Ezekiela

TE HOO RAHI A TURIA RA, E TO ˈNA PAU RAHI HURITUMU RA.

27 Ua tae maira hoi te parau a Iehova ia ˈu nei, na ô maira, 2 E tena na, e te tamaiti a te taata na, a rave oe i te parau oto ia Turia, 3 a parau atu ai ia Turia, E tei parahi i te tuuraa na tai ra, o te taata hoo na te taata atoa i te mau fenua e rave rahi ra, Te na ô maira te Fatu ra o Iehova; E Turia e, ua parau hoi oe e, Ua nehenehe roa vau i te purotu. 4 Tei ropu i te moana to oe ra hiti, ua faanehenehe-roa-hia oe e tei patu ia oe ra. 5 E berusi anaˈe to oe mau raau pahi no Senira: ua rave ratou i te arezi no Lebanona ei tira na oe. 6 E aluna no Basana ta oe mau hôe i te tarairaahia e ratou; to oe mau iri e sena ïa, i tarotohia i te tasura no te mau fenua o te Kitima ra. 7 Te vavai maitai ma te faaunauna no Aiphiti mai tei hohorahia ei reva na oe; te ahu ereere-tape-moana e te uraura no te mau fenua o Elisa, o to oe ïa tapoˈi. 8 Te mau taata no Sidona e no Aravada, o te hoê ïa ia oe: te mau taata paari i roto ia oe, e Turia, o to oe ïa mau pailoti: 9 te mau taata tahito no Gebala e te feia ite no reira ra, o to oe ïa mau totamu. Te mau pahi atoa o te moana e te mau taata no tai atoa ra i roto anaˈe ia oe ra, e hoo i to oe ra hooraa. 10 To Peresia, e to Luda, e to Phuta, o to oe ïa mau taata tamaˈi, no to oe ra nuu: ua faauta ratou i te paruru e te taupoo i roto ia oe; na ratou i imi i to oe ra hanahana. 11 Te mau taata no Aravada e to oe atoa ra nuu, tei nia ïa i to oe ra patu e ati noa ˈˈe, e tei roto te mau Gamadi i to oe ra mau pare: ua faauta ratou i to ratou mau paruru i nia i to mau patu e ati noa ˈˈe; ua nehenehe roa oe ia ratou. 12 O Taresisa ta oe taata hoo, no te rahi o to oe ra mau taoˈa; i te ario, e te auri, e te bidila, e te tapau, ua hoo ratou i ta oe mau hooraa. 13 O Iavana, e o Tubala, e o Meseka, o ta oe ïa hoo i te taata nei; e ua hopoi ratou i te farii veo i ta oe hooraa. 14 To te utuafare o Togarama tei hopoi i te puaahorofenua e te taata e faahoro ra, e te pheradi, i to oe hooraa. 15 Te mau taata no Dedana ta oe mau taata hoo; e rave rahi te fenua e hooraa anaˈe ïa i ta oe ra mau mea i hamanihia ra; e ua faahoˈi mai ratou i te hoo ia oe, i te tara puaa, e te sena, e te ebeni. 16 O Arama ta oe taata hoo i te mau ohipa rahi na oe ra; i te nepheka, e te ahu uraura, e te taoˈa faanehenehe, e te vavai maitai, e te ramuta, e te kadakada, i te hopoiraa mai i ta oe ra hooraa. 17 O Iuda e te fenua o Iseraela atoa, o ta oe ïa feia hoo: i te sitona no Menita, e te panaga, e te meli, e te hinu olive, e te tapau noˈanoˈa, o ta ratou ïa i hopoi mai i ta oe hooraa. 18 O Damaseko ta oe ra taata hoo, i ta oe ra mau ohipa atoa, e te rahi o ta oe ra taoˈa; i te uaina Helibona, e te huruhuru mamoe teatea ra. 19 Tei ta oe atoa ra hooraa o Dana, e o Iavana mai Uzala mai: o te auri tiapaihia, e te kade, e te kane, tei ta oe ra hooraa. 20 O Dedana ta oe taata hoo i te ahu faahaaha no te feia faahoro puaahorofenua ra. 21 O Arabia, e te mau arii atoa o Kedara, e feia hoo anaˈe i ta oe ra mau taoˈa; i te pinia mamoe, e te mamoe oni, e te puaaniho, o ta oe ïa feia hoo i te reira. 22 Te mau taata hoo no Seba e no Raama, o ta oe atoa ra ïa feia hoo: i te mau raau i hau i te noˈanoˈa ra, e te mau ofai maitatai roa ra, e te auro, e na ratou i î ai ta oe ra mau hoo ra. 23 O Harama, e o Kane, e o Edene, te feia hoo no Seba, Asura, Kilimada, o ta oe ïa feia hoo. 24 Ta oe ïa feia hoo taoˈa maitatai ra: o te ahu ereere-tape-moana ïa, e te ohipa faaunaunahia te hiti ra, e te piha ahu maitatai auhia ra, i ruuruuhia i te taura, e e arezi te raau, i roto i ta oe ra mau taoˈa hoo. 25 Te mau pahi no Taresisa, o te feia hoo rahi ïa i ta oe ra hooraa: maitai roa aˈera oe, e te faaunauna-rahi-hia i ropu i te moana ra.

26 Ua hôe-roa-hia oe e to feia hôe ra i raro i te moana rahi ra: ua parari oe i te mataˈi no te hitia o te râ ra i ropu i te moana ra. 27 Ta oe ra taoˈa, e ta oe mau hooraa haapaohia, e te hooraa rii ra, to oe ra mau ihitai, e ta oe ra mau pailoti, to oe ra mau totamu, e te feia i hoo i ta oe ra hooraa, e ta oe atoa ra mau taata tamaˈi, i roto ia oe ra, e te taata atoa i roto ia oe ra, e mairi atoa i ropu i te moana i te mahana e hiˈa ˈi oe ra. 28 I te haruru o te reo o to mau pailoti, e aueue atoa te mau hiti ra. 29 E te feia atoa e rave i te hôe ra, te mau ihitai, e te mau pailoti atoa o te miti ra, e pou anaˈe mai ïa i raro mai nia mai i to ratou mau pahi; e ua tia anaˈe mai i tahatai; 30 e faaite hua ratou i to ratou reo ia oe, ma te oto rahi, ma te taora i te repo i nia i to ratou mau upoo; e te hurihuri noa hoi ia ratou i roto i te rehu auahi: 31 e paoti haapau roa hoi i to ratou upoo ia oe, e tatua hoi i te ahu oto i nia ia ratou, e oto rahi roa hoi ratou ia oe ma te inoino te aau, e ma te mihi rahi. 32 E rave hoi ratou i te parau oto i to ratou otoraa ia oe, e mihi hoi ia oe ma te na ô e, O vai ïa oire e au ia Turia i tei haamou-hua-hia i ropu i te moana? 33 A utahia ˈi ta oe ra mau taoˈa mai te mau vahi tipaeraa ra, e rave rahi tei mauruuru ia oe; no te rahi o ta oe ra taoˈa, e te taoˈa hoo na oe ra, i taoˈahia ˈi te mau arii atoa o te fenua nei. 34 Ua parari ra oe i tena na i tai na, e ta oe ra mau taoˈa hoo i ropu i te moana: e to oe atoa ra mau taata i roto ia oe ra ua hiˈa anaˈe. 35 Ua maere te mau taata atoa o te mau fenua na ia oe, e ua mǎtaˈu rahi roa to ratou mau arii, ua ahoaho roa ratou ua itea i te mata. 36 Ua tâhitohito te mau taata hoo i roto i te mau taata ra ia oe; ua riro oe ei riariaraa, e ore roa hoi oe e rave-faahou-hia e a muri noa ˈtu.