Ezekiela

TE NUU E TE RIRI O GOGA, E TE TAHOO O TE ATUA IA ˈNA RA.

38 Ua tae maira hoi te parau a Iehova ia ˈu nei, na ô maira, 2 E te tamaiti a te taata na, e fariu i to mata ia Goga i te fenua o Magoga, i te arii o Rosa, Meseka, e Tubala, a tohu atu ai ia ˈna, 3 A na ô atu ai, Te na ô maira te Fatu ra o Iehova; Inaha, e ore au e faatia ia oe, e Goga e, e te arii o Rosa, Meseka, e Tubala ra: 4 e faahoˈi au ia oe i muri, e oomo vau i te mǎtau i roto i to taa na; a faahoˈi mai ai ia oe, e te nuu atoa na oe ra, i te puaahorofenua, e te mau taata i parahi i nia iho, ma te ahu faaahaaha anaˈe i te ahuraa, e feia rahi atoa ma te paruru e te megena, e ma te ˈoˈe anaˈe te mauhaa: 5 Perezia, e Kusa, e Phuta atoa ra; ma te megena anaˈe e te taupoo; 6 o Gomera e to ˈna atoa ra mau pǔpǔ: te utuafare o Togarama no te pae i apatoerau ra, e to ˈna atoa ra mau pǔpǔ: o oe e te taata atoa e rave rahi. 7 A faaineine, e faaineine ia oe iho, o oe, e to oe atoa ra feia i putuputu mai ia oe ra; e na oe e faaitoito ia ratou. 8 E mahemo aˈera na mahana atoa e rave rahi, e roohia mai ai oe i te ino: ia tae i te mau mahana hopea ra e haere mai ai oe i te fenua i faahoˈihia mai mai te ˈoˈe, mai ra, e i haaputuhia mai mai roto i te taata atoa e rave rahi, i te mau mouˈa o Iseraela nei, i vai ano noa na: e faahoˈihia maira te mau taata mai roto i te taata atoa, a parahi ai ratou atoa ra ma te ora. 9 Mai te vero ra oe ia haere i nia, e mai te ata e moe ai te fenua ra, o oe, e to oe atoa ra mau pǔpǔ, e te taata atoa e rave rahi i te amui atoa ia oe ra.

10 Te na ô maira te Fatu ra o Iehova; E riro hoê â tupuraa te mau parau i roto i to aau, e riro hoi oe i te manaˈo i te mea ino: 11 e na oe e parau e, E haere au i te fenua oire rii aua-ore-hia ra; e haere au i te feia parahi hau noa ra, o tei parahi ma te ora, o tei parahi ma te patu ore, aore e teˈa e aore e opani, 12 ia noaa te taoˈa pau, ia tufa i te taoˈa; e ia fariu i to rima i te mau vahi ano ia taatahia ra, e te mau taata i haaputuhia mai mai roto i te mau fenua ra, ma te puaa e te taoˈa atoa i te noaaraa, e te parahiraa i ropu i te fenua ra. 13 O Seba, e o Dedana, e te feia i hoo i Taresisa, e te mau liona apî atoa i reira, o te parau mai ïa ia oe, I haere mai oe e rave i te taoˈa? ua haaputuputu oe i to mau taata ei tufa i te taoˈa pau? ei hopoi i te ario e te auro, ei puto puaa e ei faahoro tauhaa, ei tufa i te taoˈa rahi?

14 E tena na, e te tamaiti a te taata na, a tohu, e parau atu ia Goga, Te na ô maira te Fatu ra o Iehova; Ia tae i taua mahana ra ia parahi tau mau taata ra o Iseraela ma te manaˈonaˈo ore, e ore anei oe e ite? 15 E ua haere mai oe mai to oe ra vahi, mai te pae i apatoerau, o oe e te taata atoa i te haere-atoa-raa mai, ma te parahi anaˈe i nia i te puaahorofenua, e feia rahi, e nuu puai: 16 e tae mai hoi oe e rave i tau mau taata ra o Iseraela, mai te ata ra e moe ai te fenua ra; e riro i te tau hopea ra, e aratai mai au ia oe ei rave i tau fenua, ia ite te mau fenua ia ˈu, ia haamaitaihia mai au ia oe ra, e Goga, i mua to ratou mata.

17 Te na ô maira te Fatu ra o Iehova; E ere anei oe tei parauhia e au i tahito ra, i te vaha o tau mau tavini i te mau peropheta i Iseraela nei, o tei tohu i taua anotau ra i taua mau matahiti ra, e e aratai mai au ia oe ei rave ia ratou? 18 E riro hoi ia tae i taua mahana ra ia tii mai Goga e rave i te fenua ra ia Iseraela, te na reira maira te Fatu ra o Iehova, e tupu ai tau riri tahoo i to ˈu nei mata. 19 Ua parau hoi au ma te uˈana o tau riri, e to ˈu nei hae. E aueue rahi mau tei te fenua ra ia Iseraela ia tae i taua mahana ra. 20 E aueue atoa te mau iˈa o te tai, e te mau manu o te reva, e te mau puaa o te aru, e te mau mea rii e nee i nia i te fenua nei, e te mau taata atoa i nia i te fenua nei, i mua i tau aro; e hurihia te mau mouˈa i raro, e te mau vahi teitei, e mairi ïa, e te mau patu e marua ïa i raro i te repo. 21 E na ˈu e parau i te ˈoˈe ei rave ia ˈna e ati noa ˈˈe tau mau mouˈa atoa nei, te parau maira te Fatu ra o Iehova; e te mau ˈoˈe atoa a te taata atoa nei, ei rave anaˈe ïa i to ˈna iho taeae. 22 I te maˈi pohe e te toto ta ˈu parau ia parau atu ia ˈna ra; e ma te ûa rahi, e te ofai rahi ûa-paari, e te auahi, e te gopheri; e na ˈu e haamairi mai i te ûa i nia ia ˈna, e i nia i to ˈna ra mau pǔpǔ, e te taata e pee ia ˈna ra. 23 E na reira vau i te faarahi ia ˈu iho, e te haamaitai ia ˈu iho; e itehia hoi au e te mau fenua atoa e rave rahi; e ite hoi ratou e, o vau o Iehova.