Ezekiela
TE MAU HARA A IERUSALEMA, E TE INO ATOA O TE MAU PEROPHETA.
22 E ua tae maira te parau a Iehova ia ˈu nei, na ô maira, 2 E tena na, o oe, e te tamaiti a te taata, e ore anei oe e haava ˈtu, eita oe e haava ˈtu i te oire i viivii i te toto nei, a faaite atu ai ia ˈna i ta ˈna ra mau parau faufau ra? 3 A parau na oe, Te na ô maira te Fatu ra o Iehova; Te haamanii nei te oire i te toto i ropu ra; ia tae to ˈna tau e pohe ai ra; e te tarai nei i te mau idolo ei haaviivii ia ˈna iho i te reira. 4 Ua hara oe i te toto i manii ia oe ra, e ua viivii oe i te mau idolo ta oe i hamani; e na oe i haafatata mai i to oe ra mau mahana, e na oe i faatae mai i te taime o to oe ra matahiti. I faariro ai au ia oe ei faainoraa na te mau etene, ei tâhitohitoraa na te mau fenua. 5 Te feia i fatata e to te atea ê atoa, te tâhito mai ia oe, e tei viivii to iˈoa na, e tei rahi to oe ihirea. 6 Inaha, te mau arii o Iseraela, te taata atoa ma to ˈna ra puai i roto anaˈe ia oe ra, i te haamaniiraa i te toto ra. 7 I roto â ia oe ra ta ratou tâhitoraa i te metua tane e te metua vahine; i roto â ia oe ra ta ratou rave-ino-raa i te taata ê; i roto â ia oe ra ta ratou hamani-ino-raa i te otare e te vahine ivi. 8 Ua vahavaha oe i tau mau mea moˈa ra, e ua viivii tau mau sabati ia oe. 9 Tei roto ia oe te mau taata i faaino noa ia manii te toto ia ratou; i roto ia oe â ta ratou amuraa i nia i te mouˈa: i roto ia oe â ta ratou raveraa i te mea haama ra. 10 I roto ia oe â ta ratou heheuraa i te vahi haama a te metua tane: i roto ia oe â ta ratou tuu-haehaa-raa i te vahine faataa-ê-hia ra. 11 E ua rave te tahi i te mea faufau i ta vetahi ê ra vahine: e ua rave ino hoi te tahi ua haaviivii i te tamahine a tana vahine iho; e i roto ia oe te hoê i te tuu haehaaraa i te tuahine iho, i te tamahine a tana metua tane ra. 12 I roto ia oe ra ta ratou raveraa i te tarahu ia haamanii i te toto ra; ua rave oe i te amu tarahu, e te faarahi, e ua noaa ta oe i te taata-tupu ra i te haru, e ua haamoe oe ia ˈu, te na reira maira te Fatu ra o Iehova.
13 E inaha, tena na, ua papai au i tau rima, i ta oe ra taoˈa noaaraa ino e te haavare, e te toto i manii i roto ia oe ra. 14 E tia anei to aau ia haamahu, e etaeta anei to rima, ia tae i te mahana e rave atu ai au ia oe ra? o vau teie e parau nei, o Iehova, e na ˈu ïa e rave. 15 E haapurara vau ia oe i roto i te mau etene, e haapuehu vau ia oe i roto i te mau fenua ra, e ia pau te ino i roto ia oe ra. 16 E rave hoi au ia oe ei tufaa, i te aro o te mau fenua ra, e ite hoi oe e, o Iehova vau.
17 Ua tae maira hoi te parau a Iehova ia ˈu nei, na ô maira, 18 E te tamaiti a te taata na, ua riro te utuafare o Iseraela mai te ota ra ia ˈu: mai te veo anaˈe ratou, mai te bidila, e te auri, e te tapau, i roto i te umu; e mai te ota ario ratou ra. 19 E teie nei, te na ô maira te Fatu ra o Iehova; No te mea ua riro atoa outou ei ota, e haaputuhia outou e au i rotopu ia Ierusalema. 20 Mai te taata e haaputu i te ario, e te veo, e te auri, e te tapau, e te bidila, i rotopu i te umu, a puhipuhi ai i te auahi i nia iho, ia tarapape ra; e na reira vau i te haaputu ia outou i tau riri nei, e ta ˈu nei tahooraa, e vaiiho vau ia outou ia tarapape outou. 21 Oia ïa, e haaputu vau ia outou, puhipuhi au i nia ia outou i te auahi ra i tau riri nei, e tarapape hoi outou i ropu. 22 Mai te ario e tarapape i ropu i te umu ra, e tarapape atoa outou i ropu; e ite hoi outou e, na ˈu, na Iehova, i ninii atu i tau riri i nia ia outou na.
23 Ua tae maira hoi te parau a Iehova ia ˈu nei, na ô maira, 24 E te tamaiti a te taata na, e parau atu oe ia ˈna, O oe taua fenua aore i tamâhia ra, e aore i ûahia i te mahana tahooraa ra. 25 Te vai ra te amuiraa to te mau peropheta i roto ia ˈna ra; mai te liona uuru ra ratou ia hahae i te maa ra; ua pau ia ratou te varua taata; ua riro ia ratou te taoˈa e te taoˈa maitatai ra ia ratou; ua faarahi ratou i te vahine ivi i roto ia ˈna ra. 26 Ua ore tana mau tahuˈa ua haapao i tau ture, e ua haaviivii i tau vahi moˈa: aore ratou i faataa ê i te mea moˈa e te mea noa; aita hoi ratou i faaite i te huru, o te mea mâ e te mea viivii; e ua vaiiho noa ratou i tau mau sabati ia haapao-ino-hia ra, e ua haaviiviihia vau i roto ia ratou. 27 To ˈna ra hui arii i roto ia ˈna ra, e au ïa i te luko ia hahae i te maa ra, te titau ra ratou ia manii te toto, e ia pohe te mau varua, ia noaa ta ratou taoˈa i te haavare. 28 E ua parai tana mau peropheta i te pua oˈi-ore-hia no ratou, e te hoˈi i te mea faufaa ore, e te faaite ia ratou i te tohu haavare, i te na ôraa e, Te na ô maira te Fatu ra o Iehova, e aore hoi Iehova i parau noa ˈˈe. 29 Ua rave uˈana te mau taata o te fenua na, e ua rave hoi i te parau haru ra, e ua hamani ino i te feia haehaa, e te feia veve: e hamani ino rahi to ratou i te taata ê, aore e faito. 30 Ua imi hoi au i te hoê taata e tifai i te vahi parari ra, e ia tia mai oia i roto i te vahi parari ra i mua ia ˈu ia ora taua fenua ra, e eiaha vau ia rave e taparahi; aore roa râ te hoê i itea ia ˈu. 31 I ninii atu ai au i tau riri tahoo ra i nia ia ratou; e ua pau ratou ia ˈu i te auahi ra i tau riri; o ta ratou iho haerea ta ˈu i tahoo atu i nia i to ratou iho upoo, te parau maira te Fatu ra o Iehova.