Ezekiela

TE ORAMA RA I TE HIERO APÎ, E TE AUMOA I RAPAE AU AˈE.

40 I te matahiti taau ma pae i to matou tîtîraa ra, i te matamehai o taua matahiti ra, i te mahana hoê ahuru i taua marama ra, e te matahiti hoê ahuru ma maha i te tairiraa i taua oire ra, tei nia maira te rima o Iehova ia ˈu i taua mahana ra, e ua aratai ia ˈu i reira: 2 i te orama e te Atua i te aratairaa oia ia ˈu i te fenua o Iseraela, e ua tuu ihora ia ˈu i nia i te hoê mouˈa teitei roa ra, e hohoˈa oire tei pihai iho tei te pae i apatoa ra. 3 E ua aratai hoi oia ia ˈu i reira, e inaha, tei reira te hoê taata, mai te veo oia i te huru i te hiˈoraa ˈtu, e ma te aho vavai i tana rima, e te hoê aeho faito, e te tia noa maira i roto i te uputa. 4 Ua na ô maira taua taata ra ia ˈu, E te tamaiti a te taata na, a hiˈo na to mata, e faaroo hoi to tariˈa, a haamau ai i to aau i ta ˈu e faaite atu ia oe ra; no reira hoi oe i arataihia mai ai i ǒ nei ia faaite atu vau ia oe ra: e ta oe e ite ra, o te faaite atu ïa i te utuafare o Iseraela.

5 E inaha, e patu tei rapae au mai i te fare e ati noa ˈˈe, e tei te rima o taua taata ra, e aeho faito ïa e ono kubiti i te maoro, na kubiti ïa, e hoê hoi rima tiapana: ua faito aˈera oia i te aano i taua patu ra, hoê ïa aeho; e te teitei hoi, hoê aeho. 6 Ua haere maira oia i te uputa i fariu tia i te hitia o te râ ra, e ua paiuma aˈera na nia i te mau taahiraa ra, e ua faito atura i te uputa i tei nia iho paeau ra, hoê ïa aeho i te aano; e te tahi pae i taua tomoraa ra, hoê ïa aeho i te aano. 7 E te mau piha iti atoa ra, hoê ia aeho i te maoro, e hoê hoi i te aano; e te area i ropu ra, e pae ïa kubiti; e te uputa i te tomoraa ra i te pae i te poretiko i roto ra, hoê ïa aeho. 8 Ua faito atoa oia i te poretiko o te uputa i roto ra, hoê ïa aeho. 9 Ua faito atura oia i te poretiko o te uputa ra, e vau ïa kubiti; e na pou ra, e piti ïa kubiti; e te poretiko i taua uputa ra, tei te pae i roto ra ïa. 10 E na piha no te uputa i te pae i te hitia o te râ ra, e toru i teie paeau, e toru i tera paeau; hoê â faitoraa te reira e toru atoa ra; e na pou hoi, hoê â faitoraa i teie paeau, e tera paeau. 11 Ua faito ihora oia i te aano i te tomoraa i te uputa ra, hoê ïa ahuru i te kubiti; e te maoro i te tomoraa i taua uputa ra, hoê ïa ahuru e ma toru i te kubiti. 12 Te vahi hoi i fetee mai i mua i taua mau piha ra, hoê ïa kubiti i teie paeau, hoê hoi kubiti i taua vahi fetee ra i tera paeau; e na piha ra, e ono ïa kubiti i teie paeau, e ono hoi kubiti i tera paeau. 13 Ua faito atura oia i te uputa, i te tapoˈi i te tahi piha e te tapoˈi i te tahi piha; hoê taau e ma pae i te kubiti i te aano; e te faito ra te tahi opani i te tahi opani. 14 Ua faito ihora hoi oia i na pou, e ono ahuru i te kubiti; tei pihai iho i te mau pou i te aumoa o te uputa e ati noa ˈˈe. 15 E te paeau i mua i te uputa tomoraa ra, e te pae i mua i te poretiko i te uputa i roto ra, e pae ïa ahuru i te kubiti. 16 E haamaramarama pirihao to te mau piha, e to te mau pou i reira i te paeau i roto i te uputa ra e ati noa ˈˈe; e haamaramarama atoa to te mau poretiko i te pae i roto ra e ati noa ˈˈe: e te tamara anaˈe i nia i te mau pou atoa ra.

17 Ua aratai atura oia ia ˈu i roto i te aumoa i rapae au ra; e inaha, e piha anaˈe, e te patu ua oti i te hamanihia no taua aumoa ra e ati noa ˈˈe: e toru ahuru i te piha i taua patu ra. 18 E te patu ra i te pae i te hiti i taua mau uputa ra, i na te roa o taua na uputa ra, o te patu ïa i raro. 19 Ua faito ihora oia i te aano na te pae i mua i te uputa i raro ra, e te pae i mua i te aumoa i roto i te pae i rapae, hoê ïa hanere i te kubiti i te pae i te hitia o te râ e i te pae i apatoerau ra. 20 E te uputa o te aumoa i rapae au e fariu tia i te pae i apatoerau ra, ua faito ihora oia i te maoro i te reira, e te aano atoa. 21 E na piha hoi no reira ra, e toru ïa i teie paeau, e toru hoi i tera paeau; e na pou hoi no reira ra, e na poretiko no reira, hoê â hete faito e tei mutaa ihora uputa: e pae ahuru te kubiti i te maoro, e te aano ra, hoê taau ïa e ma pae i te kubiti. 22 E to reira hoi mau haamaramarama, e to reira mau pou, e na tamara hoi, hoê â hete faito e te uputa i tiraha tia i te pae i te hitia o te râ ra: e hitu taahiraa e tae ai ratou i nia ia haere; e to reira mau poretiko, tei te pae ïa i mua. 23 E uputa atoa to te aumoa i roto ra, i tiraha tia ˈtu i te uputa i te pae i apatoerau ra e te hitia o te râ ra; ua faito ihora oia i te tahi uputa e te tahi uputa, hoê hanere i te kubiti.

24 Ua aratai atura oia ia ˈu i te pae i apatoa; e inaha, e uputa tei te pae i apatoa: ua faito ihora oia i to reira mau pou e to reira mau poretiko, taua na faito ra te faito. 25 E haamaramarama hoi to reira, e to te mau poretiko e ati noa ˈˈe, mai te mau haamaramarama atoa ra; e pae ahuru te kubiti i te maoro, e piti ahuru ma pae i te kubiti i te aano. 26 E na taahiraa e tae ai i nia ra, e hitu ïa, e na poretiko no reira ra, tei te pae ïa i mua, e tamara hoi to te reira, hoê i teie pae au, hoê i tera paeau, i nia i na pou i reira ra. 27 E uputa hoi to te aumoa i nia i te pae i apatoa ra: ua faito ihora oia i te tahi uputa e te tahi uputa i te pae i apatoa ra, hoê ïa hanere i te kubiti.

28 Ua aratai atura oia ia ˈu i te aumoa i roto ra, i te uputa i te pae i apatoa ra; ua faito ihora oia i te uputa i te pae i apatoa ra, taua na faito ra te faito; 29 e na piha ra, e na pou ra, e na poretiko ra, taua na faito ra te faito: e haamaramarama hoi to roto, e i roto atoa i te mau poretiko ra e ati noa ˈˈe: e pae ïa ahuru i te kubiti i te maoro, e piti ahuru e ma pae i te kubiti i te aano. 30 E na poretiko e ati noa ˈˈe, e piti ïa ahuru i te kubiti e pae tiahapa i te maoro, e pae kubiti i te aano. 31 E na poretiko ra tei te pae aumoa i rapae au ra; e na tamara tei nia ïa i na pou ra: e te paiumaraa i nia ra, e vau ïa taahiraa.

32 Ua aratai atura oia ia ˈu i te aumoa i roto ra i te pae i te hitia o te râ ra: e ua faito ihora i te uputa i teie nei mau faito. 33 E na piha hoi, e na pou ra, e na poretiko, i teie nei mau faito: e haamaramarama to roto, e i roto i te mau poretiko e ati noa ˈˈe: e pae ïa ahuru i te kubiti i te maoro, e piti ahuru e ma pae i te kubiti i te aano. 34 E na poretiko ra tei te pae i te aumoa i rapae au ra; e na tamara i nia i na pou ra, i teie paeau e tera paeau: e te paiumaraa i nia ra, e vau ïa taahiraa.

35 E ua aratai atura oia ia ˈu i te uputa i te pae i apatoerau, e ua faito ihora i teie nei mau faito; 36 te mau piha ra, e te mau pou ra, e te mau poretiko, e haamaramarama hoi to reira e ati noa ˈˈe: e pae ïa ahuru i te kubiti i te maoro, e te aano e piti ïa ahuru i te kubiti e pae tiahapa. 37 E te mau poretiko ra, tei te pae ïa i te aumoa i rapae au ra: e tei nia na tamara i na pou ra, i teie nei paeau e tera paeau: e te paiumaraa i nia ra, e vau ïa taahiraa. 38 Area te mau piha e te tomoraa i roto, na te mau pou o te mau uputa ra ïa, i reira te tusia taauahi i te horoiraahia.

39 E tei te poretiko o te uputa ra, o na pǎpǎ ïa e piti i teie paeau, ei patiaraa i te tusia taauahi, e te tusia no te hara, e te tusia no te hape. 40 E tei te hiti i te pae i rapae au mai, i te haereraa i nia i te tomoraa i te uputa i te pae i apatoerau ra, e piti ïa pue pǎpǎ; e te tahi paeau ra, i te poretiko i te uputa ra, e piti atoa ïa pue pǎpǎ. 41 E maha pue pǎpǎ i teie paeau, e maha hoi pǎpǎ i tera paeau, i te hiti i te tomoraa ra; e vau atoa ïa pue pǎpǎ ei patiaraa i ta ratou mau tusia. 42 E na pǎpǎ e maha no te tusia taauahi, e ofai tarai ïa, hoê kubiti e afa kubiti i te maoro, hoê hoi kubiti e afa kubiti i te aano, hoê hoi kubiti i te teitei: e i nia iho te vaiiho-raahia na mauhaa ia patia i te tusia taauahi e te mau tusia atoa ra. 43 E hiti hoi hoê rima te aano i haapaohia i te pae i roto ra e ati aˈe: e tei nia i taua pue pǎpǎ ra te puaa ei tusia.

44 Ua aratai oia ia ˈu i te uputa i roto ra, e inaha, e pue piha no te feia himene i roto i te aumoa i roto ra, i te pae i te uputa i apatoerau, e fariu tia ïa i te pae i apatoa: hoê hoi i te pae i te hitia o te râ ra, tei te pae i apatoerau ïa hiˈoraa. 45 Ua na ô maira oia ia ˈu, Teie nei piha tei te pae i apatoa te hiˈoraa, no te pǔpǔ tahuˈa ïa, tei faaitoito i te fare nei. 46 E te piha tei te pae i apatoerau te hiˈoraa, no te pǔpǔ tahuˈa e tiai i te fata ra: oia na tamarii a Zadoka, no roto i te mau tamarii a Levi ra, i fatata ia Iehova ra, ia rave i te toroa ia ˈna ra. 47 Ua faito aˈera oia i te aumoa, hoê hanere i te kubiti i te maoro, hoê hanere i te kubiti i te aano, hoê â hete te maoro e te aano; e tei mua hoi te fata i te hiero.

48 Ua aratai maira oia ia ˈu i te poretiko o te hiero ra, e ua faito ihora i na pou ra, e pae kubiti i teie paeau, e pae hoi kubiti i tera paeau; e te aano o te opani ra, e toru ïa kubiti i teie paeau, e toru hoi kubiti i tera paeau. 49 E te maoro o te poretiko, hoê taau ïa i te kubiti, e te aano ra hoê ïa ahuru ma hoê i te kubiti; e ia paiuma ratou i nia ra, i te taahiraa: e pue pou hoi tei te poretiko, hoê i teie paeau, hoê i tera paeau.