Ezekiela
TE POHE O GOGA I TE ATUA, E TE TANURAAHIA I HAMONA-GOGA-RA.
39 E teie nei, e te tamaiti a te taata na, e tohu ia Goga, e na ô atu, Te na ô maira te Fatu ra o Iehova; Inaha, e ore au e faatia ia oe, e Goga, e te arii o Rosa, Meseka, e Tubala: 2 e na ˈu oe e faafariu ê, ua faatamino haere ia oe ia aratai mai au ia oe mai te pae i apatoerau mai, e ia hopoi mai ia oe i nia i te mau mouˈa i Iseraela nei. 3 E tairi hoi au i to fana i to rima aui ra e mairi atu, e na ˈu e haamairi i to mau ohe i to rima atau ra. 4 E hiˈa oe i nia i te mau mouˈa i Iseraela nei, o oe, e to mau pǔpǔ atoa ra, e te feia rahi atoa i ǒ oe ra; e ua tuuhia oe e au i te mau manu pererau taehae e rave rahi atoa ra, e te mau manu o te aru ra ia pau. 5 E mairi hoi oe i nia i te fenua ra: o vau hoi teie e parau nei, te na reira maira te Fatu ra o Iehova. 6 E hapono atu vau i te auahi i Magoga, e i roto i te feia e parahi ma te mǎtaˈu ore i te pae tahatai ra: e ite hoi ratou e, o Iehova vau. 7 E na reira vau i te faaite i tau iˈoa moˈa i roto tau mau taata ra ia Iseraela; e ore hoi au e vaiiho noa i to ˈu iˈoa ia haaviivii-faahou-hia ra: e ite hoi te mau fenua e, o Iehova vau, o Tei Moˈa i Iseraela nei.
8 Inaha, te tupu nei, e e riro i te ravehia, te parau maira te Fatu ra o Iehova; o taua mahana teie ta ˈu i parau ra. 9 E na te feia i parahi i te mau oire i Iseraela e haere, e na ratou e tutui i te mau mauhaa tamaˈi ra ia ama, i te mau paruru, e te mau megena, e te mau fana, e te mau ohe, e tei mau-rima-hia ra, e te mau mahae; na ratou e tutui i te auahi e ia hitu noa ˈtu te matahiti: 10 e ore hoi ratou e rave i te vahie no te aru ra, e ore hoi e tâpû i to te vahi uru raau; e tutui hoi ratou i te mau mauhaa tamaˈi ra i te auahi: e na ratou e haru atu i tei haru mai ia ratou ra, e rave haapau roa hoi i te feia i rave haapau ra i ta ratou, te parau maira te Fatu ra o Iehova.
11 E ia tae i taua mahana ra, e horoa ˈtu ai au i te tahi vahi iˈoa itea no Goga, ei vahi tanuraa i Iseraela nei, i te peho i haerehia e te taata i te pae i te hitia o te râ i te tai ra: e no reira i tapirihia ˈi te ihu o te feia e haere: ei reira ratou e tanu ai ia Goga e to ˈna atoa ra taata e rave rahi: e na ratou e mairi i te reira, I te peho o Hamona-goga. 12 E hitu hoi o te tamarii a Iseraela marama i te tanuraa ia ratou, ia tamâ ratou i taua fenua ra: 13 na te taata atoa o te fenua e tanu; e riro hoi ei roo no ratou ia tae i te mahana e hanahana ˈi au ra, te parau maira te Fatu ra o Iehova. 14 E na ratou e faataa i te tahi pae taata, aore hoi i tuutuu ta ratou ohipa i te haere na roto i taua fenua ra, ia haere na roto e ia tanu i tei vaiiho-noa-hia i nia i te fenua ra, ei tamâraa ˈtu: ia hope na marama e hitu e imi ai ratou. 15 E te feia haere, ia haere na roto i taua fenua ra; ia hiˈo te tahi i te ivi taata ra, e faatia oia i te tahi tapao i pihai iho, e ia tanuhia e te feia tanu i te peho ra o Hamona-goga. 16 E mairihia te oire ia Hamona. E na reira ratou i te tamâraa ˈtu i taua fenua ra.
17 E o oe hoi, e te tamaiti a te taata na, te na ô maira te Fatu ra o Iehova; E parau atu oe i te mau manu pererau atoa, e te mau manu atoa o te fenua ra, e haaputuputu mai outou e haere mai: e haaputuputu outou e ati noa ˈˈe, i ta ˈu nei tusia i ravehia e au na outou, e tusia rahi i nia i te mau mouˈa i Iseraela nei; e amu hoi outou i te iˈo, e ei toto ta outou e inu. 18 E amu outou i te iˈo o te feia mana, e inu hoi i te toto o te hui arii o te fenua nei; e to te mau mamoe oni, to te mau pinia mamoe e to te mau puaaniho paˈe, to te mau puaatoro oni, e puaa poria anaˈe no Basana. 19 E amu hoi outou i te meˈî e paia noa ˈtu, e inu hoi i te toto e ia taeˈo, i ta ˈu nei tusia ta ˈu e rave nei na outou. 20 E paia hoi outou i ta ˈu nei amuraa i te puaahorofenua e tei parahi i nia iho, i te feia mana, e te mau taata tamaˈi atoa, te na reira maira te Fatu ra o Iehova.
21 E na ˈu e tuu i te hanahana no ˈu i te mau fenua ra; e ite te mau fenua atoa i te auraa o ta ˈu nei parau i faatupuhia e au ra, e tau rima i tuuhia e au i nia ia ratou. 22 E ite atoa te utuafare o Iseraela e, o vau to ratou Atua o Iehova, mai taua mahana maira e a muri noa ˈtu. 23 E ite hoi te mau fenua atoa e, no to ratou ino i reva ˈi te utuafare o Iseraela ei tîtî: no te mea ua hapa ta ratou parau ia ˈu, i purou ai au i tau mata ia ratou, e ua tuu atu vau ia ratou i te rima o to ratou mau enemi: e hiˈa paatoa aˈera ratou i te ˈoˈe. 24 Ua faaau hoi au i ta ˈu i rave ia ratou i ta ratou viivii, e ia ratou mau hapa, e ua purou vau i tau mata ia ratou.
25 E teie nei, te na ô maira te Fatu ra o Iehova; Ei teie nei au e faahoˈi mai ai i te tîtîraa o Iakoba, e aroha hoi au i te utuafare atoa o Iseraela; e faaitoito hoi au i tau iˈoa moˈa ra; 26 ua faaoromai hoi ratou i to ratou faainoraahia, e ta ratou mau hapa i hapa ˈi ratou ia ˈu nei, a parahi mǎtaˈu ore ai ratou i to ratou ra fenua, e aore e taata i haamǎtaˈu mai ia ratou ra; 27 ia faahoˈihia mai ratou e au na roto i te mau taata ra, e ia haaputuhia mai e au mai te mau fenua mai o to ratou mau enemi, e ia haamaitaihia mai ia ratou i te aro o te mau fenua e rave rahi ra, 28 ei reira ratou e ite ai e, o to ratou Atua ra vau o Iehova, o tei tuu atu ia ratou ia hopoi-tîtî-hia i te mau fenua ra; e ua haaputu mai ia ratou i to ratou iho fenua mau, e ore roa hoi te hoê o ratou e vaiiho-faahou-hia e au i reira. 29 E ore hoi au e purou faahou i tau mata ia ratou; i niniihia hoi e au tau varua i nia i te utuafare o Iseraela, te parau maira te Fatu ra o Iehova.