Ezekiela

TE RIRI O TE ATUA I TE ATI AMONA, I TE HAMANI INO I TE ATI IUDA.

25 Ua tae faahou maira te parau a Iehova ia ˈu nei, na ô maira, 2 E te tamaiti a te taata na, a fariu na i to mata i te ati Amona, e tohu atu ia ratou; 3 e na ô atu i te ati Amona, E faaroo mai i te parau a te Fatu ra a Iehova: Te na ô maira te Fatu ra o Iehova; No te mea ua parau oe, Aitoa, i tau vahi moˈa nei, a haaviiviihia ˈi ra; e te fenua atoa o Iseraela, a ano ai ra; e te utuafare atoa o Iuda, a riro ai ratou ei tîtî ra; 4 e tena na, inaha, e tuu atu vau ia oe i to te pae i te hitia o te râ ra ei taoˈa, e na ratou e faatia i to ratou mau fare arii ra i roto ia oe, e patu hoi i to ratou parahiraa mau i roto ia oe: na ratou e amu i ta oe maa, e na ratou e inu i ta oe û. 5 E faariro vau ia Raba ei fare vairaa kamela, e te ati Amona ei taotoraa no te mau nǎnǎ mamoe: e ite hoi outou e, o Iehova vau. 6 Te na ô maira hoi te Fatu ra o Iehova; No te mea ua papai oe i to rima, e ua taataahi i to avae, e ua oaoa to aau ma to riri atoa i te fenua nei ia Iseraela; 7 e tena na, inaha, e faatoro atu vau i tau rima ia oe ra; e tuu vau ia oe ei taoˈa no te mau fenua; e tâpû ê atu vau ia oe i ǒ te mau taata nei, e haamou atu vau ia oe i roto i te mau fenua nei: e faaore atu vau ia oe, e ite hoi oe e, o vau o Iehova.

8 Te na ô maira te Fatu ra o Iehova; No te mea te na ô maira Moabi e o Seira, inaha, te faito atoa nei te utuafare nei o Iuda i te mau fenua atoa nei; 9 e teie nei, inaha, e iritia e au te aoao o Moabi na to ˈna ra mau oire, na te mau oire i to ˈna ra hiti, e iritia e au te unauna o te fenua ra, ia Bete-iesimota, ia Baala-meona, e ia Kiriataima, 10 o ta ˈu ïa e horoa ˈtu na te mau taata o te pae i te hitia o te râ e te ati Amona atoa ra, ei taoˈa, ia ore Raba o te ati Amona ia manaˈohia i roto i te mau fenua ra. 11 E na ˈu e tuu atu i ta ˈu ra mau utua i nia ia Moabi; e ite hoi ratou e, o Iehova vau.

12 Te na ô maira te Fatu ra o Iehova; No te mea ua tahoo aroha ore noa Edoma i te utuafare o Iuda, e ua rahi te hara, e te tahooraa ˈtu ia ratou; 13 e teie nei, te na ô maira te Fatu ra o Iehova; E faatoro atu vau i tau rima i nia ia Edoma, e faaore atu vau i te taata e te puaa atoa i reira; e faaano atu vau mai Temani mai, e hiˈa hoi ratou i te ˈoˈe e tae noa ˈtu i Dedana. 14 E tuu vau i te riri no ˈu i nia ia Edoma i te rima o tau mau taata nei ia Iseraela: e haapao ratou i to ˈu nei riri e ta ˈu nei tahoo ia rave ia Edoma; e ite hoi ratou i te tahoo na ˈu ra, te parau maira te Fatu ra o Iehova.

15 Te na ô maira te Fatu ra o Iehova; No te mea, e tahoo ta te Philiseti, e ua rave ta ratou tahooraa ma te aau riri, ia pau roa ma te riri tahito ra; 16 e teie nei, te na ô maira te Fatu ra o Iehova; Inaha, e faatoro atu vau i tau rima i nia i te Philiseti, o tâpû ê atu vau i te Kereti, e haamou atu hoi i te toea i te tipaeraa i tahatai ra. 17 E tahoo rahi roa vau ia ratou, ma te rave uˈana rahi; e ite hoi ratou e, o Iehova vau, ia tuu atu vau i tau riri i nia ia ratou ra.