Ezekiela

TE FENUA O ISERAELA HAAMAURUURUHIA I TE PARAU MAITAI.

36 E o oe hoi, e te tamaiti a te taata na, e tohu atoa oe i te mau mouˈa o Iseraela, e na ô atu, E te mau mouˈa o Iseraela, e faaroo mai i te parau a Iehova. 2 Te na ô maira te Fatu ra o Iehova, No te mea ua parau te enemi ia outou e, Aitoa, tei ia tatou atoa te mau vahi teitei tahito ra: 3 e teie nei, e tohu oe, e na ô atu, Te na ô maira te Fatu ra o Iehova; No te mea ua ano, e ua pau outou i te horomiihia e ati noa ˈˈe, ia riro outou ei taoˈa no te toea o te mau fenua nei, e ua taua-parau-hia outou e te feia vavi noa nei, e ua faainohia e te taata nei; 4 e teie nei, e te mau mouˈa o Iseraela nei, e faaroo mai i te parau a te Fatu ra a Iehova; Te na ô maira te Fatu ra o Iehova i te mau mouˈa e te mau aivi, i te pape rii tahe, e te mau peho, e te mau vahi pau, e te mau oire faaruehia ra, tei riro ei taoˈa pau, e ei tâhitoraa no te toea rii o te mau fenua e ati noa ˈˈe; 5 e teie nei, te na ô maira te Fatu ra o Iehova; Ua parau vau i te toea rii o te mau fenua nei ma te uˈana o tau riri nei, e ia Edoma atoa nei, o tei tapao i tau fenua nei no ratou iho ei parahiraa, ma te oaoa atoa o to ratou aau, e ma te aau tahoo, ia faarue-roa-hia mai ei taoˈa pau. 6 E teie nei, e tohu i te fenua ra ia Iseraela, e parau atu i te mau mouˈa, e te mau aivi, i te mau pape rii tahe ra, e te mau peho, Te na ô maira te Fatu ra o Iehova; Inaha, ua parau vau ma tau riri hae e te riri tahoo, no te mea, ua iri mai te faaino o te mau fenua ra i nia ia outou: 7 e teie nei, te na ô maira te Fatu ra o Iehova; Ua tǎpǔ vau i te na ôraa e, E riro atoa i te iri atoa mai te faaino i nia i te mau fenua e haaati mai ia outou na.

8 Area outou, e te mau mouˈa o Iseraela, e toro to outou amaa, e hotu hoi outou i ta outou maa na tau mau taata na Iseraela, o tei fatata i te hoˈi mai. 9 Inaha hoi, ua faatia ˈtu vau ia outou, e fariu atu hoi au ia outou, e faaapuhia outou, e e ueuehia te huero: 10 e na ˈu e faarahi i te taata ia outou, i te utuafare atoa o Iseraela, e hope roa ˈˈe: e taatahia te mau oire, e te mau vahi pau, e patuhia ïa: 11 e faarahi hoi au te taata e te puaa ia outou; e tupu hoi ratou e e fanau: e taatahia outou ia ˈu mai to outou huru tahito ra, e e rahi to ˈu hamani maitai ia outou i teie nei i tei to outou matamuaraa ra: e ite hoi outou e, o Iehova vau. 12 Ei taata râ ta ˈu e tuu ia na nia noa na ia outou i te haere, i to ˈu ra taata ia Iseraela; e riro outou ia ratou, e ei tufaa outou no ratou, e ore outou e faaere faahou ia ratou i te taata. 13 Te na ô maira te Fatu ra o Iehova; No te mea te parau nei ratou ia outou, O oe, e tera ra fenua e pau ai te taata, e ua faaore oe i to nunaa; 14 e teie nei, e ore e pau faahou te taata ia oe, e ore hoi oe e faaore faahou i to nunaa, te na reira maira te Fatu ra o Iehova. 15 E ore hoi te taata e faaroo faahou i roto ia oe ra i te faaino a te mau fenua nei ia ˈu, e ore hoi te tâhitohito a te taata nei e iri faahou i nia ia oe ra, e ore hoi oe e faaore faahou i to oe ra nunaa, te na reira maira te Fatu ra o Iehova.

16 Ua tae maira hoi te parau a Iehova ia ˈu nei, na ô maira, 17 E te tamaiti a te taata na, i te parahiraa te utuafare o Iseraela i to ratou ihora fenua, ua haaviivii ratou i taua fenua ra i ta ratou parau e ta ratou i rave ra: e au to ratou haerea i mua ia ˈu ra i te viivii o te vahine i tuua-ê-hia ra. 18 I ninii atu ai au i tau riri i nia ia ratou, i te toto i manii ia ratou i nia i te fenua nei, e no te mea ua haaviiviihia e ratou i to ratou mau idolo: 19 e ua haapurara vau ia ratou i roto i te mau fenua ra, e puehu atura ratou i te mau mataeinaa ra: na faautua ˈtu hoi au ia ratou i ta ratou haerea e ta ratou parau. 20 E tae atura ratou i te mau fenua i haerehia e ratou ra, ua haaviivii ratou i tau iˈoa moˈa i reira, i te parauraahia mai ratou e, O te mau taata teie no Iehova, e ua haere ê mai ratou i to ˈna fenua.

21 Ua aroha râ vau ia ratou no to ˈu nei iˈoa moˈa, ta te utuafare o Iseraela i haaviivii i roto i te mau vahi haerehia e ratou ra. 22 E teie nei, e parau atu i te utuafare o Iseraela, Te na ô maira te Fatu ra o Iehova; E ere no outou i na reira ˈi au, e te utuafare o Iseraela, no to ˈu nei râ iˈoa moˈa, i tei haaviiviihia e outou i te mau fenua i haerehia e outou na: 23 e haamaitai hoi au i tau iˈoa rahi, i haaviiviihia i te mau fenua ra, ta outou i haaviivii i roto ia ratou ra; e ite hoi te mau fenua e, o Iehova vau, te na reira maira te Fatu ra o Iehova, ia haamaitaihia vau e outou i mua i to ratou mata. 24 E rave hoi au ia outou i roto i te mau fenua na, e haaputuputu vau ia outou mai roto mai i te mau mataeinaa atoa ra; e aratai mai hoi ia outou i to outou ihora fenua.

25 Ei reira vau e pîpî ai i te pape ateate i nia ia outou, e mâ aˈera outou i to outou mau viivii atoa ra, e mâ outou ia ˈu i to outou mau idolo atoa ra. 26 Ei aau apî ta ˈu e ho atu ia outou na, e varua apî ta ˈu e tuu i roto ia outou: e na ˈu e iriti i te aau ofai i roto ia outou na, e na ˈu e horoa i te aau mǎrû. 27 E na ˈu e tuu i tau varua i roto ia outou, ia haere outou na ta ˈu ra haapaoraa, e e haapao outou i ta ˈu ra faaauraa, e e rave. 28 E parahi hoi outou i te fenua ta ˈu i ho atu no to outou mau metua; e ei taata outou no ˈu, e ei Atua hoi au no outou. 29 E na ˈu outou e faaora i to outou mau mea viivii atoa ra: e na ˈu e parau i te sitona, na ˈu e faarahi, e ore au e hopoi atu i te oˈe i nia ia outou. 30 E na ˈu e faarahi i te maa o te mau raau ra, e te maa o te fenua ia rahi, ia ore outou ia faainohia e te mau fenua i te oˈe. 31 Ei reira outou e manaˈo ai i ta outou parau ino, e ta outou i rave aore e maitai ra; e faaino hoi outou ia outou iho i ta outou mau parau ino, e ta outou mau parau faufau ra. 32 E ere râ no outou i na reira ˈi au nei, te na reira maira te Fatu ra o Iehova, ia ite mai hoi outou: ia haama hoi outou, e ia maheahea i ta outou mau parau, e te utuafare o Iseraela. 33 Te na ô maira te Fatu ra o Iehova; Ia tae i te mahana e tamâ ˈtu ai au ia outou i ta outou mau hara; e ia faataata i te mau oire, e ia patuhia te mau vahi pau. 34 E te fenua ano ia faaapuhia, o tei vai ano noa hoi i mua i te mata o te feia atoa i na reira i te haere. 35 Ei reira e parauhia ˈi, O teie nei fenua i vai ano noa ra, ua riro ïa mai te ô ra mai ia Edene; e te mau oire i pau e te ano e ua ino roa ra, ua auahia ïa e ua taatahia. 36 Ei reira te mau fenua i toe i pihai iho ia outou e ati noa ˈˈe e ite ai e, na ˈu na Iehova i patu i te mau vahi pau, e ua tanu hoi i te fenua i ano ra; o vau o Iehova e parau nei, e na ˈu e rave. 37 Te na ô maira te Fatu ra o Iehova; E imihia ra vau e te utuafare o Iseraela, ia na reira vau ia ratou ra; e faarahi hoi au i te taata ia ratou mai te nǎnǎ ra. 38 Mai te nǎnǎ moˈa ra, mai te nǎnǎ i Ierusalema i te mau oroa moˈa no ˈna ra; mai te reira te mau oire i pau i te îî i te nǎnǎ taata nei; e ite hoi ratou e, o Iehova vau.