Ezekiela
TE FAAITEHIA NEI TE PAU O IERUSALEMA, I TE PARABOLE I TE PANI PIHAA RA.
24 E tae aˈera i te iva o te matahiti, e te ahuru o te marama, e te ahuru hoi o te mahana i taua marama ra, i tae mai ai te parau a Iehova ia ˈu nei, na ô maira, 2 E te tamaiti a te taata na, e papai na oe i te iˈoa o te mahana, no teie nei mahana: parahi ihora te arii o Babulonia e aro ia Ierusalema i teie nei mahana. 3 A parau atu i te tahi parabole i te utuafare tâhito nei, e parau atu ia ratou, Te na ô maira te Fatu ra o Iehova; A faauta na i te hoê pani, a faauta na, a ninii i te pape i roto ra: 4 e haaputu i te vahi i roto ra, i roto, i te mau vahi maitatai ra; a faaî atu ai i te avae muri, e te humaha i mua, e te mau ivi maitatai ra. 5 A rave i te mau puaa maitatai o te nǎnǎ ra, a fata ˈi e a tahu i te mau ivi i raro aˈe, ia veavea roa e ia ama maitai te mau ivi i roto ra.
6 I teie nei parau, te na ô maira te Fatu ra o Iehova, E pohe to te oire i viivii i te toto ra, e te pani ma te repo i te vai-atoa-raa i roto ra, e aore te repo i reva i rapae au ra! e iriti tataitahi maira; eiaha ia mairihia i te kelero. 7 Te vai noa ra to ˈna toto i roto ia ˈna; ua tuu ihora oia i nia roa i te mato ra; aore aˈera oia i ninii i raro i te repo, ia tapoˈihia i te repo ra: 8 ia tupu mai te riri, ia tahoo atu vau, ua tuu vau i to ˈna toto i nia roa i te mato ra, ia ore ia tapoˈihia. 9 E teie nei, te na ô maira te Fatu ra o Iehova; E pohe to te oire i viivii i te toto ra! e haaputu vau i te vahie e ia rahi. 10 E huri â i te vahie i nia iho, e tutui i te auahi, ia pau te iˈo, e anoi i te raau, e ia ama hoi te mau ivi i te auahi; 11 a tuu noa ˈtu ai ma te faufaa ore to roto ra i nia i te arahu, e ia veavea te veo, e ia ama, e ia tarapape to ˈna ino i roto ra, e ia pau roa te repo ra. 12 Ua paupau roa to ˈna aho i te haavare, aita râ i reva to ˈna repo rahi i rapae; aita to ˈna repo i huru pau i te auahi. 13 E ino rahi tei taua viivii no oe ra. No te mea ua tia ia ˈu i te tamâ ia oe ra, e aore i tia ia oe ia tamâhia, e tena na, e ore oe e mâ i to viivii na e ia faairihia mai e au tau riri i nia ia oe ra. 14 Na ˈu mau hoi i parau na Iehova, e tupu ïa e na ˈu i rave; e ore e hoˈi i muri, e ore hoi au e faaherehere, e ore au e tatarahapa; e haava ratou ia oe i ta oe ra mau haerea, e ta oe mau mea i rave, te parau maira te Fatu ra o Iehova.
15 E ua tae maira hoi te parau a Iehova ia ˈu nei, na ô maira, 16 E te tamaiti a te taata na, inaha, teie au a rave ê i te hinaaro o to mata i te tairi pohe roa ra; eiaha râ oe e auê, eiaha e oto, eiaha ia manii to roimata. 17 Oto mamû noa oe; eiaha e oto i te feia i pohe, a taamu i to taupoo i nia ia oe, a oomo i to avae i te tamaa, eiaha e tapoˈi i to pue utu, e eiaha e amu i te maa a te feia oto ra. 18 Ua parau atu vau i te mau taata i te poipoi, e ahiahi ihora, pohe atura tau vahine; e ao aˈera, ua na reira vau i tei parauhia mai au ra.
19 Ua parau maira te mau taata ia ˈu ra, Eita oe e faaite mai ia matou i te auraa o teie nei mau parau ia matou nei, i na reira ˈi oe na? 20 Ua parau atura vau ia ratou, Ua tae mai te parau a Iehova ia ˈu nei, na ô maira, 21 A parau na i te utuafare o Iseraela, Te na ô maira te Fatu ra o Iehova; Inaha, e haaviivii au i tau vahi moˈa, i te maitai o to outou puai, e te hinaaro o to outou mata, e tei hinaarohia e outou e vaiiho; e ta outou mau tamaroa e ta outou mau tamahine i vaiihohia e outou, e mairi ïa i te ˈoˈe. 22 E na reira hoi outou mai ta ˈu ra: eiaha outou e tapoˈi i to outou utu, e eiaha e amu i te maa a te feia oto ra. 23 E tuu hoi i to outou taupoo i nia i te upoo, e to outou tamaa i nia i to outou avae: eiaha outou e mihi, eiaha e oto; e oto mamû noa râ i ta outou hara, a mihi noa ˈi te tahi i te tahi. 24 Ua na reira hoi Ezekiela ia riro ei tapao na outou: e mai ta ˈna i rave ra e na reira atoa outou ia tupu teie nei parau; e ite hoi outou e, o te Fatu ra vau o Iehova.
25 O oe atoa hoi, e te tamaiti a te taata na, e ore anei e riro, i te mahana a rave atu ai au i to ratou puai, te oaoa o to ratou unauna, te hinaaro o to ratou mata, e tei hinaarohia e to ratou aau, e ta ratou mau tamaroa e ta ratou mau tamahine, 26 na te hoê o tei ora mai i taua mahana ra e haere mai ia oe ra, a faaite hua ˈi i to tariˈa? 27 Ei taua mahana ra, e parau ai to vaha i tei ora maira, e na oe e parau, e ore e vava faahou; e riro oe ei tapao na ratou; e ite ratou e, o vau o Iehova.