Ezekiela

TE ORAMA RA O TE MAU IVI MǍRÔ, EI FAAANAANAEA I TE MANAˈO O ISERAELA.

37 Tei nia maira te rima o Iehova ia ˈu; e ua hopoi Iehova ia ˈu i te hana o te varua ra, e ua tuu ihora ia ˈu i te hoê peho î i te ivi mǎrô, 2 e ua aratai oia ia ˈu na pihai iho e ati noa ˈˈe, e inaha, e rave rahi i roto i taua peho ra; e inaha, e mǎrô rahi. 3 Ua na ô maira oia ia ˈu, E te tamaiti a te taata na, e ora anei teie nei mau ivi? Ua parau atura vau, E te Fatu ra, e Iehova, o oe hoi te ite. 4 Ua parau maira oia ia ˈu, A tohu i nia i teie nei mau ivi, a na ô atu ai ia ratou, E teie nei mau ivi mǎrô, e faaroo mai i te parau a Iehova. 5 Te na ô maira te Fatu ra o Iehova i teie nei mau ivi; Inaha, e tuu vau i te aho i roto ia outou, e e ora ïa outou; 6 e na ˈu e tuu i te uaua i nia ia outou, e na ˈu e faatupu i te iˈo i nia ia outou, e ua tapoˈi hoi ia outou i te iri, e tuu hoi i te aho i roto ia outou, e e ora ïa outou; e ite hoi outou e, o Iehova vau.

7 Ua tohu atura vau i tei faauehia mai au ra: e te tohu noa ra vau, o te haruru maira; e inaha, e aueueraa, e ua haafatata maira te mau ivi, te tahi ivi e to ˈna tiaatiraa. 8 E taua hiˈo-noa-raa no ˈu ra, inaha, e uaua tei nia iho ia ratou, e ua tupu maira te iˈo, e ua tapoˈi maira te iri na nia iho: aita râ e aho o roto ia ratou. 9 Ua parau maira oia ia ˈu, E tohu oe i te aho, e tohu, e te tamaiti a te taata na, e parau atu oe i te aho ra, Te na ô maira te Fatu ra o Iehova; E haere mai, e te aho e, mai na mataˈi mai e maha ra, e haapuai mai i nia i te feia i pohe nei ia ora ratou. 10 Ua tohu atura vau i ta ˈna i faaue mai ia ˈu ra, e ua haere maira te aho i roto ia ratou, e ua ora ihora ratou, e ua tia maira te avae i nia, e nuu rahi roa.

11 Ua parau maira oia ia ˈu, E te tamaiti a te taata nei, o teie nei mau ivi, o te utuafare atoa ïa o Iseraela: te na ô nei ratou, Inaha, ua mǎrô to matou mau ivi, e aore o matou e tiaturiraa; area o tatou nei, ua tâpû-ê-hia ïa. 12 E teie nei, e tohu oe, e na ô atu ia ratou, Te na ô maira te Fatu ra o Iehova; Inaha, e au mau taata e, e huai au i to outou mau tanuraa, e ua aratai mai ia outou mai raro mai i to outou mau apoo ra, e ua aratai au ia outou i te fenua o Iseraela. 13 E ite hoi outou e, o Iehova vau, ia heheu vau i to outou mau apoo, e au mau taata, e ia aratai mai ia outou mai raro mai i to outou mau apoo, 14 e na ˈu e tuu i tau aho i roto ia outou, e e ora ïa outou: e na ˈu e haamau ia outou i to outou iho fenua: ei reira outou e ite ai e, na ˈu na Iehova i parau, e na ˈu hoi i rave, te parau maira Iehova.

15 Ua tae maira hoi te parau a Iehova ia ˈu nei, na ô maira, 16 E rave â hoi oe, e te tamaiti a te taata na, i te hoê raau, a papai ai i nia iho, Na Iuda e na te tamarii a Iseraela, o to ˈna ra mau hoa: e mai reira hoi, a rave ai i te tahi raau, a papai ai i nia iho, Na Iosepha, te raau na Epheraima, e te utuafare atoa o Iseraela, o to ˈna ra mau hoa: 17 a taati atu ai i te tahi i te tahi ia hoê â raau; e ia riro ei hoê i roto i to rima na.

18 E ia parau mai te mau tamarii ra o to oe mau taata ia oe, ia na ô mai e, Eita oe e faaite mai ia matou i ta oe parau i tena na pue raau? 19 E parau atu oe ia ratou, Te na ô maira te Fatu ra o Iehova; Inaha, e rave au i te raau a Iosepha, i roto i te rima o Epheraima, e na opu o Iseraela i to ˈna mau hoa, a tuu atoa ˈtu ai i reira, i te raau a Iuda, a faariro ai ei raau hoê, e riro hoi ei hoê i to ˈu nei rima.

20 E taua na raau i papaihia e oe i nia ihora, ei roto ïa i to rima i mua i to ratou mata. 21 A parau atu ai ia ratou, Te na ô maira te Fatu ra o Iehova: Inaha, e rave mai au i te tamarii a Iseraela mai roto mai i te mau fenua i reva ˈtu ai ratou, e na ˈu ratou e haaputu mai i te mau vahi atoa ra e ua aratai ia ratou i to ratou ihora fenua. 22 E na ˈu e faariro ia ratou ei nunaa hoê i nia i te fenua nei, i nia i te mau mouˈa i Iseraela nei; e hoê hoi arii ei arii no ratou atoa ra: e ore e riro ei nunaa piti, e ore hoi e veve-faahou-hia ia piti basileia: 23 e ore ratou e haaviivii faahou ia ratou i te mau idolo, e ta ratou mau parau faufau, e ta ratou mau hara atoa ra; na ˈu râ e faaora ia ratou i to ratou hoˈiraa i muri, i hara ˈi ratou ra, e na ˈu e tamâ ia ratou: e ei taata ratou no ˈu, e ei Atua hoi au no ratou. 24 E o tau tavini o Davida, ei arii ïa i nia ia ratou: e hoê hoi o ratou tiai: e haapao hoi ratou i ta ˈu ra faaauraa, e ta ˈu ra haapaoraa, e na ratou e rave. 25 E parahi hoi ratou i te fenua i horoahia e au no tau tavini no Iakoba, tei parahihia e to outou mau metua ra; e parahi ratou i reira, o ratou e to ratou mau tamarii, e te tamarii atoa o to ratou ra tamarii e a muri noa ˈtu: e tau tavini o Davida, o to ratou ïa arii e a muri noa ˈtu. 26 E fafau hoi au i te tahi faufaa hau no ratou; ei faufaa mure ore ïa ia ratou: e na ˈu ratou e faanoho, e na ˈu ratou e faarahi, e tuu hoi i tau vahi moˈa i roto ia ratou e a muri noa ˈtu. 27 Ei ǒ ratou hoi tau sekene: e ei Atua vau no ratou, e ei taata ratou no ˈu. 28 E ite hoi te mau fenua e, na ˈu, na Iehova e haamaitai ia Iseraela, ia vai maite tau vahi moˈa i rotopu ia ratou e a muri noa ˈtu.