Ezekiela

TE PATOI NEI TE ATUA I TE UI A TE FEIA PAARI I ISERAELA RA.

20 E tae aˈera i te hitu o te matahiti, e te pae o te marama, e te ahuru o te mahana i taua marama ra, ua haere maira te tahi pae i te feia paari i Iseraela nei e ui ia Iehova, e ua parahi maira i mua ia ˈu. 2 Ua tae maira te parau a Iehova ia ˈu nei, na ô maira, 3 E te tamaiti a te taata na, e parau atu i te feia paari i Iseraela nei, e na ô atu ia ratou, Te na ô maira te Fatu ra o Iehova, I haere mai anei outou e ui ia ˈu nei? Te parau maira te Fatu ra o Iehova, Te ora nei au ra, e ore au e uihia mai e outou.

4 Eita oe e paraparau atu ia ratou, eita oe e haava ˈtu ia ratou, e te tamaiti a te taata na? e faaite atu ia ratou i te mau parau faufau a to ratou mau metua: 5 a parau atu ai ia ratou, Te na ô maira te Fatu ra o Iehova; I te mahana i maiti ai au ia Iseraela, a tǎpǔ ai au i te huaai i te utuafare o Iakoba, a faaite atu ai au ia ˈu iho ia ratou i te fenua ra i Aiphiti, ia ˈu hoi i tǎpǔ atu ia ratou ra, a na ô ai ra e, O vau o Iehova, to outou Atua ra: 6 i te reira mahana a tǎpǔ atu ai au ia ratou, e e aratai mai au ia ratou mai Aiphiti mai i te fenua i imihia e au no ratou ra, o tei tahe pape noa te û e te meli, o te maitai ïa o te mau fenua atoa ra: 7 i reira vau i te parauraa ˈtu ia ratou e, E faarue outou, o te taata atoa ra i te mau mea faufau o to ˈna ihora mata, eiaha e haaviivii ia outou i te mau idolo no Aiphiti ra: o vau o Iehova, to outou Atua ra. 8 Tâhito maira râ outou ia ˈu, e aore i faaroo mai ia ˈu: aore hoi ratou i faarue i te mau mea faufau o to ratou mata, e aore i faarue i te mau idolo i Aiphiti ra. Ua na ô aˈera vau, E tahoo atu vau i nia ia ratou, e faatupu vau i tau riri ia ratou i ropu i te fenua ra i Aiphiti. 9 I haapao ra vau i ta ˈu i rave i to ˈu ihora iˈoa, ia ore ia viivii i mua i te aro o te mau fenua i parahihia e ratou ra, i ta ˈu i faaite atu ia ratou ia ˈu iho i mua i to ratou mata, i te aratairaa mai ia ratou mai te fenua maira mai Aiphiti.

10 Ua aratai mai au ia ratou mai te fenua ra mai Aiphiti, e ua aratai ia ratou i te medebara ra. 11 E ua horoa ˈtu vau ia ratou i ta ˈu nei mau haapaoraa, e ta ˈu nei faaauraa ta ˈu i faaite atu ia ratou, o tei haapao-anaˈe-hia e te taata ra, e ora ïa oia i te reira. 12 E ua horoa atoa hoi au i tau mau sabati, ei tapao no ratou e ia ˈu hoi; ia ite ratou e, na ˈu na Iehova i faataa ia ratou. 13 Ua tâhito mai râ te utuafare o Iseraela ia ˈu i te medebara: aore ratou i faaau i to ratou haerea i ta ˈu nei haapaoraa, e ua vahavaha ratou i ta ˈu ra mau faaauraa, o tei haapao-anaˈe-hia e te taata ra, e ora ïa oia i te reira: e tau mau sabati ra, ua haaviivii-roa-hia ïa e ratou. Ua na ô ihora vau, E ninii hua ˈtu vau i tau riri i nia ia ratou i roto i te medebara, e ia pau atu ratou ia ˈu. 14 No to ˈu ihora iˈoa ta ˈu i rave, ia ore ia viivii i te aro o te mau fenua o tei arataihia mai ratou e au i rapae au ra, i mua mau i to ratou mata. 15 Ua tǎpǔ atura vau ia ratou i roto i te medebara, e e ore au e aratai mai ia ratou i te fenua ta ˈu i horoa ˈtu no ratou, o tei tahe pape noa te û e te meli, o te maitai ïa o te mau fenua atoa nei: 16 no te mea, ua vahavaha ratou i ta ˈu ra mau faaauraa, e aore i haapao i ta ˈu nei haapaoraa; e ua haaviivii roa ratou i tau mau sabati: o to ratou aau i tipapa i to ratou mau idolo. 17 Ua faaherehere râ tau mata ia ratou, e aore aˈera ratou i pohe ia ˈu, aore i faahope ia ratou i te rave i te medebara. 18 Ua parau râ vau i ta ratou mau tamarii i roto i te medebara, Eiaha outou e pee i te mau haapaoraa a to outou mau metua, e eiaha e haapao i ta ratou faaauraa, e eiaha e haaviivii ia outou i to ratou mau idolo: 19 o vau o Iehova, o to outou Atua, o ta ˈu ra haapaoraa ta outou e haapao, e ta ˈu ra faaauraa ta outou e mau, e a rave ai; 20 e haamoˈa i tau mau sabati; e riro ratou ei tapao no outou e ia ˈu, ia ite hoi outou e, o vau o Iehova, o to outou Atua ra. 21 Ua tâhito mai râ te mau tamarii ra ia ˈu; aore ratou i haapao i ta ˈu ra mau haapaoraa, aore hoi i mau i ta ˈu ra faaauraa, a haapao ai, i tei haapao-anaˈe-hia e te taata nei, e ora ïa oia i te reira; e ua viivii tau mau sabati ia ratou. Ua parau ihora vau, E ninii atu vau i tau riri i nia ia ratou, e faatupu atu vau i tau tairoiro i nia ia ratou i te medebara ra. 22 Ua tapea râ vau i tau rima, e ua haapao vau i ta ˈu i rave i to ˈu iho iˈoa, ia ore ia viivii i te aro o te mau fenua, i ta ˈu i aratai ia ratou i rapae au i mua mau i to ratou mata ra. 23 Ua tǎpǔ atu hoi au ia ratou i te medebara, e haapurara vau ia ratou i te mau fenua ra, e ia puehu ratou i te mau mataeinaa ra; 24 no te mea, aita ratou i faatupu i ta ˈu ra faaauraa, ua vahavaha râ ratou i ta ˈu ra mau haapaoraa, e ua haaviivii i ta ˈu ra mau sabati, e ua hiˈo to ratou mata i te mau idolo o to ratou mau metua ra. 25 No reira vau i tuu noa ˈtu ai ia ratou ia haapao noa na i te haapaoraa faufaa ore, e te mau faaauraa eita e ora ia haapao ra; 26 e ia haaviivii ia ratou iho i ta ratou mau tusia, ratou i tuu i to ratou tamarii matahiapo i na roto noa i te auahi, ia ano ratou ia ˈu, e ia ite ratou e, o vau o Iehova.

27 E teie nei, e parau atu i te utuafare o Iseraela, e te tamaiti a te taata na, e na ô atu ia ratou, Te na ô maira te Fatu ra o Iehova; Teie â hoi te hoê mea ta to outou mau metua i faaino ia ˈu ra, ratou i rave i te hara ino ia ˈu nei: 28 ia tae mai hoi ratou i te fenua ta ˈu i tǎpǔ atu ia ratou e hopoi no ratou ra, ia hiˈo ra ratou i te mau aivi teitei, e te mau raau meumeu ra, ua hopoi ratou i ta ratou mau tusia i reira, e i reira ta ratou ô faaooo i te hopoiraahia: e i reira ta ratou raau faanoˈanoˈa i te tuuraahia, e i reira ta ratou tusia inu i te niniiraahia. 29 Ua parau atura vau ia ratou, Eaha tena na vahi teitei ta outou e haere na? e te faaitehia nei to ˈna iˈoa, o Bama, e tae roa aˈenei i teie nei mahana.

30 E tena na, e parau atu i te utuafare o Iseraela, Te na ô maira te Fatu ra o Iehova; Ua viivii outou mai to outou mau metua atoa ra? e te taiata ra outou i te peeraa i ta ratou ra mau parau faufau? 31 O outou ra i hopoi i ta outou i hopoi ra, outou hoi i tuu i to outou mau tamarii ia na roto i te auahi ra, ua haaviivii outou ia outou iho i to outou mau idolo, e tae noa aˈenei i teie nei mahana: e uihia mai anei au e outou, e te utuafare o Iseraela? Te na ô maira te Fatu ra o Iehova, Te ora nei au ra, e ore au e uihia e outou. 32 E tei tupu i roto i to outou aau na, e ore ïa e riro i reira, ta outou e parau na e, E riro matou mai te mau fenua, mai te mau fetii o te mau mataeinaa ra, i te haamoriraa i te raau e te ofai.

33 Te parau maira te Fatu ra o Iehova, Te ora nei au ra, ei arii au i nia ia outou ma te rima puai, e ma te rima faatorohia, e ma te riri i te niniiraa ˈtu. 34 E aratai mai au ia outou mai roto mai i te mau taata ra, e haaputu mai au ia outou mai te mau fenua i purara ˈi outou ra, ma te rima puai, e ma te rima faatorohia, e ma te riri i te niniiraa ˈtu. 35 E aratai au ia outou i roto i te medebara o te mau taata ra, e ei reira vau e mârô atu ai ia outou, to outou mata e to ˈu. 36 Mai ia ˈu i mârô atu i to outou mau metua i te medebara, ia ˈu i aratai mai ia ratou mai te fenua maira mai Aiphiti, e na reira vau i te mârô ia outou, te parau maira te Fatu ra o Iehova. 37 E tuu au ia outou na raro i te papai ra, e aratai mai ia outou na roto i te tapea a te faufaa ra: 38 e e faataa vau i te feia hauti i roto ia outou na, i tei rave i te hara ia ˈu nei; e aratai mai au ia ratou mai te fenua mai ta ratou i parahi ra; e ore râ ratou e tae i te fenua o Iseraela: e ite hoi outou e, o Iehova vau nei.

39 Area outou, e te utuafare o Iseraela, te na ô maira te Fatu ra o Iehova; A haere outou, e haamori te taata atoa i to ˈna idolo; e ore outou e faaroo mai ia ˈu a muri aˈe, eiaha râ outou e haaviivii faahou i to ˈu nei iˈoa moˈa i ta outou i hopoi, e to outou mau idolo. 40 Ei roto hoi i tau mouˈa moˈa, i te hoê mouˈa teitei i Iseraela ra, te parau maira te Fatu ra o Iehova, ei reira te utuafare atoa o Iseraela e haamori ai ia ˈu, ratou atoa i nia i te fenua nei: ei reira vau e ite atu ai ia ratou, e ei reira vau e rave ai i ta outou mau ô, e te oho matamua ta outou e hopoi, i te mau mea moˈa na outou ra. 41 Outou e to outou faanoˈanoˈa ra tei itehia ˈtu e au, ia aratai mai au ia outou mai roto mai i te mau taata ra, e ia putuputu outou ia ˈu mai te mau fenua i purara ˈi outou ra; e haamoˈahia vau ia outou i te aro o te mau fenua ra. 42 E ite hoi outou e, o Iehova vau, ia aratai mai au ia outou i te fenua o Iseraela, i te fenua ta ˈu i tǎpǔ atu e, e horoa vau no to outou mau metua. 43 Ei reira outou e manaˈo ai i ta outou parau, e ta outou mau mea i rave i viivii ai outou; e faafaufau hoi outou ia outou iho i te mau ino ta outou i rave ra. 44 E ite hoi outou e, o Iehova vau, ia rave atu vau ia outou i to ˈu nei iˈoa, eiaha ia au i ta outou haapaoraa ino, e to outou mau ino i rave ra, e te utuafare o Iseraela, te na reira maira te Fatu ra o Iehova.

45 E ua tae maira te parau a Iehova ia ˈu nei, na ô maira, 46 E te tamaiti a te taata na, a fariu na i to mata i te pae i apatoa, a tuu atu ai i ta oe parau i te pae i apatoa, a tohu tia ˈtu ai i te uru raau i te pae i apatoa ra; 47 a parau atu ai i te uru raau i te pae i apatoa ra, E faaroo mai i te parau a Iehova; te na ô maira te Fatu ra o Iehova; inaha, e tutui au i te auahi i roto ia oe ra, e pau hoi te raau ota atoa i roto ia oe ra, e pau hoi te raau ota atoa i roto ia oe ra, e te mau raau mǎrô atoa ra: te pura auahi e ura ra e ore e tinaihia, e hope hoi te mau mata atoa i te ama i reira, mai apatoa e tae noa ˈtu i apatoerau. 48 E ite hoi te taata atoa e, na ˈu na Iehova i tutui: e ore hoi e tinaihia. 49 Ua na ô atura vau, E te Fatu, e Iehova! te na ô nei ratou ia ˈu, E ere anei i te parabole ta ˈna e parau nei?