Ezekiela

TE UTUA A IERUSALEMA NO TO RATOU TAIVARAA.

5 E o oe, e te tamaiti a te taata na, a rave oe i te tahi tipi oi, i te tahi râta na te hahu taa ra, a hahu ai i to upoo na, e te umiumi: a rave ai i te tahi faito ei faito e ei tuha i taua rouru ra. 2 E te toru o te tufaa ra, na oe e tahu i te auahi i ropu i taua oire ra, ia hope na mahana aroraa ra: a rave ai hoi oe i te tahi i taua na tufaa e toru ra, a papai haere ai i te tipi: e te toru hoi o te tufaa ra, na oe e haapuehu i te mataˈi: e na ˈu e unuhi i te ˈoˈe na muri ia ratou. 3 E rave hoi oe i te tahi pae o ratou eiaha te rahi rea ia taio ra, a taamu ai i roto i to hiti ahu. 4 A rave ai hoi oe i te tahi pae o ratou a titiri atu ai roto i te auahi, ia ama ˈtu i roto i te auahi; e riro hoi i te tae mai te auahi no roto ia ratou i te utuafare atoa o Iseraela.

5 Te na ô maira te Fatu ra o Iehova; O Ierusalema teie: ua tuu hoi au ia ˈna i ropu i te mau fenua atoa ra, e te haaatihia nei oia e te mau fenua nei. 6 E ua faahuru ê oia i te parau au na ˈu ma te faaino e iti to te mau etene ra, e ta ˈu nei haapaoraa e iti to te mau fenua e ati noa ˈˈe ra; ua faarue ratou i ta ˈu nei faaauraa, e ta ˈu nei mau haapaoraa, aita ratou i faaau i ta ratou haapaoraa i te reira. 7 E teie nei, te na ô maira te Fatu ra o Iehova, No te mea, ua faarahihia outou i to te mau fenua i haaati mai ia outou na, e aore i haapao i ta ˈu nei haapaoraa, e aore i mau i ta ˈu nei faaauraa parau, aore hoi outou i haapao i te mau parau a te mau fenua i haaati mai ia outou; 8 te na ô maira te Fatu ra o Iehova; Inaha, o vau, o vau nei â tei ore i faatia ia outou, e na ˈu e tahoo atu ia outou i rotopu ia outou iho, i te aro o te mau fenua nei. 9 E na ˈu e rave i roto ia outou i tei ore i ravehia e au ra, e e ore hoi au e na reira i te rave faahou, no ta outou mau parau faufau ra. 10 E teie nei, e amu te mau metua i te tamarii i roto ia outou na, e amu hoi te mau tamarii i te mau metua; e faatupu hoi au i te parau au na ˈu i nia ia outou, e te toe ia outou ra, na ˈu ïa e haapurara i na mataˈi atoa e maha ra. 11 E teie nei, te ora nei au, te na reira maira te Fatu ra o Iehova; no te mea, ua haaviivii mai outou i to ˈu nei vahi moˈa, i ta outou ra mau mea faufau ra, e ta outou mau mea iino ra, e rave au ia outou e faaiti, e ore tau mata e faaherehere, e ore roa hoi au e aroha ˈtu.

12 E te toru o te tufaa ia outou ra, e pohe ïa i te maˈi, e pau hoi i te pohe i te poia i roto ia outou na: e te toru hoi o te tufaa ra, e hiˈa ïa i te ˈoˈe e ati noa ˈˈe outou ra; e te toru hoi o te tufaa, na ˈu ïa e haapurara i te mau mataˈi atoa e maha ra, e unuhi hoi au i te tahi ˈoˈe ei tipapa ia ratou. 13 E na reira vau i te faatupu i to ˈu nei riri, e faairi au i tau riri uˈana i nia ia ratou; e mauruuru aˈera hoi au, e ite ïa ratou e, na ˈu na Iehova i parau atu ia ratou ma tau riri tahoo atoa, ia hope tau riri i te iri i nia ia ratou. 14 E faariro atu hoi au ia outou ei fenua pau, e ei faainoraa i te mau fenua atoa e haaati mai ia outou ra, e na te feia atoa e na reira i te haere. 15 E riro hoi outou ei ino, e ei faainoraa, e ei aˈoraa, e ei maereraa, na te mau fenua atoa e haaati mai ia outou, ia faatupu vau i te parau faaau na ˈu i nia ia outou, ma te riri, ma te tahoo, e ma te aˈo uˈana ˈtu. O vau teie o Iehova e parau nei. 16 Ia hapono atu vau i te ohe ino ra i te oˈe i nia ia ratou ra, e pohe ai ratou ra, e o ta ˈu ïa e hapono atu ia pohe â outou: e faarahi hoi au i te oˈe i nia ia outou, e ta outou tauturu ra o te maa e ofatihia e au: 17 e hapono atu vau i te oˈe i nia ia outou, e te manu taehae anaˈe, e pau hoi outou i te reira; e te maˈi, e te toto, te na roto ia outou; e hopoi mai hoi au i te ˈoˈe i nia ia outou. O vau teie o Iehova, e parau nei.