Ezekiela
TE HAAMǍTAˈUHIA NEI TURIA I TE TEOTEO IA IERUSALEMA.
26 E tae aˈera i te ahuru ma hoê o te matahiti i te mahana matamua o te marama ra, i tae mai ai te parau a Iehova ia ˈu nei, na ô maira, 2 E te tamaiti a te taata na, No te mea ua parau Turia ia Ierusalema e, Aitoa, ua parari ïa oia; o te oire e taata rahi tei ta ˈna uputa, ua fariu mai ïa ia ˈu; ua î atura vau, o oia i ano; 3 e teie nei, te na ô maira te Fatu ra o Iehova; Inaha, e ore au e faatia ia oe, e Turia, e na ˈu e tuu mai i te mau fenua ei rave ia oe, mai te miti e huri noa mai i to ˈna are. 4 E parari te mau patu i Turia ia ratou, e haaparari hoi i to ˈna ra mau pare; e na ˈu e paee i te repo i nia ia ˈna, e ia riro mai te pǎpǎ i nia ihora. 5 E riro oia ei hohoraraa upeˈa i ropu i te moana ra: o vau hoi tei parau, te na reira maira te Fatu ra o Iehova. E riro hoi oia ei taoˈa no te mau fenua; 6 e ta ˈna ra mau tamahine i roto i te aua ra, e tairihia ïa i te ˈoˈe, e ite hoi ratou e, o Iehova vau.
7 Te na ô maira hoi te Fatu ra o Iehova, Inaha, e aratai mai au i te arii o Babulonia ra ia Nebukanesa i nia ia Turia ra, e arii no te mau arii ra, mai te pae i apatoerau ra, ma te puaahorofenua anaˈe e te mau pereoo, e te feia e parahi i nia iho, e te mau pǔpǔ, e te taata atoa e rave rahi ra. 8 E taparahi oia i to mau tamahine i roto i te aua ra i te ˈoˈe, e rave hoi oia i te tahi pare ia oe ra, e ohu hoi oia i te ohu ia oe, e hopoi hoi oia i te paruru ia oe. 9 E tuu hoi oia i te otui i to mau patu ra, e vavahi hoi oia i to mau pare i te auri. 10 E moe oe i te repo i te rahi o tana ra mau puaahorofenua; e aueue atoa to mau patu i te haruru o tana mau puaahorofenua, e te mau faahoro taoˈa, e te mau pereoo na ˈna ra, ia faaô oia i roto i to mau uputa ra, mai te taata e tomo i roto i te oire ia haapararihia ra. 11 E taataahihia to mau aroâ e te maiuu o tana ra mau puaahorofenua; e pau to mau taata i te taparahihia e ana i te ˈoˈe, e to mau pare etaeta ra, e tuuhia ïa i raro i te repo ra. 12 E rave ino hoi ratou i to mau taoˈa ra, e riro hoi to mau taoˈa hoo ra ei taoˈa pau na ratou; e vavahi ratou i to mau patu, a haaparari ai i to mau fare nehenehe ra; e to mau ofai, e te raau, e te repo, e tuu ïa ratou i raro i te moana. 13 E te reo pehe noa aˈera e faaorehia e au; e ore hoi te oto kinura e itea faahou. 14 E faariro hoi au ia oe ra mai to nia iho i te pape ra; e riro hoi oe ei hohoraraa upeˈa, e ore oe e patu-faahou-hia: o vau hoi o Iehova tei parau, te na reira maira te Fatu ra o Iehova.
15 Te na ô nei te Fatu ra o Iehova ia Turia, E ore anei te mau fenua nei e aueue i te haruru o to oe ra hiˈaraa, ia oto hua te feia puta, e ia rahi te pau i roto ia oe ra? 16 Ei reira te mau arii atoa o te moana e haere ai i raro mai nia mai i to ratou mau terono, a haapae ai i to ratou ahu, a tuu ê atu ai i to ratou ahu faanehenehehia, e e vehî ia ratou i te rurutaina, a parahi ai i raro i te repo, a rurutaina ˈi eiaha e faaea, e te maere hoi ia oe. 17 E e parau ratou i te parau oto ia oe, a parau ai ia oe e, Auê to oe pohe e, tei parahihia e te feia e haere i te moana, e te oire tuiroo e, e tei puai i te moana, oia e to ˈna atoa ra mau taata, tei mǎtaˈuhia e te taata atoa i haere mai i reira ra! 18 Ei teie nei e rurutaina ˈi te mau fenua ia tae i te mahana e hiˈa ˈi oe ra; e ahoaho atoa te mau fenua o te moana ia ore oe ra. 19 Te na ô maira te Fatu ra o Iehova; Ia faarirohia oe e au ei oire ano ra, mai te mau oire taata ore ra; ia hopoi mai au i te moana i nia ia oe ra, e moe atura oe i te moana rahi ra: 20 ia tuu vau ia oe i raro i te feia atoa i reva i te apoo ra, i te mau taata tahito ra; ia tuu hoi ia oe i te vahi haehaa i te fenua nei, i te vahi ano i tahito ra, o oe e te feia atoa i reva i te apoo ra, e eiaha oe ia taatahia; e ia haapao vau i te unauna i te fenua o te feia e ora nei; 21 e faariro vau ia oe ei mea mǎtaˈuhia, e ore aˈera hoi oe: e imi-noa-hia oe, e ore râ e itea faahou e a muri noa ˈtu, te na reira maira te Fatu ra o Iehova.