Ezekiela

TA ˈNA PARAU IA TOHU RA, E TE OTARO I AMUHIA E ANA RA.

3 Ua parau maira hoi Iehova ia ˈu, E te tamaiti a te taata na, a amu i tei faaitehia ˈtu; e amu i teie nei otaro, a haere ai, a parau ai i te utuafare o Iseraela. 2 Ua hamǎmǎ ˈtura vau i tau vaha, e ua faaamu maira oia i taua otaro ra. 3 Ua parau maira hoi oia ia ˈu, E te tamaiti a te taata na, ia farii mai to opu, e ia î hoi to opu i teie nei otaro ta ˈu e ho atu ia oe ra. Ua amu ihora vau; e mai te meli te huru i to ˈu nei vaha i te momona.

4 Ua parau maira oia ia ˈu, E te tamaiti a te taata na, a haere i te utuafare o Iseraela, a parau atu ai i ta ˈu nei parau ia ratou. 5 Aore hoi oe i tonohia ˈtu i te feia parau ěê, e te reo itea-ore-hia, i te utuafare râ o Iseraela; 6 e ere hoi i te feia rahi e te parau ěê, e te reo itea-ore-hia e oe, e te haapii taiata, ahiri au i tono atu ia oe ia ratou ra, ua faaroo mai na ïa ia oe. 7 E ore râ te utuafare o Iseraela e faaroo mai ia oe; e ore hoi ratou e faaroo mai ia ˈu ra: ua ati hoi te utuafare atoa o Iseraela i te tâhito e te aau etaeta. 8 Inaha, ua faaitoito vau i to oe na mata i to ratou mau mata; e to oe na rae i to ratou ra mau rae. 9 Mai te semira etaeta rahi to ˈna i to te ofai, to oe ïa rae i te haapaariraahia e au ra: eiaha e mǎtaˈu, eiaha ia vi i to ratou mata, e utuafare tâhito hoi ratou.

10 E ua na ô maira oia ia ˈu, E te tamaiti a te taata na, o te mau parau atoa ta ˈu e parau atu ia oe ra, a farii mai i roto i to aau na e, faaroo mai hoi to tariˈa. 11 A haere ai oe ia ratou i te feia i tîtî ra, i te tamarii o to mau taata na, a parau atu ai ia ratou, a faaite atu ai ia ratou, Te na ô maira te Fatu ra o Iehova, to ratou faarooraa e to ratou oreraa.

12 Ua rave maira te varua ia ˈu e ua hopoi i nia, e ua faaroo atura vau i te haruru i muri aˈe ia ˈu, mai te mea rahi aueuehia ra, e te na ôraa mai, I haamaitaihia te hanahana o Iehova mai ǒ nei atu. 13 Faaroo atoa ˈtura vau i te haruru pererau o na mea ora ra tei tiaia te tahi i te tahi, e te haruru o na pereoo i pihai ihora, e te haruru o te mea aueue-rahi-hia ra. 14 Ua hopoi aˈera te varua ia ˈu i nia, e ua hopoi ê atura ia ˈu, haere atura vau ma te ino, e ma te horuhoru o tau aau; te uˈana maira te rima o Iehova i nia ia ˈu nei.

15 Tae atura vau i taua feia tîtî ra i Teli-abiba, o tei parahi i te pae o te pape ra o Kebara, parahi atura vau i ǒ ratou ra; parahi atura vau ia ratou ra ma te maere e rui hitu aˈera. 16 E hope aˈera taua na mahana e hitu ra, i tae mai ai te parau a Iehova ia ˈu nei, na ô maira, 17 E te tamaiti a te taata na, ua faariro vau ia oe ei tiai i te utuafare o Iseraela nei: e teie nei, e faaroo mai oe i te parau i to ˈu nei vaha, e na ǒ nei atu oe i te aˈo ia ratou. 18 Ia parau hoi au i te taata parau ino ra, E pohe mau oe, e aore oe i aˈo atu ia ˈna, e aore i parau atu ei aˈoraa ˈtu i te taata hara i ta ˈna ra parau ino, e ia ora oia ra; e pohe atu taua taata parau ino ra i ta ˈna ra hara; e titau maira vau i te hoo i to ˈna toto ia oe ra. 19 Ia aˈo râ oe i taua taata parau ino ra, e aore oia i fariu mai i taua parau ino na ˈna ra, e te haerea ino no ˈna ra, e pohe oia i ta ˈna ra hara; ua ora râ oe ia oe iho. 20 E te taata parau-tia ra ia fariu ê maira i ta ˈna parau-tia, e ua rave ihora i te parau ino, e ua tuu vau i te turoriraa i mua ia ˈna ra, e pohe ihora oia, no te mea aore oe i aˈo atu ia ˈna; e pohe oia i ta ˈna ra hara, e e ore e manaˈohia te parau-tia i ravehia e ana ra, e titau mai râ vau i te hoo i to ˈna toto ia oe ra. 21 Ia aˈo râ oe i te taata parau-tia, ia ore ia rave i te ino ra, e aore aˈera oia i rave i te ino ra, e ora ïa oia, no te mea ua aˈohia oia; ua ora atoa hoi oe ia oe iho.

22 Tei nia maira te rima o Iehova ia ˈu i reira; e ua na ô maira oia ia ˈu, A tia, e haere i te vahi atea, ei reira vau e paraparau atu ai ia oe. 23 Ua tia aˈera vau, e ua haere i te vahi atea ra: e inaha, te tia noa maira te hanahana o Iehova i reira, mai te hanahana i itea ia ˈu i te pape ra i Kebara: ua tipapa ihora vau i raro ra. 24 Ua faaô maira te varua i roto ia ˈu i reira, e ua faatia maira ia ˈu i tau avae; ua parau maira oia, na ô maira ia ˈu, A haere, a opani ia oe iho i roto i to fare na. 25 E o oe hoi, e te tamaiti a te taata na, inaha, e tuuhia te ruuruu i nia ia oe, e ruuruuhia oe i te reira, e eiaha oe e tae i rapae i roto ia ratou ra: 26 e na ˈu e tapiri i te arero i roto i to vaha ra, e ia riro atu oe ei mamû, ia ore oe ia aˈo atu ia ratou ra: e utuafare tâhito hoi ratou. 27 Ia parau atu râ vau ia oe ra, na ˈu e iriti i to vaha; e na oe e parau atu ia ratou, Te na ô maira te Fatu ra o Iehova; O te faaroo ra, atire ïa ia faaroo noa mai: e o te ore ra, atire ïa ia ore noa na: e utuafare tâhito hoi ratou nei.