 19 Ei reira oe e hopoi ai i te mau tahuˈa ra, i te ati Levi ra, no te huaai o Zadoka, i tei haafatata mai ia ˈu ra, te na reira maira te Fatu ra o Iehova, ia rave i te toroa i mua ia ˈu ra, i te tahi puaatoro oni apî ei tusia no te hara. 20 E rave hoi oe i te toto no te reira, a tuu atu ai i nia i na tara e maha ra, e i nia i na poro e maha i te hiti ra, e i nia atoa i te hei ra e ati noa ˈˈe: e na reira oe i te tamâraa ˈtu e te haamaitairaa ˈtu. 21 E na oe e rave i te puaatoro oni tusia no te hara, a tutui ai i te auahi i te vahi haapaohia o te fare ra, i rapaeau mai i te vahi moˈa ra. 22 E tae aˈera i te piti o te mahana, e hopoi oe i te tahi fanauˈa puaaniho ma te ino ore, ei tusia no te hara; e tamâ hoi ratou i te fata mai ta ratou i tamâ i te puaatoro oni ra. 23 E ia oti ia oe i te tamâhia, e hopoi oe i te tahi puaatoro oni apî ino ore, e te tahi mamoe oni no roto i te nǎnǎ, aore e ino ra. 24 E na oe e hopoi i te aro o Iehova ra, e na te feia tahuˈa e titiri i te miti i nia iho, a hopoi ai ei tusia taauahi na Iehova. 25 Ia rui hitu oe i te hopoiraa i te tusia no te hara ei puaaniho i te mau mahana atoa ra: e faatusia atoa ratou i te puaatoro oni e te tahi mamoe oni no roto i te nǎnǎ, eiaha ei ino. 26 Ia rui hitu ratou i te haamaitairaa e te tamâraa i te fata ra; e faataa hoi ratou ia ratou iho. 27 E hope aˈera taua mau mahana ra, ia tae râ i te mahana vau ra, e o mua atoa ˈtu, na te feia tahuˈa e faatusia i ta outou mau tusia taauahi, e ta outou tusia i amu ra i nia i te fata ra; e na ˈu outou e ite atu, te na reira maira te Fatu ra o Iehova.