Ezekiela
TE FAAITE NEI TE PEROPHETA I TE HARA A IEROBOAMA.
4 Ua parau maira Iehova, O oe atoa, e te tamaiti a te taata na, e rave oe i te tahi iri araea, a tuu ai i mua ia oe ra, a otioti ai i te oire ra o Ierusalema i nia iho: 2 a haaati ai i taua oire nei, a patu ai i te tahi pare ei raveraa ˈtu, a ohu ai i te tahi vahi teitei ei tiaraa; a patia ˈtu ai hoi i te puhapa, a tuu ai i te otui e ati noa ˈˈe. 3 A rave ai oe i te tahi maa auri, a faatia ˈi ei aua auri i ropu i taua oire ra e ia oe: a fariu atu ai i to mata i taua oire ra, e na oe e haaati i te reira. Teie te tapao na te utuafare o Iseraela. 4 A taoto oe ei raro to aoao aui ra, a tuu ai i te utua o te hara o te utuafare o Iseraela i nia iho: e hope roa ˈˈe te mau mahana ta oe e taoto i te reira paeau ra, o ta oe ia faaoromairaa i te utua o ta ratou hara. 5 Ua tuu atu hoi au i nia ia oe i te mau matahiti faautuaraa no ta ratou hara, e ia hope maite na mahana e toru hanere e iva ahuru ra: o ta oe ïa faaoromairaa i te utua o te utuafare o Iseraela ra. 6 E hope aˈera te reira, e taoto faahou oe ei raro te aoao i te pae atau ra, e ia maha ahuru o oe mahana i te faaoromairaa i te utua o te hara o te utuafare o Iuda; hoê mahana hoê â ïa matahiti i te haapaoraahia e au ia oe ra. 7 E tena na, e fariu oe i to mata i te aroraa ia Ierusalema, heheu hoi oe i to rima, e na oe e tohu i te reira. 8 E inaha, na ˈu e tuu i te tapea i nia ia oe, e ore hoi oe e taviri i te tahi pae e te tahi pae, e ia hope te mau mahana aroraa na oe ra.
9 E rave atoa hoi oe i te sitona e te kerite na oe, e te phuli, e te pǐpǐ, te deheni, e te olura, a oomo ai i roto i te farii hoê, a faariro ai oe i te reira ei maa na oe iho, e ia hope roa na mahana no oe i te taatoaraa i raro i to aoao ra; e toru hanere e iva ahuru o oe mahana i te amuraa. 10 E ta oe ra maa ia amu ra, hoê taau ïa sekela i te mahana hoê ia faito ra: ei tera mahana, ei tera mahana, a amu ai oe. 11 E inu atoa hoi oe i ta oe pape ma te faito, o te ono o te tufaa i te hina ta oe ïa inu, i tera mahana, i tera mahana. 12 E amu hoi oe i te tahi pane iti kerite; ei tutae taata te vahie ia tunu oe i mua i to ratou aro. 13 Ua na ô maira Iehova, Mai te reira te tamarii a Iseraela i te amuraa i ta ratou maa viivii i te mau fenua ta ˈu e tiahi atu ia ratou ra. 14 Ua parau atura vau, E te Fatu, e Iehova! inaha, aitâ vau i viivii: o te mea pohe noa ra hoi, e tei hahaehia ra, aitâ vau i amu mai tau apîraa mai â; aore hoi te maa faufau i tae mai i roto i to ˈu nei vaha. 15 Ua parau maira oia ia ˈu, Inaha, ua tuu atu vau i te tutae puaatoro ia oe eiaha to te taata, o ta oe ïa e rave ei tunu i ta oe ra maa. 16 E ua na ô maira hoi oia ia ˈu, E te tamaiti a te taata na, inaha, e ofati au i te tauturu ra i te maa i Ierusalema: e amu hoi ratou i te maa ma te faito, e te faaherehere; e inu hoi ratou i ta ratou pape ma te faito, e ma te maere: 17 ia ere atu â ratou i te maa e te pape, e ia maere atu te tahi i te tahi, e ia mihi noa ˈtu i ta ratou hara.