Ezekiela

TE TOHU NEI EZEKIELA IA IUDA E IERUSALEMA ATOA.

21 E ua tae maira te parau a Iehova ia ˈu nei, na ô maira, 2 E te tamaiti a te taata na, e fariu i to mata i te pae i Ierusalema, a tuu atu ai i ta oe parau i te pae i te mau vahi moˈa ra, a tohu atu ai i te fenua o Iseraela nei, 3 A parau atu ai i te fenua o Iseraela, Te na ô maira Iehova, Inaha, e ore au e faatia ˈtu ia oe, e unuhi au i tau ˈoˈe i to ˈna vehî, e tairi atu vau i te feia parau-tia e te feia parau ino i roto ia oe na. 4 E tena na, e tairihia e au te feia parau-tia e te feia parau ino i roto ia oe na, e reva tau ˈoˈe i teie nei, i unuhihia i to ˈna ra vehî e rave i te taata atoa, mai te pae i apatoa e tae noa ˈtu i te pae i apatoerau: 5 e ite hoi te taata atoa e, ua unuhihia e au, e Iehova, tau ˈoˈe i roto i te vehî ra: e ore roa e hoˈi faahou i reira. 6 O oe râ, e te tamaiti a te taata na, a autâ ma te horuhoru to opu; e ma te oto rahi, e autâ i mua i to ratou mata. 7 E ia parau mai ratou ia oe ra, Eaha oe i autâ noa ˈi? e parau atu oe, I tera ra roo i otuitui noa maira: e tarapape te mau aau atoa ra, e paruparu te mau rima atoa ra, e taiâ hoi te varua atoa ra, e paruparu hoi te mau turi atoa ra mai te pape ra: te haere maira, e riro hoi i te tupu, te parau maira te Fatu ra o Iehova.

8 Ua tae maira hoi te parau a Iehova ia ˈu nei, na ô maira, 9 E te tamaiti a te taata na, e tohu atu, e na ô atu, Te parau maira Iehova; A parau na, E ˈoˈe, e ˈoˈe, ua faainahia, e ua faaanaanahia: 10 ua faainahia ia rahi to ˈna pau: ua faaanaanahia ia anaana mai: e tia anei hoi ia faarearea tatou? ua vahavahahia te sepeta a ta ˈu tamaiti mai te mau raau atoa ra. 11 Ua hopoihia hoi ia faaanaanahia, e ia ravehia e te rima, ua faainahia te ˈoˈe, e ua faaanaanahia, ia hopoihia ˈtu i te rima o te taparahi. 12 A pii, a auê atu, e te tamaiti a te taata na, e riro hoi i nia i to ˈu ra mau taata, e i nia atoa i te mau arii o Iseraela ra; te horuhoru i te ˈoˈe e riro i nia i to ˈu ra mau taata; e teie nei, a papai na i to humaha. 13 Ua tamatahia hoi teie; o te vahavaha hoi i te raau? e ore hoi te reira e vaiihohia, te parau maira te Fatu ra o Iehova. 14 E tena na, e te tamaiti a te taata, e tohu oe e a papai ai i to rima, e hopoi mai i te ˈoˈe e ia piti ïa i te hopoiraa mai, e ia toru hoi; e ˈoˈe ïa no te feia i pau; e ˈoˈe ïa no te pau rahi, o tei tae roa i roto i to ratou mau piha. 15 Ia tarapape to ratou aau, e ia rahi to ratou pau, i tuu ai au i te ˈoˈe taparahi ra i to ratou atoa ra mau uputa. Auê! ua faaanaanahia, e ua faainahia ei taparahi. 16 Haere oe na te mau eˈa ra; ei te pae atau, e na te pae aui, ei te vahi i fariuhia ˈtu ai to mata na. 17 E papai atoa vau i to ˈu rima, e faairi au i tau riri i nia ia oe ra: o vau, o Iehova, tei parau nei.

18 E ua tae maira te parau a Iehova ia ˈu nei, na ô maira, 19 E faaite atoa oe, e te tamaiti a te taata, i e piti eˈa, ia hopoihia mai te ˈoˈe o te arii o Babulonia: no te fenua hoê raua ia haere: e faataa na hoi oe i te hoê vahi, ei te maaraa o te eˈa e tae ai i te oire. 20 E haapao i te eˈa e tae mai ai te ˈoˈe i Raba i ǒ te ati Amona, e tae ai hoi i Iuda, ia rave ia Ierusalema, te oire auahia ra. 21 Ua tia noa te arii o Babulonia i te maaraa o te eˈa ra, a maa mai ai na eˈa e piti ra; i te raveraa i te mau peu tahutahu, ua amui oia i te mau ohe no ˈna ra, e ua ui i te teraphima, ua hiˈo hoi i te paraia. 22 Tei tana rima atau te mau peu tahutahu ia Ierusalema, ia haapao hoi i te mau otui, ia parau hoi te vaha i te taparahiraa ra, ia faateitei te reo ma te umere, ia tuu hoi i te mau otui i te mau uputa, ia ohu i te ohu, ia patu i te pare. 23 E riro râ ratou i te manaˈo, e peu haavare, i te feia i tǎpǔ i te tǎpǔraa: e riro râ oia i te manaˈo i te hara, ia noaa ratou. 24 E teie nei, te na ô maira te Fatu ra o Iehova; No te mea ua manaˈohia ta outou hara, i ta outou mau hapa i itea ra, e te itea ra to outou ino i ta outou mau haerea atoa; no te mea ua manaˈohia outou, e riro noa outou i te rima.

25 E o oe hoi, e tena na taiata e te arii parau ino i Iseraela nei, ua tae i to ˈna mahana, i te taime e hope ai te parau ino ra, 26 te na ô maira te Fatu ra o Iehova; Iritia te taupoo nehenehe, rave ê atu i te korona: o teie, e ere hoi teie atu: a faahaehaa i tei teitei, e a faateitei i tei haehaa. 27 Na ˈu e ruri ê, e ua ruri hoi, e ua ruri i te reira, e ore roa aˈera, e ia tae mai oia ra te Fatu mau ra; e na ˈu e horoa ˈtu no ˈna.

28 E o oe hoi, e te tamaiti a te taata na, e tohu oe, e na ô atu, Te na ô maira te Fatu ra o Iehova, i te ati Amona e ta ratou faaino; ei reira oe e parau atu ai, Te ˈoˈe, te ˈoˈe, ua unuhihia; ua faaanaanahia ei taparahi, e haapau no te anaana: 29 te hiˈo ra ratou i te mea faufaa ore ia oe ra, e te faatupu ra ratou i te haavare ia oe, ia hopoi atu vau ia oe i nia i te aˈî o te feia i pohe, i te taata parau ino ra, tei tae to ratou mahana, te mahana e faaoti ai i ta ratou parau ino. 30 A faahoˈi anei au i te reira i roto i te vehî? ei te vahi i hamanihia ˈi oe ra, i te fenua no reira mai oe ra, e haava ai au ia oe ra. 31 E ninii atu vau i tau riri tahoo i nia ia oe ra, e puhipuhi atu vau i te auahi ra i tau riri i nia ia oe, a tuu atu ai ia oe i te rima o te feia aroha ore, e te ite i te taparahi. 32 E riro oe ei vahie no te auahi ra; e vaiiho noa i to toto i roto i te fenua ra; e ore oe e manaˈo-faahou-hia: o vau hoi teie, o Iehova, e parau nei.